ಬಂಧನವಾಗುತ್ತಿದ್ದಂತೆ ಪತ್ನಿ ಮೇಲೆ ತಪ್ಪು ಹೊರೆಸಿದ ಪತಿ

ವೀಕೆಂಡ್​ ಕರ್ಫ್ಯೂ ನಿಯಮ ಉಲ್ಲಂಘಿಸಿದ್ದು ಹಾಗೂ ಕಾರಿನೊಳಗೆ ಇದ್ದ ವೇಳೆ ಈ ದಂಪತಿ ಮಾಸ್ಕ್​ ಧರಿಸಿಲ್ಲ ಎಂಬ ಕಾರಣಕ್ಕೆ ಪೊಲೀಸರು ಇವರನ್ನ ತಡೆದಿದ್ದರು. ಈ ಘಟನೆ ದರ್ಯಾಗಂಜ್​​​ ಏರಿಯಾದಲ್ಲಿ ಭಾನುವಾರ ನಡೆದಿತ್ತು.

ಒಂದು ಹಂತದಲ್ಲಿ ಮಹಿಳೆ ನಾನು ನನ್ನ ಗಂಡನಿಗೆ ಕಿಸ್​ ಮಾಡ್ತೇನೆ. ಇದನ್ನ ತಪ್ಪಿಸೋಕೆ ನಿಮ್ಮಿಂದ ಸಾಧ್ಯವಿದೆಯೇ..? ಎಂದು ಪೊಲೀಸರಿಗೆ ಪ್ರಶ್ನೆ ಮಾಡಿದ್ದಳು.

ಈ ವಿಡಿಯೋದಲ್ಲಿದ್ದ ಪುರುಷ ಇದೀಗ ತನ್ನ ಹೇಳಿಕೆಯನ್ನ ಬದಲಾಯಿಸಿದ್ದು ಎಲ್ಲಾ ಘಟನೆಗೆ ಸಂಪೂರ್ಣ ತನ್ನ ಪತ್ನಿಯನ್ನ ಹೊಣೆಗಾರಳನ್ನಾಗಿ ಮಾಡಿದ್ದಾನೆ.

ಏಪ್ರಿಲ್​ ತಿಂಗಳ ಮೊದಲ ವಾರದಲ್ಲೇ ದೆಹಲಿ ಹೈಕೋರ್ಟ್ ಕಾರಿನಲ್ಲಿ ಒಬ್ಬರೇ ಇದ್ದರೂ ಸಹ ಫೇಸ್​ ಮಾಸ್ಕ್​ಗಳ ಬಳಕೆ ಕಡ್ಡಾಯ ಎಂದು ಹೇಳಿತ್ತು. ಆದರೆ ಈ ದಂಪತಿ ಮಾತ್ರ ಮಾಸ್ಕ್​ ಬಳಕೆ ಮಾಡೋದಕ್ಕೆ ಸುತಾರಾಂ ನಿರಾಕರಿಸಿದ್ದರು. ಈ ಘಟನೆ ಬಳಿಕ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಪಂಕಜ್​ ಗುಪ್ತಾ ಹಾಗೂ ಆಭಾ ಗುಪ್ತಾರನ್ನ ಬಂಧಿಸಿದ್ದು ಇಂದು ಕೋರ್ಟ್​ಗೆ ಹಾಜರುಪಡಿಸೋ ಸಾಧ್ಯತೆ ಇದೆ.

ಇದೀಗ ವರದಿಗಾರರ ಪ್ರಶ್ನೆಗೆ ಉತ್ತರ ನೀಡಿರುವ ಪಂಕಜ್​ ಈ ಎಲ್ಲಾ ಗಲಾಟೆಗೆ ತನ್ನ ಪತ್ನಿಯೇ ಕಾರಣ ಎಂದು ದೂರಿದ್ದಾನೆ. ತನ್ನ ಪತ್ನಿ ನನಗೆ ಈ ರೀತಿ ಗಲಾಟೆ ಮಾಡಲು ಪ್ರೇರಣೆ ನೀಡಿದ್ದಾಳೆ. ಇದು ಆಕೆಯ ತಪ್ಪು ಎಂದು ಹೇಳಿದ್ದಾರೆ. ಮಾತ್ರವಲ್ಲದೇ ನನಗೆ ಮಾಸ್ಕ್​ ಹಾಕಿಕೊಳ್ಳಬೇಕು ಎಂಬ ಪ್ರಜ್ಞೆ ಇದ್ದರೂ ಸಹ ನನ್ನ ಪತ್ನಿ ಇದಕ್ಕೆ ಅನುಮತಿ ನೀಡಲಿಲ್ಲ ಎಂದು ಹೇಳಿದ್ದಾನೆ.