ಲಾಕ್ ​ಡೌನ್​ ಜಾರಿಗೂ ಮುನ್ನ ಭಾರೀ ಟ್ರಾಫಿಕ್‌ ಜಾಮ್

ಯುರೋಪ್​ ರಾಷ್ಟ್ರಗಳಲ್ಲಿ ಎರಡನೇ ಹಂತದ ಕರೊನಾ ಅಲೆ ಶುರುವಾಗಿರೋದ್ರಿಂದ ಮುನ್ನೆಚ್ಚರಿಕಾ ಕ್ರಮವಾಗಿ ಫ್ರಾನ್ಸ್ ಅಧ್ಯಕ್ಷ ಇಮ್ಯಾನುವಲ್​ ಮ್ಯಾಕ್ರನ್ ಗುರುವಾರ ರಾತ್ರಿಯಿಂದ​ ಡಿಸೆಂಬರ್​ 1ರವರೆಗೆ ದೇಶದಲ್ಲಿ ಲಾಕ್​ಡೌನ್​ ಜಾರಿ ಮಾಡಿದ್ದಾರೆ.

ಲಾಕ್​ಡೌನ್​ ಆದೇಶ ಇನ್ನೇನು ಶುರುವಾಗಲಿದೆ ಎಂಬ ಕೆಲವೇ ಗಂಟೆಗಳ ಮೊದಲು ಪ್ಯಾರಿಸ್​ನಲ್ಲಿ ಹಿಂದೆಂದೂ ಕಂಡುಕೇಳರಿಯದ ರೀತಿಯಲ್ಲಿ ಸಂಚಾರ ದಟ್ಟಣೆ ಉಂಟಾಗಿದೆ. ಲಾಕ್​ಡೌನ್​ ಆದೇಶದಿಂದಾಗಿ ಸ್ವಂತ ಊರಿಗೆ ಹೊರಟ ಜನರಿಂದಾಗಿ ಬರೋಬ್ಬರಿ 700 ಕಿಲೋಮೀಟರ್​ವರೆಗೆ ಟ್ರಾಫಿಕ್​ ಜಾಮ್​ ಉಂಟಾಗಿತ್ತು ಅಂತಾ ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ.

ಎರಡನೇ ಹಂತದ ಕರೊನಾ ವೈರಸ್​ನಿಂದ ತಪ್ಪಿಸಿಕೊಳ್ಳುವ ಸಲುವಾಗಿ ಜನರಿಗೆ ಮನೆಯಲ್ಲೇ ಇರಲು ಆದೇಶ ನೀಡಿದ ಹಿನ್ನೆಲೆ ಜನರು ಸ್ವಂತ ಊರಿಗೆ ಪ್ರಯಾಣ ಬೆಳೆಸಿದ್ದಾರೆ ಎನ್ನಲಾಗಿದೆ. ಫ್ರಾನ್ಸ್​ನಲ್ಲಿ ಕರೊನಾ ಸಾವುಗಳು ದಿನದಿಂದ ದಿನಕ್ಕೆ ಏರಿಕೆ ಕಾಣುತ್ತಲೇ ಇದೆ. ಗುರುವಾರ 47,637 ಹೊಸ ಸೋಂಕು ದಾಖಲಾಗೋದ್ರ ಜೊತೆಗೆ 250 ಮಂದಿಯ ಮರಣವಾಗಿದೆ.