ಪಶ್ಚಿಮ ಬಂಗಾಳದಲ್ಲಿ ವಿಧಾನಸಭಾ ಚುನಾವಣಾ ಕಾವು ರಂಗೇರಿದೆ. ಈ ನಡುವೆ ಪಶ್ಚಿಮ ಬಂಗಾಳ ಸಿಎಂ ಮಮತಾ ಬ್ಯಾನರ್ಜಿ ಚುನಾವಣಾ ತಂತ್ರಜ್ಞ ಪ್ರಶಾಂತ್ ಕಿಶೋರ್ರ ಆಡಿಯೋ ಕ್ಲಿಪ್ ಒಂದನ್ನ ಬಿಜೆಪಿಗರು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಮಾಡಿದ್ದಾರೆ. ಕ್ಲಬ್ ಹೌಸ್ ಚಾಟ್ನಲ್ಲಿ ಸ್ವತಃ ಪ್ರಶಾಂತ್ ಕಿಶೋರ್ ಬಂಗಾಳದಲ್ಲಿ ಮಮತಾರಷ್ಟೇ ಪ್ರಧಾನಿ ಮೋದಿ ಕೂಡ ಪ್ರಖ್ಯಾತಿ ಗಳಿಸಿದ್ದಾರೆ ಎಂದು ಹೇಳಿದ್ದಾರೆ. ಈ ಆಡಿಯೋ ಕ್ಲಿಪ್ನ್ನು ಬಿಜೆಪಿ ಅಮಿತ್ ಮಾಲ್ವಿಯಾ ಟ್ವಿಟರ್ನಲ್ಲಿ ಶೇರ್ ಮಾಡಿದ್ದಾರೆ.
ಪತ್ರಕರ್ತರೊಂದಿಗೆ ಪ್ರಶಾಂತ್ ಕಿಶೋರ್ ನಡೆಸಿದ ಚಾಟ್ನಲ್ಲಿ ಮಮತಾ ಬ್ಯಾನರ್ಜಿ ಸರ್ಕಾರದ ವಿರುದ್ಧದ ಆಕ್ರೋಶ, ರಾಜಕೀಯ ಧೃವೀಕರಣ ಹಾಗೂ ದಲಿತ ಮತಗಳು ಈ ಚುನಾವಣೆಯಲ್ಲಿ ಬಿಜೆಪಿ ಪರ ಕೆಲಸ ಮಾಡುವ ಮೂರು ಅಂಶಗಳಾಗಿವೆ ಎಂದು ಹೇಳಿದ್ದಾರೆ.
ಟಿಎಂಸಿ ಪಕ್ಷವನ್ನ ಈಗಷ್ಟೇ ಚುನಾವಣೆಯಿಂದ ಹೊರಗೆಸೆಯಲಾಗಿದೆ ಎಂದು ಬಿಜೆಪಿ ಸಾಮಾಜಿಕ ಜಾಲತಾಣ ನಿರ್ವಾಹಕ ಅಮಿತ್ ಮಾಲ್ವಿಯಾ ಟ್ವೀಟಾಯಿಸಿದ್ದಾರೆ.
ಇನ್ನು ಈ ಆಡಿಯೋ ಕ್ಲಿಪ್ ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ವೈರಲ್ ಆಗುತ್ತಿದ್ದಂತೆಯೇ ಪ್ರಶಾಂತ್ ಕಿಶೋರ್ ಟ್ವೀಟ್ ಮೂಲಕ ಪ್ರತಿಕ್ರಿಯೆ ನೀಡಿದ್ದು. ಬಿಜೆಪಿಗರು ನನ್ನ ಮಾತುಗಳನ್ನ ಅವರ ನಾಯಕರ ಮಾತುಗಳಿಗಿಂತ ಹೆಚ್ಚು ಗಂಭೀರವಾಗಿ ಪರಿಗಣಿಸಿದ್ದಕ್ಕೆ ನನಗೆ ಖುಷಿಯಾಗಿದೆ. ಕೇವಲ ಆಯ್ದ ಭಾಗಗಳನ್ನ ವಿಕೃತವಾಗಿ ಬಳಕೆ ಮಾಡೋದ್ರ ಬದಲು ಪೂರ್ಣ ಸಂಭಾಷಣೆಯನ್ನ ಬಿಡುಗಡೆ ಮಾಡಬೇಕು ಎಂದು ಒತ್ತಾಯಿಸಿದ್ದಾರೆ. ಆಯ್ದ ಭಾಗಗಳನ್ನ ವೈರಲ್ ಮಾಡುವ ನೀವು ಕ್ಲಬ್ ಹೌಸ್ ಜೊತೆಗಿನ ಪೂರ್ಣ ಸಂಭಾಷಣೆಯನ್ನೂ ಹಂಚಿಕೊಳ್ಳುವ ಧೈರ್ಯ ತೋರಿ ಎಂದು ಹೇಳಿದ್ದಾರೆ.
ಮಾಲ್ವಿಯಾ ಶೇರ್ ಮಾಡಿರುವ ಆಡಿಯೋ ತುಣುಕಿನಲ್ಲಿ, ಬಿಜೆಪಿಗೆ ಮೋದಿ ಹಾಗೂ ಹಿಂದೂ ಹೆಸರಿನಲ್ಲಿ ಮತಗಳು ಬೀಳುತ್ತವೆ. ರಾಜಕೀಯ ಧೃವೀಕರಣ, ದಲಿತ ಜನಾಂಗ, ಹಿಂದಿ ಮಾತನಾಡುವವರು ಇವೆಲ್ಲ ಬಿಜೆಪಿ ಗೆ ಲಾಭ ತರುವ ಅಂಶಗಳು. ಮೋದಿ ಈ ಭಾಗದಲ್ಲಿ ಹೆಚ್ಚು ಪ್ರಚಲಿತರಾಗಿದ್ದಾರೆ. ಇಲ್ಲಿ ಹಿಂದಿ ಮಾತನಾಡುವ ಒಂದು ಕೋಟಿಗೂ ಹೆಚ್ಚು ಜನರಿದ್ದಾರೆ. ದಲಿತರು 27 ಪ್ರತಿಶತ ಇದ್ದು ಅವರು ಸಂಪೂರ್ಣ ಬಿಜೆಪಿ ಪರ ನಿಲ್ತಾರೆ. ಧೃವೀಕರಣ ಖಂಡಿತವಾಗಿಯೂ ಇರುತ್ತದೆ ಎಂದು ಕಿಶೋರ್ ಹೇಳಿದ್ದಾರೆ.
Loading ...