ಪ್ರತಿಭಟನಾನಿರತ ರೈತ ಮಹಿಳೆಯರಿಗೆಂದೇ ನಿರ್ಮಾಣವಾಯ್ತು ಮಹಿಳಾ ಸ್ಟೋರ್​​…!

ಘಾಜಿಪುರ ಗಡಿಯಲ್ಲಿ ಪ್ರತಿಭಟನೆಯಲ್ಲಿ ನಿರತರಾಗಿರುವ ರೈತ ಮಹಿಳೆಯರಿಗೆ ನೆರವಾಗುವ ನಿಟ್ಟಿನಲ್ಲಿ ನೈನಿತಾಲ್​ನ ಸಹೋದರಿಯರಿಬ್ಬರು ಪ್ರತಿಭಟನಾ ಸ್ಥಳದಲ್ಲಿ ಕಿಸಾನ್​ ಮಹಿಳಾ ಸ್ಟೋರ್​ ಒಂದನ್ನ ಸ್ಥಾಪಿಸಿದ್ದಾರೆ. ಈ ಸ್ಥಳದಲ್ಲಿ ಈಗಾಗಲೇ 1 ಸಾವಿರಕ್ಕೂ ಹೆಚ್ಚು ಮಹಿಳೆಯರು ಇದ್ದಾರೆ. ಗಣರಾಜ್ಯೋತ್ಸವದಂದು ಇನ್ನಷ್ಟು ಮಹಿಳೆಯರು ಪ್ರತಿಭಟನಾ ಸ್ಥಳದಲ್ಲಿ ಸೇರುವ ನಿರೀಕ್ಷೆಯಿದೆ.

ಇನ್ನು ಈ ವಿಚಾರವಾಗಿ ಮಾತನಾಡಿದ ಅಂಗಡಿ ಮಾಲೀಕೆ ಗುಶರಂಜನ್​ಜೀತ್​ ಕೌರ್​, ನಾವು ಡಿಸೆಂಬರ್ 25ರಂದು ಪ್ರತಿಭಟನಾ ಸ್ಥಳಕ್ಕೆ ಮೊದಲ ಬಾರಿಗೆ ಭೇಟಿ ನೀಡಿದ್ದೆವು. ಈ ವೇಳೆ ಇಲ್ಲಿ ಅನೇಕ ಮಹಿಳೆಯರು ಸ್ಯಾನಿಟರಿ ಪ್ಯಾಡ್​​ ಸೇರಿದಂತೆ ಅವಶ್ಯ ವಸ್ತುಗಳಿಗಾಗಿ ಕಷ್ಟ ಪಡ್ತಿರೋದನ್ನ ನೋಡಿದೆವು. ಹೀಗಾಗಿ ನಮಗೆ ಇಲ್ಲೊಂದು ಅಂಗಡಿ ಸ್ಥಾಪಿಸುವ ಯೋಜನೆ ಹೊಳೀತು ಅಂತಾ ಹೇಳಿದ್ರು.

ಸ್ನೇಹಿತರು ಹಾಗೂ ಸಹೋದರರ ನೆರವಿನಿಂದ ಹರ್ಷರಂಜೀತ್​ ಕೌರ್​ ಹಾಗೂ ಗುಶ್​ರಂಜನ್​ ಕೌರ್​ ಈ ಅಂಗಡಿಯನ್ನ ಸ್ಥಾಪಿಸಿದ್ದಾರೆ. ಹಿರಿಯ ಸಹೋದರಿ ಹರ್ಷರಂಜಿತ್​ ಕೌರ್​ ಕೂಡ ಈ ವಿಚಾರವಾಗಿ ಮಾತನಾಡಿ, ನಾವು ಈ ಟೆಂಟ್​​ನಲ್ಲೇ ಉಳಿದುಕೊಳ್ಳಲು ನಿರ್ಧರಿಸಿದ್ದೇವೆ. ಅಲ್ಲದೇ ಇಲ್ಲಿ ಸಿಕ್ಕಾಪಟ್ಟೆ ಸೊಳ್ಳೆ ಕಾಟ ಕೂಡ ಇದೆ. ಇಲ್ಲಿ ಮಹಿಳೆಯರು ಶೌಚಕ್ಕೆ ಬಹಳ ದೂರದವರೆಗೆ ಸಾಗಬೇಕಾಗಿದೆ. ಹೀಗಾಗಿ ನಾವು ಚಲಿಸುವ ಶೌಚಾಲಯಕ್ಕೂ ವ್ಯವಸ್ಥೆ ಮಾಡಿದ್ದೇವೆ. ಟೆಂಟ್​ನಲ್ಲಿ 80ಕ್ಕೂ ಹೆಚ್ಚಿನ ಮಹಿಳೆಯರು ಉಳಿದುಕೊಳ್ಳಲು ಅನುಕೂಲವಾಗುವಂತೆ ಟೆಂಟ್​ ಕೂಡ ನಿರ್ಮಿಸಿದ್ದೇವೆ ಎಂದು ಹೇಳಿದ್ರು.

ಇವರ ಅಂಗಡಿಯಲ್ಲಿ ಸ್ಯಾನಿಟರಿ ಪ್ಯಾಡ್, ಒಳ ಉಡುಪುಗಳು, ಶ್ಯಾಂಪೂ, ಸಾಬೂನು, ಟೂತ್​ಪೇಸ್ಟ್ ಹಾಗೂ ಟವೆಲ್​ಗಳು ಲಭ್ಯವಿದೆ. ಈ ಅಂಗಡಿಯಲ್ಲಿ ಸ್ಯಾನಿಟರಿ ಪ್ಯಾಡ್​​ ಹಾಗೂ ಟವೆಲ್​ಗಳನ್ನ ಪಡೆದು ಮಾತನಾಡಿದ ರೈತ ಮಹಿಳೆ ನನ್ನಿ ದೇವಿ, ಈ ಅಂಗಡಿ ಆರಂಭವಾದ ಬಳಿಕ ನಮಗೆ ತುಂಬಾನೇ ಅನುಕೂಲವಾಗಿದೆ ಎಂದು ಹೇಳಿದ್ರು.