ವಿವಾಹಿತ ತಂಗಿ ಮೇಲೆಯೇ ಅತ್ಯಾಚಾರವೆಸಗಿ ವಿಡಿಯೋ ಮಾಡಿದ ಪಾಪಿ ಅಣ್ಣ..!

ಪಾಪಿ ಸಹೋದರನೊಬ್ಬ ತನ್ನ ವಿವಾಹಿತ ತಂಗಿಯ ಮೇಲೆಯೇ ಅತ್ಯಾಚಾರವೆಸೆಗಿದ ಅಮಾನವೀಯ ಘಟನೆ ಉತ್ತರ ಪ್ರದೇಶದ ಮೊರಾದಾಬಾದ್​ನಲ್ಲಿ ನಡೆದಿದೆ. ಆರೋಪಿ ಅತ್ಯಾಚಾರ ನಡೆಸುತ್ತಿದ್ದ ವೇಳೆ ಆತನ ಸ್ನೇಹಿತ ವಿಡಿಯೋ ಚಿತ್ರೀಕರಿಸಿದ್ದಾನೆ ಎಂದು ಸಂತ್ರಸ್ತೆ ಆರೋಪಿಸಿದ್ದಾಳೆ.

ನನ್ನ ಪತಿ ಮನೆಯಲ್ಲಿ ಇಲ್ಲದೇ ಇದ್ದ ವೇಳೆ ಮನೆಗೆ ಪಾನಮತ್ತನಾಗಿ ಬಂದಿದ್ದ ನನ್ನ ಅಣ್ಣ ಮತ್ತಾತನ ಸ್ನೇಹಿತ ಈ ಕೃತ್ಯ ಎಸಗಿದ್ದಾರೆ. ಯಾರಿಗಾದರೂ ಈ ಬಗ್ಗೆ ಬಾಯ್ಬಿಟ್ಟಿದ್ದೇ ಹೌದಾದರೆ ವಿಡಿಯೋವನ್ನ ಸೋಶಿಯಲ್​ ಮೀಡಿಯಾದಲ್ಲಿ ಅಪ್​ಲೋಡ್​ ಮಾಡೋದಾಗಿ ನನಗೆ ಬೆದರಿಕೆ ಒಡ್ಡಿದ್ದರು ಎಂದು ಮಹಿಳೆ ದೂರಿನಲ್ಲಿ ಉಲ್ಲೇಖಿಸಿದ್ದಾರೆ.

ದೂರಿನಲ್ಲಿ ಸಂತ್ರಸ್ತೆ, ನಾನು ಘಟನೆ ನಡೆದ ಬಳಿಕ ಈ ಬಗ್ಗೆ ನನ್ನ ಪತಿಗೆ ಮಾಹಿತಿ ನೀಡಿದ್ದೆ. ಅವರು ಕೂಡಲೇ ಪೊಲೀಸರನ್ನ ಭೇಟಿಯಾಗುವವರಿದ್ದರು. ಆದರೆ ಕುಟುಂಬದ ಮರ್ಯಾದೆಗೋಸ್ಕರ ನನ್ನ ಪೋಷಕರು ದೂರನ್ನ ನೀಡದಂತೆ ನನಗೆ ಒತ್ತಡ ಹೇರಿದ್ದರು. ಆದರೆ ಸಹೋದರನ ಕಿರುಕುಳ ಹಾಗೂ ಬೆದರಿಕೆ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿರುವ ಕಾರಣ ನಾನು ಈ ದೂರನ್ನ ನೀಡಿದ್ದೇನೆ ಎಂದು ಬರೆಯಲಾಗಿದೆ.

ಸಂತ್ರಸ್ತೆಯ ಸಹೋದರನ ವಿರುದ್ಧ ಐಪಿಸಿ ಸೆಕ್ಷನ್​ 376, 452 ಹಾಗೂ 506ನಡಿ ಪ್ರಕರಣ ದಾಖಲಾಗಿದೆ. ಮತ್ತು ಘಟನೆ ವೇಳೆ ವಿಡಿಯೋ ಚಿತ್ರೀಕರಣ ಮಾಡುತ್ತಿದ್ದ ಸ್ನೇಹಿತನ ವಿರುದ್ಧವೂ ಎಫ್ಐಆರ್​ ದಾಖಲಾಗಿದೆ. ಆರೋಪಿಗಳಿಬ್ಬರೂ ಪರಾರಿಯಾಗಿದ್ದು ಪೊಲೀಸರು ಶೋಧ ಕಾರ್ಯ ಮುಂದುವರಿಸಿದ್ದಾರೆ.