ಸ್ವಂತ ಖರ್ಚಿನಲ್ಲಿ ವ್ಯಕ್ತಿಯಿಂದ ನಿತ್ಯವೂ ಆಮ್ಲಜನಕ ಪೂರೈಕೆ: ಜೀವನ ವಿಧಾನವನ್ನೇ ಬದಲಾಯಿಸ್ತು ಆ ಘಟನೆ

ಸಾವನ್ನ ಗೆದ್ದು ಬಂದವರಿಗೆ ಜೀವದ ಪ್ರಾಮುಖ್ಯತೆ ಅಂದರೆ ಏನು ಅನ್ನೋದು ಚೆನ್ನಾಗಿ ತಿಳಿದಿರುತ್ತೆ. ಇದೇ ರೀತಿ ಕೊರೊನಾದಿಂದ ಬಳಲಿದ್ದ ಪಾಟ್ನಾದ ಗೌರವ್​ ರೈ ಕೂಡ ಸಾಕಷ್ಟು ಹೋರಾಟದ ಬಳಿಕ ಸೋಂಕಿನಿಂದ ಪಾರಾಗಿದ್ದರು.

ತುರ್ತು ಆಮ್ಲಜನಕ ಅವಶ್ಯಕತೆಯಿಂದ ಬಳಲಿದ್ದ ಗೌರವ್​​​ ಸಾವಿನ ಕದ ತಟ್ಟಿ ಬಳಿಕ ವಾಪಸ್ಸಾಗಿದ್ದರು.

ಕೊರೊನಾ ಸೋಂಕನ್ನ ಗೆದ್ದು ಬಂದಿರುವ ಗೌರವ್​ ರೈ ಇದೀಗ ಆಕ್ಸಿಜನ್​ ಮ್ಯಾನ್​ ಅಂತಾ ಫೇಮಸ್​ ಆಗಿದ್ದಾರೆ. ಇಲ್ಲಿಯವರೆಗೆ ಆಕ್ಸಿಜನ್​ ಸಿಲಿಂಡರ್ ಅವಶ್ಯಕತೆ ಹೊಂದಿರುವ ಕೊರೊನಾ ಸೋಂಕಿತರ ಮನೆಗೇ ಈ ವ್ಯವಸ್ಥೆ ಕಲ್ಪಿಸುವ ಮೂಲಕ ಬರೋಬ್ಬರಿ 950 ಜೀವಗಳನ್ನ ಕಾಪಾಡಿದ್ದಾರೆ.

ತಮ್ಮ ವ್ಯಾಗನಾರ್ ಕಾರಿನಲ್ಲಿ ಬೆಳಗ್ಗೆ 5 ಗಂಟೆಯಿಂದ ಆಕ್ಸಿಜನ್ ಸಿಲಿಂಡರ್​ಗಳನ್ನ ಮನೆ ಮನೆಗೆ ತಲುಪಿಸೋ ಕಾರ್ಯವನ್ನ ಮಾಡುತ್ತಾರೆ. ಈ ಕೆಲಸ ಮಧ್ಯರಾತ್ರಿಯವರೆಗೂ ಮುಂದುವರಿಯುತ್ತದೆ. ಕೊರೊನಾದಿಂದಾಗಿ ಹೋಂ ಕ್ವಾರಂಟೈನ್​ ಆದ ರೋಗಿಯ ಮನೆಗೆ ತೆರಳಿ ಆಕ್ಸಿಜನ್​ ವ್ಯವಸ್ಥೆ ಮಾಡಿ ಬರ್ತಾರೆ ಗೌರವ್.

ಅಂದಹಾಗೆ ಈ ಸೇವೆಗೆ ಗೌರವ್​ ಸೋಂಕಿತರಿಂದ ನಯಾಪೈಸೆಯನ್ನೂ ಪಡೆಯೋದಿಲ್ಲ. ಕಳೆದೊಂದು ವರ್ಷಗಳಿಂದ ಗೌರವ್​ ಈ ಸಮಾಜಸೇವೆಯನ್ನ ಮಾಡುತ್ತಲೇ ಬಂದಿದ್ದಾರೆ. ಇದೇ ಕಾರಣಕ್ಕೆ ಇವರಿಗೆ ಆಕ್ಸಿಜನ್​ ಮ್ಯಾನ್​ ಎಂಬ ಹೆಸರು ಬಂದಿದೆ.

ನಾನು ಯಾರ ಬಳಿಯೂ ಹಣಬನ್ನ ಕೇಳೋದಿಲ್ಲ. ಖಾಲಿ ಸಿಲಿಂಡರ್​​ನ್ನು ಪಡೆಯಬೇಕಾದ ಹಿನ್ನೆಲೆ ಅವರಿಂದ ಫೋಟೋ ಒಂದನ್ನ ತೆಗೆದುಕೊಳ್ತೇನೆ ಎಂದು ಗೌರವ್​ ಹೇಳಿದ್ದಾರೆ.

52 ವರ್ಷದ ಗೌರವ್​ ರೈ ಕಳೆದ ವರ್ಷ ಜುಲೈನಲ್ಲಿ ಕೊರೊನಾ ಸೋಂಕಿಗೆ ಒಳಗಾಗಿದ್ದರು. ಗೌರವ್​ರನ್ನ ಪಾಟ್ನಾ ಮೆಡಿಕಲ್​ ಕಾಲೇಜಿನ ಆಸ್ಪತ್ರೆಯ ಕೋವಿಡ್​ ವಾರ್ಡ್​ಗೆ ಕರೆದುಕೊಂಡು ಬರಲಾಗಿತ್ತು.

ಆದರೆ ಗೌರವ್​ಗೆ ಒಂದೇ ಒಂದು ಬೆಡ್​ ಸಿಗಲಿಲ್ಲ. ಆಮ್ಲಜನಕ ಕೊರತೆ ಕೂಡ ಇದ್ದಿದ್ದರಿಂದ ಗೌರವ್​ ತುಂಬಾನೇ ಒದ್ದಾಡುತ್ತಿದ್ದರು. ಆದರೆ ಅವರಿಗೆ ಆಕ್ಸಿಜನ್​ ಸಿಲಿಂಡರ್ ವ್ಯವಸ್ಥೆ ಕೂಡ ಸಿಗಲಿಲ್ಲ. 5 ಗಂಟೆಗಳ ಬಳಿಕ ಗೌರವ್​​ ಪತ್ನಿ ಖಾಸಗಿಯಾಗಿ ಆಕ್ಸಿಜನ್​ ಸಿಲಿಂಡರ್ ವ್ಯವಸ್ಥೆ ಮಾಡಿದ್ದರು.

ಈ ಘಟನೆ ಬಳಿಕ ಕೊರೊನಾದಿಂದ ಗುಣಮುಖರಾದ ಗೌರವ್​ ನನಗೆ ಬಂದ ಕಷ್ಟ ಇನ್ಯಾರಿಗೂ ಬಾರದಂತೆ ನೋಡಿಕೊಳ್ಳಬೇಕು ಎಂದು ನಿರ್ಧರಿಸಿದ್ರು. ಹೀಗಾಗಿ ಈ ದಂಪತಿ ತಮ್ಮ ಸ್ವಂತ ಖರ್ಚಿನಿಂದ ಈ ಸಮಾಜಸೇವೆ ಮಾಡುತ್ತಿದೆ.