ಅಸಲಿ ಹಾಗೂ ನಕಲಿ ರೆಮ್ಡಿಸಿವರ್​ ನಡುವಿನ ವ್ಯತ್ಯಾಸ ತಿಳಿಯೋದು ಹೇಗೆ..? ಇಲ್ಲಿದೆ ವಿವರ

ಕೊರೊನಾ ಎರಡನೆ ಅಲೆಯ ವಿರುದ್ಧ ದೇಶದ ಹೋರಾಟ ಮುಂದುವರಿದಿದೆ. ವೈದ್ಯಕೀಯ ಲೋಕ ಅನೇಕ ಸಂಕಷ್ಟಗಳ ನಡುವೆಯೇ ಸೋಂಕಿತರ ಜೀವ ಉಳಿಸಲು ಇನ್ನಿಲ್ಲದ ಯತ್ನ ಮಾಡುತ್ತಿದೆ. ಆಕ್ಸಿಜನ್​ ಕೊರತೆ, ಔಷಧಿ ಸಾಮಗ್ರಿ ಕೊರತೆ, ಬೆಡ್​ ಕೊರತೆಯು ಕೊರೊನಾ ವಿರುದ್ಧದ ಹೋರಾಟದಲ್ಲಿ ದೊಡ್ಡ ಸವಾಲಾಗಿ ಪರಿಣಮಿಸಿದೆ.

ಕೊರೊನಾ ಸೋಂಕು ಉಲ್ಬಣವಾಗುತ್ತಿದ್ದಂತೆಯೇ ರೆಮ್ಡಿಸಿವರ್​ ಚುಚ್ಚುಮದ್ದಿಗೂ ಬೇಡಿಕೆ ಹೆಚ್ಚಾಗಿದೆ. ಹೀಗಾಗಿ ರೆಮ್ಡಿಸಿವರ್​ ಪೂರೈಕೆಯಲ್ಲಿಯೂ ಕೊರತೆ ಉಂಟಾಗಿದೆ. ಈ ಪರಿಸ್ಥಿತಿಯ ಲಾಭ ಪಡೆದ ಅನೇಕರು ನಕಲಿ ರೆಮಿಡಿಸಿವರ್​ನ್ನು ಮಾರುಕಟ್ಟೆಗೆ ಬಿಟ್ಟಿದ್ದಾರೆ.‌

ಹೀಗಾಗಿ ರೆಮಿಡಿಸಿವರ್​ ಚುಚ್ಚುಮದ್ದನ್ನ ಖರೀದಿ ಮಾಡುವ ಮುನ್ನ ನೀವು ಇಂತಹ ದುಷ್ಕರ್ಮಿಗಳ ಆಟದಿಂದ ದೂರವಿರಬೇಕಾದ ಅವಶ್ಯಕತೆ ಇದೆ.

ಮಹಾರಾಷ್ಟ್ರ, ಉತ್ತರ ಪ್ರದೇಶ, ದೆಹಲಿ ಹಾಗೂ ಮಧ್ಯ ಪ್ರದೇಶಗಳಲ್ಲಿ ನಕಲಿ ರೆಮಿಡಿಸಿವರ್​ ಮಾರಾಟ ಮಾಡುತ್ತಿದ್ದವರನ್ನ ಬಂಧಿಸಲಾಗಿದೆ.

ದೆಹಲಿ ಕ್ರೈಂ ಬ್ರ್ಯಾಂಚ್​​ನ ಡಿಸಿಪಿ ಮೋನಿಕಾ ಭಾರದ್ವಾಜ್​, ಟ್ವಿಟರ್​ನಲ್ಲಿ ನಕಲಿ ರೆಮಿಡಿಸಿವರ್​ ಹಾಗೂ ಅಸಲಿ ರೆಮಿಡಿಸಿವರ್​ಗೆ ಇರುವ ವ್ಯತ್ಯಾಸಗಳ ಕುರಿತು ಮಾಹಿತಿ ನೀಡಿದ್ದಾರೆ.

ನಕಲಿ ರೆಮಿಡಿಸಿವರ್​ ಪ್ಯಾಕೇಜ್​ಗಳಲ್ಲಿ ನಿಮಗೆ ರೆಮಿಡಿಸಿವರ್​ ಎಂಬ ಹೆಸರಿನ ಜೊತೆಯಲ್ಲಿ Rx ಎಂದು ಬರೆದಿರೋದಿಲ್ಲ.

ಅಸಲಿ ರೆಮಿಡಿಸಿವರ್​​ನಲ್ಲಿ “100 mg/Vial” ಎಂದು ಬರೆಯಲಾಗಿದ್ದರೆ ನಕಲಿ ರೆಮಿಡಿಸಿವರ್​​ನಲ್ಲಿ “100 mg/vial” ಎಂದು ಬರೆಯಲಾಗಿರುತ್ತೆ. ಗಮನಿಸಿ ಇಲ್ಲಿ ವಿ ಅಕ್ಷರವು ಅಸಲಿ ರೆಮಿಡಿಸಿವರ್​ನಲ್ಲಿ ಕ್ಯಾಪಿಟಲ್​ ಅಕ್ಷರವಾಗಿಯೂ ನಕಲಿ ರೆಮಿಡಿಸಿವರ್​ನಲ್ಲಿ ಸ್ಮಾಲ್​ ಅಕ್ಷರದಲ್ಲಿಯೂ ಇರಲಿದೆ.

ಬ್ರ್ಯಾಂಡ್ ಹೆಸರಿನಲ್ಲಿಯೂ ವ್ಯತ್ಯಾಸವನ್ನ ಕಾಣಬಹುದಾಗಿದೆ. ಅಸಲಿ ರೆಮಿಡಿಸಿವರ್​ಗಿಂತ ನಕಲಿ ರೆಮಿಡಿಸಿವರ್​ ಪ್ಯಾಕೇಜ್​ನಲ್ಲಿ ಬ್ರ್ಯಾಂಡ್​​ನ ಹೆಸರು ಬರೆದಲ್ಲಿ ಅಕ್ಷರಗಳ ನಡುವೆ ಅಂತರ ಹೆಚ್ಚಿರಲಿದೆ.

ಅಸಲಿ ರೆಮಿಡಿಸಿವರ್​ ಪ್ಯಾಕೇಜ್​ನ ಅಡಿಬದಿಯಲ್ಲಿ For use in ಎಂದು ಬರೆಯಲಾಗಿದ್ದರೆ ನಕಲಿ ರೆಮಿಡಿಸಿವರ್​ನಲ್ಲಿ for use in ಎಂದು ಬರೆಯಲಾಗಿದೆ.

ಇನ್ನು ಅಸಲಿ ರೆಮಿಡಿಸಿವರ್​​ನಲ್ಲಿ ಕೆಂಪು ಬಣ್ಣದಲ್ಲಿ ವಾರ್ನಿಂಗ್​​ ಎಂದು ಬರೆಯಲಾಗಿದ್ದರೆ ನಕಲಿ ರೆಮಿಡಿಸಿವರ್​ನಲ್ಲಿ ಕಪ್ಪು ಬಣ್ಣದಲ್ಲಿ ಇರಲಿದೆ.

ಅಸಲಿ ರೆಮಿಡಿಸಿವರ್​ನಲ್ಲಿ ಇಂಡಿಯಾ ಎಂಬ ಪದದಲ್ಲಿ ಐ ಕ್ಯಾಪಿಟಲ್​ ಆಗಿದ್ದರೆ ನಕಲಿ ರೆಮಿಡಿಸಿವರ್​ನಲ್ಲಿ ಐ ಸ್ಮಾಲ್​ ಆಗಿದೆ.

ಇನ್ನು ನಕಲಿ ರೆಮಿಡಿಸಿವರ್​ನಲ್ಲಿ ತೆಲಂಗಾಣ ಎಂದು ಬರೆಯುವ ಬದಲು ತೆಲಗಾಣ ಎಂದು ಬರೆಯಲಾಗಿದೆ.