ಬಾಹ್ಯಾಕಾಶ ನಿಲ್ದಾಣದಲ್ಲೂ ತರಕಾರಿ ಬೆಳೆದ ಗಗನಯಾತ್ರಿ…!

2015ರಲ್ಲಿ ತೆರೆಕಂಡ ದಿ ಮಾರ್ಟಿಯನ್​ ಎಂಬ ಬ್ಲಾಕ್​ಬಸ್ಟರ್​ ಹಿಟ್​ ಸಿನಿಮಾದಲ್ಲಿ ಮಂಗಳ ಗ್ರಹದಲ್ಲಿ ಸಿಲುಕಿಕೊಂಡ ಗಗನಯಾತ್ರಿಯೊಬ್ಬ ಕೊನೆಗೆ ಅಲ್ಲಿಯೇ ಆಲೂಗಡ್ಡೆ ಬೆಳೆಯುವ ಕತೆಯನ್ನ ಬಹಳ ಸುಂದರವಾಗಿ ಹೆಣೆಯಲಾಗಿತ್ತು. ಆದರೆ ರೀಲ್​ನ ಈ ಕತೆಯನ್ನ ನಾಸಾದ ವಿಜ್ಞಾನಿಗಳು ರಿಯಲ್​ ಲೈಫ್ ನಲ್ಲಿ ಭಾಗಶಃ ಸತ್ಯವಾಗಿಸಿದ್ದಾರೆ.

ಇನ್ನೂ ಸರಳವಾಗಿ ಈ ವಿಚಾರವನ್ನ ಹೇಳೋದಾದ್ರೆ ಬಾಹ್ಯಾಕಾಶದಲ್ಲಿ ಒಂದಿಲ್ಲೊಂದು ಆವಿಷ್ಕಾರವನ್ನ ಮಾಡುವ ನಾಸಾದ ಗಗನಯಾತ್ರಿಗಳು ಇದೀಗ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಮೂಲಂಗಿ ಬೆಳೆಯನ್ನ ಬೆಳೆಯೋದ್ರಲ್ಲಿ ಯಶಸ್ವಿಯಾಗಿದ್ದಾರೆ.

ನಾಸಾದ ಗಗನಯಾತ್ರಿಯಾದ ಕೇಟ್​​ ರೂಬಿನ್ಸ್​ ನವೆಂಬರ್​ 30ರಂದು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ತಾವು ಬೆಳೆದ ಮೂಲಂಗಿ ಬೆಳೆಯನ್ನ ಕಟಾವು ಮಾಡುವ ಮೂಲಕ ಇತಿಹಾಸ ನಿರ್ಮಿಸಿದ್ದಾರೆ. ಸಿಎನ್​ಎನ್​ ನೀಡಿರುವ ವರದಿ ಪ್ರಕಾರ ರೂಬಿನ್ಸ್ 20 ಮೂಲಂಗಿ ಸಸ್ಯಗಳನ್ನ ಕಟಾವು ಮಾಡಿದ್ದಾರಂತೆ. ಈ ಬೆಳೆಗಳನ್ನ 2021ರಲ್ಲಿ ಭೂಮಿಗೆ ತರುವ ಸಲುವಾಗಿ ಕೋಲ್ಡ್ ಸ್ಟೋರೇಜ್​ನಲ್ಲಿ ಇರಿಸಲಾಗಿದೆ.

ನಾಸಾ ಬಾಹ್ಯಾಕಾಶ ನಿಲ್ದಾಣದಲ್ಲಿ ಮೂಲಂಗಿ ಬೆಳೆ ಬೆಳೆದ ಪ್ರತಿ ಹಂತವನ್ನೂ ಸಾಮಾಜಿಕ ಜಾಲತಾಣದಲ್ಲಿ ಶೇರ್​ ಮಾಡಿದೆ.