ಉಚಿತ ಆಮ್ಲಜನಕ ಪೂರೈಕೆಗಾಗಿ ಪತ್ನಿಯ ಆಭರಣವನ್ನೇ ಮಾರಿದ ಪತಿ

ಕೊರೊನಾ ವೈರಸ್​ ಎರಡನೇ ಅಲೆಯಿಂದಾಗಿ ದೇಶದ ಜನತೆ ತತ್ತರಿಸಿದ್ದಾರೆ. ಈ ನಡುವೆ ಕೆಲ ಮಹಾನುಭಾವರು ಕೊರೊನಾ ಸಂಕಷ್ಟದಲ್ಲಿರುವವರಿಗೆ ಕೈಲಾದ ಸಹಾಯವನ್ನ ಮಾಡುತ್ತಿದ್ದಾರೆ.

ಸೋಶಿಯಲ್​ ಮೀಡಿಯಾದಲ್ಲಿ ಪ್ರತಿದಿನ ಪ್ಲಾಸ್ಮಾ, ಬೆಡ್​ ಹಾಗೂ ಔಷಧಿಗಳ ಅವಶ್ಯಕತೆ ಪೂರೈಸುವಂತೆ ಕೋರಿ ಸಾಕಷ್ಟು ಮನವಿಗಳು ಹರಿದಾಡುತ್ತಲೇ ಇರುತ್ತೆ. ಅವಶ್ಯಕತೆ ಇರುವವರಿಗೆ ಅನೇಕರು ಸಹಾಯ ಮಾಡುತ್ತಿದ್ದಾರೆ.

ಈ ಮಾತಿಗೆ ಉತ್ತಮ ಉದಾಹರಣೆ ಎಂಬಂತೆ ಮುಂಬೈನ ಮಂಟಪ ಶೃಂಗಾರ ಮಾಡುವ ಉದ್ಯಮ ಮಾಡುತ್ತಿದ್ದ ವ್ಯಕ್ತಿ ತಮ್ಮ ಪತ್ನಿಯ ಆಭರಣಗಳನ್ನ ಮಾರಿ ಕೋವಿಡ್​ ರೋಗಿಗಳಿಗಾಗಿ ಉಚಿತ ಆಕ್ಸಿಜನ್​ ಸಿಲಿಂಡರ್​ ಪೂರೈಸುತ್ತಿದ್ದಾರೆ.

ಪಾಸ್ಕಲ್​ ಸಲ್ದಾನಾ ಎಂಬವರು ತಮ್ಮ ಪತ್ನಿಯ ಮನವಿಗೆ ಬೆಲೆ ನೀಡಿ ಏಪ್ರಿಲ್​ 18ರಿಂದ ಈ ಸಮಾಜಸೇವೆಯನ್ನ ಆರಂಭಿಸಿದ್ರು. ಇವರ ಪತ್ನಿಯ ಕಿಡ್ನಿ ಫೇಲ್​ ಆಗಿರೋದ್ರಿಂದ ಕಳೆದ 5 ವರ್ಷಗಳಿಂದ ಡಯಾಲಿಸಿಸ್​ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ನಾನು ಏಪ್ರಿಲ್​ 18ನೇ ತಾರೀಖಿನಿಂದ ಈ ಕೆಲಸವನ್ನ ಮಾಡುತ್ತಿದ್ದೇನೆ.ಇನ್ನೊಬ್ಬರಿಗೆ ಸಹಾಯ ಮಾಡು ಅಂತಾ ಕೆಲವರು ನನಗೆ ಹಣವನ್ನೂ ನೀಡಿದ್ದಾರೆ ಎಂದು ಪಾಸ್ಕಲ್​ ಹೇಳಿದ್ರು.

ನನ್ನ ಪತ್ನಿ ಡಯಾಲಿಸಿಸ್​ ಚಿಕಿತ್ಸೆ ಪಡೆಯುತ್ತಿದ್ದು ವೈದ್ಯಕೀಯ ಆಮ್ಲಜನಕವನ್ನೇ ಉಸಿರಾಡುತ್ತಿದ್ದಾಳೆ. ಹೀಗಾಗಿ ನಮ್ಮ ಮನೆಯಲ್ಲಿ ಯಾವಾಗಲೂ ಒಂದು ಹೆಚ್ಚುವರಿ ಆಮ್ಲಜನಕ ಸಿಲಿಂಡರ್​ ಇದ್ದೇ ಇರುತ್ತೆ. ಒಂದಿನ ಶಾಲಾ ಪ್ರಾಂಶುಪಾಲರೊಬ್ಬರು ತಮ್ಮ ಪತಿಗೆ ಆಕ್ಸಿಜನ್​ ಬೇಕು ಎಂದು ಮನವಿ ಮಾಡಿದ್ರು. ನನ್ನ ಪತ್ನಿ ಸೂಚನೆಯಂತೆ ನಾನು ನಮ್ಮ ಮನೆಯಲ್ಲಿದ್ದ ಹೆಚ್ಚುವರಿ ಸಿಲಿಂಡರ್​ನ್ನು ಅವರಿಗೆ ನೀಡಿದೆ. ಇದಾದ ಬಳಿಕ ನನ್ನ ಪತ್ನಿಯ ಮನವಿಯಂತೆ ಆಕೆಯ ಚಿನ್ನವನ್ನ 80 ಸಾವಿರ ರೂಪಾಯಿಗಳಿಗೆ ಮಾರಾಟ ಮಾಡಿ ಈ ಕೆಲಸ ಆರಂಭಿಸಿದೆ ಎಂದು ಹೇಳಿದ್ರು.

ಪಾಸ್ಕಲ್​ ದಂಪತಿಯ ಈ ಮಾನವೀಯ ಕಾರ್ಯಕ್ಕೆ ಸಾಮಜಿಕ ಜಾಲತಾಣದಲ್ಲಿ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗ್ತಿದೆ.