ಹಾವಿನ ಮುಖಕ್ಕೆ ಬಳಸಿದ ಕಾಂಡೋಮ್​ ಕಟ್ಟಿ ವಿಕೃತಿ..!

ಬಳಸಿದ ಕಾಂಡೋಮ್​ನ್ನು ಹಾವಿನ ಮುಖಕ್ಕೆ ಕಟ್ಟಿ ವಿಕೃತಿ ಮೆರೆದ ಘಟನೆ ಮುಂಬೈನಲ್ಲಿ ನಡೆದಿದೆ. ಕಾಂಡೋಮ್​ನ್ನು ಮುಖಕ್ಕೆ ಕಟ್ಟಿದ್ದರಿಂದ ಹಾವು ಅಸ್ವಸ್ಥಗೊಂಡಿದೆ ಎನ್ನಲಾಗಿದೆ.

ಜನವರಿ 2ನೇ ತಾರೀಖಿನಂದು ಮುಂಬೈನ ಖಾಂಡಿವಲಿ ಪೂರ್ವ ಪ್ರದೇಶದ ಗ್ರೀನ್​ ಮೆಡೋಸ್​ ಹೌಸಿಂಗ್​ ಸೊಸೈಟಿ ಬಳಿ ಈ ಅಮಾನವೀಯ ಘಟನೆ ನಡೆದಿದೆ. ಬೆಳಗ್ಗೆ 8.30ರ ಸುಮಾರಿಗೆ ಈ ಹಾವನ್ನ ಗಮನಿಸಿದ ವ್ಯಕ್ತಿಯೊಬ್ಬರು ಹಾವು ರಕ್ಷಕರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ.

ಸ್ಥಳೀಯ ನಿವಾಸಿ ವೈಶಾಲಿ ತನ್ಹಾ ನೀಡಿದ ಮಾಹಿತಿ ಆಧರಿಸಿ ಸ್ಥಳಕ್ಕಾಗಮಿಸಿದ ಮಿತಾ ಮಾಲ್ವಂಕರ್​, ಹಾವಿನ ಮುಖಕ್ಕೆ ಪ್ಲಾಸ್ಟಿಕ್​ ಚೀಲ ಕಟ್ಟಿರೋದನ್ನ ಗಮನಿಸಿದರು. ಹಾವಿನ ಬಳಿಗೆ ಹೋಗುತ್ತಿದ್ದಂತೆಯೇ ಅದು ಬಳಸಿದ ಕಾಂಡೋಮ್​ ಎಂಬ ವಿಚಾರ ಬೆಳಕಿಗೆ ಬಂದಿದೆ.

ಎರಡೂವರೆ ಮೀಟರ್​ ಉದ್ದದ ಹಾವಿನ ಮುಖಕ್ಕೆ ಕಟ್ಟಲಾದ ಕಾಂಡೋಮ್​ ತೆಗೆದ ಬಳಿಕ ಅದನ್ನ ಮುಂಬೈನ ಬೊರಿವಿಲಿಯ ಸಂಜಯ್​ ಗಾಂಧಿ ರಾಷ್ಟ್ರೀಯ ಉದ್ಯಾನವನಕ್ಕೆ ಕರೆದೊಯ್ಯಲಾಗಿದೆ. ಪಶು ವೈದ್ಯಾಧಿಕಾರಿಗಳು ಹಾವಿನ ಆರೋಗ್ಯ ತಪಾಸಣೆ ನಡೆಸಿದ್ದು ಹಾವು ಒತ್ತಡದಿಂದ ಬಳಲಿದೆ ಎಂದು ಹೇಳಿದ್ದಾರೆ. ಹಾವಿಗೆ ಸೂಕ್ತ ಚಿಕಿತ್ಸೆ ನೀಡಿ ಕಾಡಿಗೆ ಸುರಕ್ಷಿತವಾಗಿ ಬಿಡಲಾಗಿದೆ. ಅಲ್ಲದೇ ಈ ಕೃತ್ಯ ಎಸಗಿದವರ ವಿರುದ್ಧ ಪ್ರಕರಣ ದಾಖಲಾಗಿದೆ.