ಬರ್ತಡೇ ಪಾರ್ಟಿಯಲ್ಲಿ ಡಿಜೆ ಹಾಡುಗಳನ್ನ ಹಾಕುವ ವಿಚಾರದಲ್ಲಿ ಶುರುವಾದ ಜಗಳ ಕೊಲೆಯಲ್ಲಿ ಅಂತ್ಯವಾದ ಘಟನೆ ದೆಹಲಿಯ ನಜಾಫ್ಗರ್ ಏರಿಯಾದಲ್ಲಿ ನಡೆದಿದೆ. ಈ ಸಂಬಂಧ ಪೊಲೀಸರು 28 ವರ್ಷದ ವ್ಯಕ್ತಿಯನ್ನ ಬಂಧಿಸಿದ್ದಾರೆ.
ಅನುಜ್ ಶರ್ಮಾ ಎಂಬ ವ್ಯಕ್ತಿಯನ್ನ ನಜಾಫ್ಗರ್ ಪ್ರದೇಶದಲ್ಲಿನ ತೋಟದ ಮನೆಯಲ್ಲಿ ನವೀನ್ ಕುಮಾರ್ ಎಂಬಾತ ಗುಂಡಿಕ್ಕಿ ಕೊಲೆ ಮಾಡಿದ್ದಾನೆ. ಮೃತ ಅನುಜ್ ಶರ್ಮಾ ಕಿರಿಯ ಸಹೋದರನ ಹುಟ್ಟುಹಬ್ಬದ ಸಂಭ್ರಮಾಚರಣೆಯಲ್ಲಿ ಈ ದುರಂತ ಸಂಭವಿಸಿದೆ.
ಬರ್ತಡೇ ಪಾರ್ಟಿಯಲ್ಲಿ ಡಿಜೆ ಹಾಡುಗಳನ್ನ ನುಡಿಸುವ ಬಗ್ಗೆ ನವೀನ್ ಹಾಗೂ ಅನುಜ್ ನಡುವೆ ವಾಗ್ವಾದ ನಡೆದಿದೆ. ಮದ್ಯದ ನಶೆಯಲ್ಲಿದ್ದ ಆರೋಪಿ ನವೀನ್, ಅನುಜ್ ಮೇಲೆ ಗುಂಡು ಹಾರಿಸಿ ಸ್ಥಳದಿಂದ ಪರಾರಿಯಾಗಿದ್ದಾನೆ ಎಂದು ಹಿರಿಯ ಪೊಲೀಸ್ ಅಧಿಕಾರಿ ಮಾಹಿತಿ ನೀಡಿದ್ರು.
ಗಾಯಗೊಂಡಿದ್ದ ಅನುಜ್ರನ್ನ ಕೂಡಲೇ ಹತ್ತಿರದ ಆಸ್ಪತ್ರೆಗೆ ದಾಖಲು ಮಾಡಲಾಯ್ತಾದರೂ ಅಲ್ಲಿ ಅವರು ಮೃತಪಟ್ಟಿದ್ದಾರೆ ಎಂದು ವರದಿಯಾಗಿದೆ. ಈ ಸಂಬಂಧ ಕೇಸ್ ದಾಖಲು ಮಾಡಲಾಗಿದ್ದು ಸಿಸಿ ಕ್ಯಾಮರಾ ಹಾಗೂ ಆರೋಪಿಗಳ ಫೋನ್ ಕಾಲ್ ದಾಖಲೆಗಳ ಸಹಾಯದಿಂದ ನವೀನ್ರನ್ನ ಬಾಬಾ ಹರಿದಾಸ್ ನಗರದಲ್ಲಿ ಪೊಲೀಸರು ಬಂಧಿಸಿದ್ದಾರೆ. ತನಿಖೆ ವೇಳೆ ಆರೋಪಿ ತಪ್ಪೊಪ್ಪಿಕೊಂಡಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
Loading ...