BIG NEWS: ಉಪಗ್ರಹಗಳ ಕಾರ್ಯ ನಿರ್ವಹಣೆ ಕುರಿತು ʼನಾಸಾʼ ವಿಜ್ಞಾನಿಗಳ ಕಳವಳ

ಭೂಮಿಯನ್ನು ಸಂರಕ್ಷಿಸುವ ಪದರದಲ್ಲಿ ಕಾಣಿಸಿಕೊಂಡಿರುವ ಕುಳಿ ಮುಂದಿನ ದಿನಗಳಲ್ಲಿ ಎರಡು ದುರ್ಬಲ ಮ್ಯಾಗ್ನೆಟಿಕ್‌ ವಲಯಗಳಾಗಿ ಹೋಳಾಗುವ ಸಾಧ್ಯತೆ ಇದೆ ಎಂದು ಅಮೆರಿಕಾ ಬಾಹ್ಯಾಕಾಶ ಸಂಸ್ಥೆ ನಾಸಾ ಎಚ್ಚರಿಸಿದೆ.

ದಕ್ಷಿಣ ಅಮೆರಿಕಾ ಹಾಗೂ ದಕ್ಷಿಣ ಅಟ್ಲಾಂಟಿಕ್‌ ಸಮುದ್ರದ ಮಧ್ಯೆ ಈ ಕುಳಿಯಿದ್ದು, ಇದರ ಗಾತ್ರ ದಿನೇ ದಿನೇ ಹೆಚ್ಚಳವಾಗುತ್ತಿದೆ. ಇದು ಮುಂಬರುವ ವರ್ಷಗಳಲ್ಲಿ ಎರಡು ಹೋಳಾಗುವ ಕಾರಣ ಬಾಹ್ಯಾಕಾಶದಲ್ಲಿ ಇರುವ ಉಪಗ್ರಹಗಳ ಮೇಲೆ ಪರಿಣಾಮ ಬೀರಲಿದೆ ಎಂದು ಕಳವಳ ವ್ಯಕ್ತಪಡಿಸಿದೆ.

ಈ ಕುಳಿ ಹೋಳಾದ ಸಂದರ್ಭದಲ್ಲಿ ಎರಡು ದುರ್ಬಲ ಮ್ಯಾಗ್ನೆಟಿಕ್‌ ಫೀಲ್ಡ್ ಆಗಲಿದ್ದು, ಇದು ಉಪಗ್ರಹಗಳ ಕಾರ್ಯಾಚರಣೆ ಮೇಲೆ ಪರಿಣಾಮ ಬೀರಲಿದೆ. ಹೀಗಾಗಿ ಬಾಹ್ಯಾಕಾಶದಿಂದ ಭೂಮಿಯಲ್ಲಿನ ಮಹತ್ವದ ಸಂಗತಿಗಳ ಕುರಿತು ಮಾಹಿತಿ ನೀಡುತ್ತಿರುವ ಉಪಗ್ರಹಗಳ ಕಾರ್ಯಕ್ಕೆ ಅಡಚಣೆಯಾಗಲಿದೆ ಎನ್ನಲಾಗಿದೆ.‌

ಕಳೆದ 200 ವರ್ಷಗಳಲ್ಲಿ ಈ ಕುಳಿ ಶೇ.9 ರಷ್ಟು ದುರ್ಬಲವಾಗಿದ್ದು, ಆದರೆ 1971 ರಿಂದಿಚೇಗೆ ಇದು ವೇಗ ಪಡೆದುಕೊಂಡಿದೆ ಎನ್ನಲಾಗಿದೆ. ಈ ಅವಧಿಯಲ್ಲಿ ಕುಳಿಯ ವಿಸ್ತಾರ ಶೇ.8 ರಷ್ಟು ಹಿಗ್ಗಿದೆ ಎನ್ನಲಾಗಿದೆ. ನಾಸಾ ವಿಜ್ಞಾನಿಗಳು ಈ ಬೆಳವಣಿಗೆಯನ್ನು ನಿಕಟವಾಗಿ ಗಮನಿಸುತ್ತಿದ್ದು, ESA ವಿಜ್ಞಾನಿಗಳು ಸಹ ಇದೇ ಕಾರ್ಯದಲ್ಲಿ ತೊಡಗಿದ್ದಾರೆ.