ಶೂಟಿಂಗ್ ಪೂರ್ಣಗೊಳ್ಳುವ ಮೊದಲೇ, ವಿಕ್ಕಿ ಕೌಶಲ್ ಮತ್ತು ಸಾರಾ ಅಲಿ ಖಾನ್ ಅಭಿನಯದ ಲುಕ್ಕಾ ಚುಪ್ಪಿ 2 ಪೊಲೀಸ್ ಠಾಣೆಗೆ ತಲುಪಿದೆ. ಇಂದೋರ್ ನ ನಿವಾಸಿಯೊಬ್ಬರು ಈ ಚಿತ್ರದ ದೃಶ್ಯದಲ್ಲಿ ಬಳಸಲಾದ ಮೋಟಾರು ಬೈಕಿನಲ್ಲಿ ತನ್ನ ವಾಹನದ ನಂಬರ್ ಬಳಕೆಯಾಗಿದೆ, ಇದು ಅಕ್ರಮ ಎಂದು ಆರೋಪಿಸಿ ಪೊಲೀಸ್ ದೂರು ದಾಖಲಿಸಿದ್ದಾರೆ.
ಇತ್ತೀಚೆಗೆ ಬಿಡುಗಡೆಯಾದ ದೃಶ್ಯದಲ್ಲಿ, ವಿಕ್ಕಿ ಕೌಶಲ್ ತನ್ನ ಹಿಂದೆ ಸಾರಾ ಅಲಿ ಖಾನ್‌ನೊಂದಿಗೆ ಮೋಟಾರ್‌ಸೈಕಲ್ ಓಡಿಸುತ್ತಿರುವುದನ್ನು ಕಾಣಬಹುದು. ಆ ಮೋಟಾರ್ ಸೈಕಲ್ ನ ನಂಬರ್ ಪ್ಲೇಟ್ ನಕಲಿ ಎಂದು ದೂರುದಾರ ಜೈ ಸಿಂಗ್ ಯಾದವ್ ಹೇಳಿದ್ದಾರೆ. ಈ ಸುದ್ದಿ ಆ ಚಿತ್ರದ ತಯಾರಕರಿಗೆ ತಿಳಿದ ನಂತರ ಈ ಬಗ್ಗೆ ಚಿತ್ರತಂಡ ಕ್ರಮ ತೆಗೆದುಕೊಳ್ಳಲಿ ಎಂಬುದು ಜೈಸಿಂಗ್ ರವರ ಬಯಕೆ.
ಸಿನಿಮಾ ಸೀಕ್ವೆನ್ಸ್‌ನಲ್ಲಿ ಬಳಸಿರುವ ವಾಹನ ಸಂಖ್ಯೆ ನನ್ನದು. ಚಿತ್ರತಂಡಕ್ಕೆ ಇದರ ಅರಿವಿದೆಯೇ ಎಂದು ನನಗೆ ಗೊತ್ತಿಲ್ಲ. ಇದು ಕಾನೂನು ಬಾಹಿರ, ಅನುಮತಿಯಿಲ್ಲದೆ ನನ್ನ ನಂಬರ್ ಪ್ಲೇಟ್ ಬಳಸುವಂತಿಲ್ಲ. ಪೊಲೀಸ್ ಠಾಣೆಯಲ್ಲಿ ಈ ಬಗ್ಗೆ ದೂರು ನೀಡಿದ್ದೇನೆ. ಈ ಬಗ್ಗೆ ಕ್ರಮ ಕೈಗೊಳ್ಳಬೇಕು’ ಎಂದು ಯಾದವ್ ಹೇಳಿದ್ದಾರೆ.
ಪೊಲೀಸರು ಈ ದೂರನ್ನು ಸ್ವೀಕರಿಸಿದ್ದು, ಮೋಟಾರು ವಾಹನ ಕಾಯ್ದೆಯಡಿ ಪ್ರಕರಣವನ್ನು ತನಿಖೆ ನಡೆಸಲಾಗುವುದು ಎಂದು ಇಂದೋರ್‌ನ ಬಂಗಂಗಾ ಪ್ರದೇಶದ ಸಬ್ ಇನ್ಸ್‌ಪೆಕ್ಟರ್ ರಾಜೇಂದ್ರ ಸೋನಿ ಖಚಿತಪಡಿಸಿದ್ದಾರೆ. ನಮಗೆ ದೂರು ಬಂದಿದೆ, ನಂಬರ್ ಪ್ಲೇಟ್ ದುರ್ಬಳಕೆಯಾಗಿದೆಯೇ ಎಂಬುದನ್ನು ಪರಿಶೀಲಿಸುತ್ತೇವೆ. ಮೋಟಾರು ವಾಹನ ಕಾಯ್ದೆಯಲ್ಲಿನ ನಿಬಂಧನೆಗಳ ಪ್ರಕಾರ ಕ್ರಮ ಕೈಗೊಳ್ಳಬೇಕು. ಚಿತ್ರ ಘಟಕ ಇಂದೋರ್‌ನಲ್ಲಿದ್ದರೆ, ಅವರನ್ನು ತನಿಖೆ ಮಾಡಲು ಪ್ರಯತ್ನಿಸುತ್ತೇವೆ ಎಂದು ಸೋನಿ ಹೇಳಿದ್ದಾರೆ.
ಲುಕ್ಕಾಚುಪ್ಪಿ 2 ಕಾರ್ತಿಕ್ ಆರ್ಯನ್ ಮತ್ತು ಕೃತಿ ಸನೋನ್ ಅಭಿನಯದ 2019 ರ ರೊಮ್ಯಾಂಟಿಕ್-ಕಾಮಿಡಿ ಲುಕ್ಕಾಚುಪ್ಪಿಯ ಸೀಕ್ವೆಲ್ ಆಗಿದೆ. ಚಿತ್ರದ ಎರಡನೇ ಅವತರಣಿಕೆಯಲ್ಲಿ ವಿಕ್ಕಿ ಮತ್ತು ಸಾರಾ ಜೋಡಿಯಾಗಿ ಬರಲಿದ್ದಾರೆ. ಇಬ್ಬರೂ ಇತ್ತೀಚೆಗೆ ಮಧ್ಯ ಪ್ರದೇಶದ ಇಂದೋರ್‌ನಲ್ಲಿ ಚಿತ್ರದ ಚಿತ್ರೀಕರಣವನ್ನು ಪ್ರಾರಂಭಿಸಿದರು. ಕೆಲವು ದಿನಗಳ ಹಿಂದೆ, ಇಬ್ಬರು ಬೈಕ್‌ನಲ್ಲಿ ಸವಾರಿ ಮಾಡುತ್ತಿರುವ ವಿಡಿಯೋವೊಂದು ಹೊರಬಂದಿತ್ತು. ವಿಡಿಯೋದಲ್ಲಿ, ವಿಕ್ಕಿ ಹಸಿರು ಟೀ ಶರ್ಟ್‌ನಲ್ಲಿ ಬೈಕ್ ಓಡಿಸುತ್ತಿದ್ದರೆ, ಸಾರಾ ಹಳದಿ ಸೀರೆಯಲ್ಲಿ ಹಿಂದೆ ಕುಳಿತಿದ್ದಾರೆ.
Loading ...