ಮಹಿಳೆಯ ಗರ್ಭಪಾತಕ್ಕೆ ವಿಶೇಷ ಅನುಮತಿ ನೀಡಿದ ದೆಹಲಿ ಹೈಕೋರ್ಟ್

ದೆಹಲಿ ಹೈಕೋರ್ಟ್​ ಸೋಮವಾರ ನಡೆಸಿದ ವಿಚಾರಣೆಯಲ್ಲಿ 28 ವಾರದ ಗರ್ಭಿಣಿಗೆ ಗರ್ಭಪಾತ ಮಾಡಿಕೊಳ್ಳಲು ವಿಶೇಷ ಅನುಮತಿ ನೀಡಿದೆ. ಏಮ್ಸ್​ ಆಸ್ಪತ್ರೆ ವೈದ್ಯರು ನೀಡಿದ ವರದಿಯ ಪ್ರಕಾರ ಮಹಿಳೆಯರ ಗರ್ಭದಲ್ಲಿರುವ ಮಗು ಅನೆನ್​ಸೆಫಲಿ ಎಂಬ ಕಾಯಿಲೆಯಿಂದ ಬಳಲುತ್ತಿದ್ದು ಈ ಸಂಬಂಧ ವಿಚಾರಣೆ ನಡೆಸಿದ ಕೋರ್ಟ್​ ಗರ್ಭಪಾತಕ್ಕೆ ಅನುಮತಿ ನೀಡಿದೆ.

ಅನೆನ್​ಸೆಫಲಿ ಮೆದುಳಿಗೆ ಸಂಬಂಧಿಸಿದ ಕಾಯಿಲೆಯಾಗಿದ್ದು ಇದರಿಂದ ಬಳಲುವ ಮಗುವಿನ ತಲೆ ಬುರುಡೆಯ ಮೂಳೆ ಸರಿಯಾದ ಬೆಳವಣಿಗೆಯನ್ನ ಕಾಣೋದಿಲ್ಲ. ಇದರಿಂದಾಗಿ ದಿವ್ಯಾಂಗ ಚೇತನ ಮಗು ಜನಿಸುತ್ತೆ. ಹೀಗಾಗಿ ಮುಖ್ಯ ನ್ಯಾಯಮೂರ್ತಿ ಡಿ. ಎನ್​. ಪಾಟೀಲ್​ ಹಾಗೂ ನ್ಯಾಯಮೂರ್ತಿ ಜ್ಯೋತಿ ಸಿಂಗ್​​ ನೇತೃತ್ವದ ಪೀಠ ಮಹಿಳೆಯ ಗರ್ಭಪಾತಕ್ಕೆ ವಿಶೇಷ ಅನುಮತಿ ನೀಡಿದೆ. ಶೀಘ್ರದಲ್ಲೇ ವಿವರಣಾತ್ಮಕ ಆದೇಶವನ್ನ ಹೊರಡಿಸೋದಾಗಿ ಕೋರ್ಟ್ ಹೇಳಿದೆ.

ಜನವರಿ 7ರಂದು ಏಮ್ಸ್​​ಗೆ ದೆಹಲಿ ಹೈಕೋರ್ಟ್​ ಗರ್ಭಿಣಿ ಹಾಗೂ ಮಗುವಿನ ಆರೋಗ್ಯ ಸಂಬಂಧ ವರದಿ ತಯಾರಿಸಿ ಕೋರ್ಟ್​ಗೆ ನೀಡುವಂತೆ ಸೂಚನೆ ನೀಡಿತ್ತು. ಜನವರಿ 11ಕ್ಕೆ ಈ ವರದಿಯನ್ನು ಕೋರ್ಟ್​ಗೆ ಸಲ್ಲಿಸುವಂತೆ ಹೇಳಿತ್ತು.