ಕೋವಿಡ್ ಸೋಂಕಿಗೊಳಗಾದ ತಾಯಂದಿರಿಗೆ ಜನಿಸಿದ ಶಿಶುಗಳು ಎಷ್ಟು ಸೇಫ್..? ಇಲ್ಲಿದೆ ಕುತೂಹಲಕಾರಿ ಮಾಹಿತಿ

ಕೋವಿಡ್​ 19 ಪಾಸಿಟಿವ್​ ಹೊಂದಿದ ಗರ್ಭಿಣಿಯರಿಗೆ ಜನಿಸಿದ ಶಿಶುಗಳು ರೋಗಲಕ್ಷಣ ಬೆಳೆಯುವ ಅಪಾಯವನ್ನ ಕಡಿಮೆ ಪ್ರಮಾಣದಲ್ಲಿ ಹೊಂದಿರುತ್ತಾರೆ ಎಂದು ಸಂಶೋಧಕರು ಹೇಳಿದ್ದಾರೆ.

ಜಮಾ ನೆಟ್​​ವರ್ಕ್​ ಓಪನ್​ ಜರ್ನಲ್​ ನಡೆಸಿದ ಅಧ್ಯಯನದಲ್ಲಿ ಕೋವಿಡ್​ ಸೋಂಕನ್ನ ಹೊಂದಿದ್ದ 95 ಪ್ರತಿಶತ ಮಹಿಳೆಯಲ್ಲಿ ಯಾವುದೇ ಗಂಭೀರ ಪರಿಣಾಮ ಹೊಂದಿರಲಿಲ್ಲ ಎಂದು ಹೇಳಿದೆ.

ಕೇವಲ 3 ಶೇಕಡಾ ಪ್ರಕರಣಗಳಲ್ಲಿ ಮಾತ್ರ ಕೊರೊನಾ ಭ್ರೂಣಕ್ಕೆ ಹರಡಿದೆ ಎಂದು ಅಧ್ಯಯನ ಕಂಡು ಹಿಡಿದಿದೆ.  ಕೊರೊನಾ ಲಕ್ಷಣಗಳಿರದ ಅಥವಾ ಸೌಮ್ಯ ಲಕ್ಷಣಗಳನ್ನ ಹೊಂದಿರುವ ಗರ್ಭಿಣಿಯರಲ್ಲಿ ಹೆಚ್ಚಿನವರ ಶಿಶುಗಳು ವೈರಸ್​ ದಾಳಿಗೆ ಒಳಗಾಗುವುದಿಲ್ಲ ಎಂದು ಅಧ್ಯಯನ ಹೇಳಿದೆ.

ಕೊರೊನಾ ಅವಧಿಯಲ್ಲಿ ಗರ್ಭಿಣಿಯರಾಗಿದ್ದ 3374 ಮಂದಿ ಮಹಿಳೆಯರಲ್ಲಿ 252 ಮಂದಿ ಗರ್ಭಾವಸ್ಥೆಯಲ್ಲಿ ಕೊರೊನಾ ಸೋಂಕಿಗೆ ಒಳಗಾಗಿದ್ದರು. ಈ 252 ಮಂದಿ ಗರ್ಭಿಣಿಯರಲ್ಲಿ ಶೇಕಡಾ 95ರಷ್ಟು ಮಂದಿ ಸೋಂಕಿತರು ರೋಗಲಕ್ಷಣವೇ ಇಲ್ಲದ ಅಥವಾ ಕಡಿಮೆ ರೋಗಲಕ್ಷಣ ಹೊಂದಿದ್ದರು. ಈ ಮಹಿಳೆಯರಲ್ಲಿ ಕೇವಲ ಆರು ಮಂದಿ ಮಾತ್ರ ತೀವ್ರವಾದ ಲಕ್ಷಣಗಳಿಂದ ಬಳಲಿದ್ದಾರೆ.

ಸೋಂಕಿಗೆ ಒಳಗಾದ ಗರ್ಭಿಣಿಯರು ಹಾಗೂ ಸಾಮಾನ್ಯ ಗರ್ಭಿಣಿಯರಲ್ಲಿ ಅಂತಹ ವ್ಯತ್ಯಾಸವೇನು ಕಂಡುಬಂದಿಲ್ಲ. ಸೋಂಕಿತ ಮಹಿಳೆಯರು ಹೆಚ್ಚಾಗಿ ಸಿಸೇರಿಯನ್​ ಹೆರಿಗೆಗೆ ಒಳಗಾಗಿದ್ದಾರೆ, ಆದರೆ ಮಧುಮೇಹ ಅಥವಾ ಬೇರೆ ಯಾವುದಾದರೂ ನಿರ್ಣಾಯಕ ಕಾಯಿಲೆ ಹೊಂದಿರುವ ಗರ್ಭಿಣಿಯರಿಗೆ ಮಾತ್ರ ಸೋಂಕು ಅಪಾಯ ಹೆಚ್ಚಿಸುವ ಒಂದು ಅಂಶವಾಗಿದೆ ಎಂಬುದನ್ನ ಅಧ್ಯಯನ ಕಂಡುಹಿಡಿದಿದೆ.

ಕೋವಿಡ್​ 19 ಸೋಂಕಿಗೆ ಒಳಗಾಗಿದ್ದ ತಾಯಂದಿರಿಗೆ ಹಾಗೂ ಶಿಶುಗಳ ಆರೋಗ್ಯದ ಮೇಲೆ ಈ ಸೋಂಕು ಭವಿಷ್ಯದಲ್ಲಿ ಎಷ್ಟರ ಮಟ್ಟಿಗೆ ಪರಿಣಾಮ ಬೀರುತ್ತೆ ಅನ್ನೋ ವಿಚಾರವಾಗಿ ಹೆಚ್ಚಿನ ಅಧ್ಯಯನ ನಡೆಯಬೇಕಿದೆ ಅಂತಾ ಸಂಶೋಧಕರು ಹೇಳಿದ್ದಾರೆ.