ವೈದ್ಯರ ಸೂಚನೆಯಂತೆ ಹೋಮ್​ ಐಸೋಲೇಷನ್​ನಲ್ಲಿದ್ದ ವ್ಯಕ್ತಿ ಸೋಂಕಿನಿಂದ ಸಾವು…!

ಕಳೆದ 10 ದಿನಗಳಿಂದ ಹೋಮ್​ ಐಸೋಲೇಷನ್​​ನಲ್ಲಿದ್ದ 45 ವರ್ಷದ ವ್ಯಕ್ತಿಯ ಸ್ಥಿತಿ ಕಳೆದ 2 ದಿನಗಳಿಂದ ಗಂಭೀರವಾಗಿದ್ದು ಆತ ಸಾವನ್ನಪ್ಪಿದ ಘಟನೆ ಪುಣೆಯಲ್ಲಿ ನಡೆದಿದೆ.

ಪಿಂಪ್ರಿ ಚಿಂಚ್ವಾಡ್​​ದ ಕಸರವಾಡಿ ಏರಿಯಾದ ಉದ್ಯಮಿ ಶ್ರೀಕಂತ್​​ ಗಾಯಕ್​ವಾಡ ಏಪ್ರಿಲ್​ 6ನೇ ತಾರೀಖಿನಿಂದ ಜ್ವರ ಹಾಗೂ ಮೈ ಕೈ ನೋವಿನಿಂದ ಬಳಲುತ್ತಿದ್ದರು. ಖಾಸಗಿ ಪ್ರಯೋಗಾಲಯದಲ್ಲಿ ಕೊರೊನಾ ಪರೀಕ್ಷೆಗೆ ಒಳಗಾದ ಶ್ರೀಕಾಂತ್​ಗೆ ನೆಗೆಟಿವ್​ ರಿಪೋರ್ಟ್ ದೊರಕಿತ್ತು. ಇದಾದ ಬಳಿಕ ಏಪ್ರಿಲ್​ 10ರಂದು ಶ್ರೀಕಾಂತ್​ ದೇಹದ ಸ್ಥಿತಿ ಸುಧಾರಿಸಿದ ಕಾರಣ ಮತ್ತೊಮ್ಮೆ ಕೊರೊನಾ ಪರೀಕ್ಷೆಗೆ ಒಳಗಾಗಿದ್ದರು.

ಎರಡನೇ ಪರೀಕ್ಷೆ ವೇಳೆ ಶ್ರೀಕಾಂತ್​ ಸೋಂಕಿಗೆ ಒಳಗಾಗಿದ್ದಾರೆ ಎಂಬ ಮಾಹಿತಿ ಬಯಲಾಗಿದೆ. ಆದರೆ ಆಸ್ಪತ್ರೆ ವೈದ್ಯರು ಶ್ರೀಕಾಂತ್​ರನ್ನ ತಪಾಸಣೆ ಮಾಡಿಲ್ಲ. ಬದಲಾಗಿ ಹೋಮ್​ ಐಸೋಲೇಷನ್​ ಅರ್ಜಿಯನ್ನ ತುಂಬುವಂತೆ ಹೇಳಿದ್ದಾರೆ. ಅಲ್ಲದೇ 10 ದಿನಗಳ ಕಾಲ ಐಸೋಲೇಷನ್​ನಲ್ಲಿ ಇರಿ ಎಂದು ಸೂಚನೆ ನೀಡಿದ್ದರು ಎಂದು ಮೃತ ಶ್ರೀಕಾಂತ್​ ಆಪ್ತ ಅವಿನಾಶ್​ ಪ್ರಸಾದ್​ ಹೇಳಿದ್ದಾರೆ.

ಏಪ್ರಿಲ್​ 13ನೇ ತಾರೀಖಿನಂದು ಶ್ರೀಕಾಂತ್​ಗೆ ವಾಂತಿ ಶುರುವಾಗಿದೆ. ಕೂಡಲೇ ಅವರನ್ನ ಖಾಸಗಿ ಆಸ್ಪತ್ರೆಗೆ ದಾಖಲು ಮಾಡಲಾಯ್ತು. ಆದರೆ ಐದು ದಿನಗಳ ಕಾಲ ಹೋರಾಟ ನಡೆಸಿದ ಶ್ರೀಕಾಂತ್​ ಚಿಕಿತ್ಸೆ ಫಲಕಾರಿಯಾಗದೇ ಸಾವನ್ನಪ್ಪಿದ್ರು.

ಇನ್ನು ಈ ವಿಚಾರವಾಗಿ ಮಾತನಾಡಿದ ಮೃತ ಶ್ರೀಕಾಂತ್​ ತಮ್ಮ ಶ್ರೀಧರ್, ಏಪ್ರಿಲ್​ 10ನೇ ತಾರೀಖು ನನ್ನ ಸಹೋದರ ವೈಸಿಎಂ ಆಸ್ಪತ್ರೆಗೆ ತೆರಳಿದ್ದರು. ಆದರೆ ಅಲ್ಲಿ ಹೋಂ ಕ್ವಾರಂಟೈನ್​ನಲ್ಲಿ ಇರಿ ಎಂದು ಸೂಚನೆ ನೀಡಿದ್ರು. ಮನೆಯಲ್ಲೇ ಇದ್ದ ಶ್ರೀಕಾಂತ್​ ದೇಹದಲ್ಲಿ ಆಮ್ಲಜನಕ ಕೊರತೆ ಉಂಟಾಗಿದೆ ಹಾಗೂ ಬಿಳಿ ರಕ್ತಕಣಗಳ ಸಂಖ್ಯೆಯೂ ಕಡಿಮೆಯಾಗಿದೆ ಎಂದು ಹೇಳಿದ್ರು.

ಶ್ರೀಕಾಂತ್​ಗೆ ರೆಮಿಡಿಸಿವರ್​ ಚುಚ್ಚುಮದ್ದು ಹಾಗೂ ಪ್ಲಾಸ್ಮಾ ಥೆರಪಿಗಳನ್ನ ಮಾಡಲಾಯ್ತು. ಇದಾದ ಬಳಿಕ ಶ್ರೀಕಾಂತ್​ ಕೊಂಚ ಸುಧಾರಿಸಿಕೊಳ್ಳಲು ಆರಂಭಿಸಿದ್ದರು. ಆದರೆ ಕೆಲವೇ ದಿನಗಳಲ್ಲಿ ಅವರ ಆರೋಗ್ಯ ಮತ್ತೆ ಕುಸಿಯಲು ಆರಂಭಿಸಿತು. ಹಾಗೂ ನನ್ನ ಸಹೋದರ ಮೃತಪಟ್ಟರು ಎಂದು ಶ್ರೀಧರ್​ ಹೇಳಿದ್ರು.

ಇನ್ನೂ ಈ ವಿಚಾರವಾಗಿ ಮಾತನಾಡಿರುವ ವೈಸಿಎಂಹೆಚ್​ ಆಸ್ಪತ್ರೆ ವೈದ್ಯ ಡಾ. ರಾಜೇಂದ್ರ, ರೋಗಿಯ ಲಕ್ಷಣಗಳನ್ನ ಆಧರಿಸಿದ ವೈದ್ಯರು ಹೋಂ ಐಸೋಲೇಷನ್​ಗೆ ಸೂಚನೆಯನ್ನ ನೀಡುತ್ತಾರೆ. ಸೌಮ್ಯ ಲಕ್ಷಣಗಳನ್ನ ಹೊಂದಿರುವವರಿಗೆ ಮಾತ್ರ ಮನೆಯಲ್ಲಿ ಸೋಂಕಿಗೆ ಚಿಕಿತ್ಸೆಯನ್ನ ಪಡೆಯಲು ಅವಕಾಶವಿದೆ. ಅತಿಯಾದ ಲಕ್ಷಣ ಹೊಂದಿರುವವರಿಗೆ ಮನೆಯಲ್ಲಿರಲು ಅವಕಾಶವಿಲ್ಲ. ಈ ಘಟನೆ ಬಳಿಕ ನಾವು ವೈದ್ಯರಿಗೆ ಎಚ್ಚರಿಕೆ ನೀಡಿದ್ದೇವೆ ಎಂದು ಹೇಳಿದ್ರು.