ಕೊರೊನಾ ಸೋಂಕಿನಿಂದ ಚೇತರಿಸಿಕೊಂಡ 101 ವರ್ಷದ ವೃದ್ಧೆ

ಕೊರೊನಾ ವೈರಸ್ ಸೋಂಕು ನಾವಂದುಕೊಂಡಷ್ಟು ಮಾರಕವಲ್ಲ ಎಂದು ತೋರುವ ಸಾಕಷ್ಟು ಉದಾಹರಣೆಗಳ ಬಗ್ಗೆ ದಿನಂಪ್ರತಿ ಓದುತ್ತಲೇ ಬಂದಿದ್ದೇವೆ.

ತಿರುಪತಿಯ 101 ವರ್ಷ ವಯಸ್ಸಿನ ವೃದ್ಧೆಯೊಬ್ಬರು ಕೋವಿಡ್-19 ಸೋಂಕಿನಿಂದ ಚೇತರಿಸಿಕೊಂಡು ಅಲ್ಲಿನ ಶ್ರೀ ಪದ್ಮಾವತಿ ಮಹಿಳೆಯರ ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ. ಮಂಗಮ್ಮ ಹೆಸರಿನ ಇವರು ಕೋವಿಡ್-19 ಪಾಸಿಟಿವ್‌ ಕಂಡು ಬಂದ ಕಾರಣ ಕೆಲ ದಿನಗಳ ಹಿಂದೆ ಶ್ರೀ ವೆಂಕಟೇಶ್ವರ ವೈದ್ಯಕೀಯ ವಿಜ್ಞಾನ ಸಂಸ್ಥೆಗೆ ದಾಖಲಾಗಿದ್ದರು.

ಈ ಕುರಿತಂತೆ ಮಾತನಾಡಿದ ವೈದ್ಯರು, “ಕೊರೊನಾದಿಂದ ಜೀವಭಯ ಬೆಳೆಸಿಕೊಂಡವರಿಗೆ ಮಂಗಮ್ಮ ಉದಾಹರಣೆಯಾಗಿ ನಿಲ್ಲುತ್ತಾರೆ. 101ನೇ ವಯಸ್ಸಿನಲ್ಲಿ, ಧೈರ್ಯ ಹಾಗೂ ದಿಟ್ಟತನದಿಂದ ಎದುರಿಸಿ, ಚಿಕಿತ್ಸೆಗೆ ಸ್ಪಂದಿಸಿದ್ದಾರೆ. ಅವರೀಗ ಆರೋಗ್ಯವಂತರಾಗಿದ್ದು, ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದಾರೆ” ಎಂದು ಅವರನ್ನು ಶುಶ್ರೂಷೆ ಮಾಡಿದ ವೈದ್ಯ ರಾಮ್ ತಿಳಿಸಿದ್ದಾರೆ.