ಕೋವಿಡ್​ ಸೋಂಕಿಗೆ ಒಳಗಾಗಿದ್ದೀರಾ..? ಭವಿಷ್ಯ ನಿಧಿಯಿಂದ ವೈದ್ಯಕೀಯ ವೆಚ್ಚಕ್ಕಾಗಿ ಪಡೆಯಬಹುದು ಸಾಲ

ದೇಶದಲ್ಲಿ ಕೊರೊನಾ ಕೇಸ್​ಗಳ ಸಂಖ್ಯೆ ಹೆಚ್ಚಾಗ್ತಿರುವ ಹಿನ್ನೆಲೆ ಜನರು ಸೋಂಕು ಬಂದ್​ಬಿಟ್ರೆ ಚಿಕಿತ್ಸೆಗೆ ಹಣವನ್ನ ಹೊಂದಿಸೋದು ಹೇಗೆ ಎಂದು ಚಿಂತಿತರಾಗ್ತಿದ್ದಾರೆ.

ಆದರೆ ಇದಕ್ಕೆ ನಿಮ್ಮ ಭವಿಷ್ಯ ನಿಧಿ ಸಹಾಯ ಮಾಡಲಿದೆ. ಇದಕ್ಕಾಗಿ ನೀವು ಇಪಿಎಫ್​ ಖಾತೆಯಿಂದ ವೈದ್ಯಕೀಯ ವೆಚ್ಚಕ್ಕೆಂದು ಸಾಲ ಪಡೆಯಬಹುದಾಗಿದೆ.

ವೈದ್ಯಕೀಯ ತುರ್ತು ಪರಿಸ್ಥಿತಿ, ಹೊಸ ಮನೆ ನಿರ್ಮಾಣ ಅಥವಾ ಖರೀದಿ, ಮನೆ ನವೀಕರಣ, ಗೃಹ ಸಾಲ ಮರುಪಾವತಿ ಹಾಗೂ ವಿವಾಹದ ಉದ್ದೇಶಗಳಿಗೆಂದು ಸಿಬ್ಬಂದಿ ಇಪಿಎಫ್​ ಖಾತೆಯಿಂದ ಹಣ ಪಡೆಯಬಹುದು ಎಂದು ನೌಕರರ ಭವಿಷ್ಯ ನಿಧಿ ಸಂಸ್ಥೆ ಮಾಹಿತಿ ನೀಡಿದೆ.

ಭವಿಷ್ಯ ನಿಧಿಯ ಮೂಲಕ ಸಿಬ್ಬಂದಿ ಕೋವಿಡ್​ 19 ಚಿಕಿತ್ಸೆಗಾಗಿ ಹಣ ಪಡೆಯಬಹುದಾಗಿದೆ. ವೈಯಕ್ತಿಕ, ಪತಿ/ಪತ್ನಿ, ಮಕ್ಕಳು ಹಾಗೂ ಪೋಷಕರು ಸೋಂಕಿಗೆ ಒಳಗಾದಲ್ಲಿ ಈ ಹಣವನ್ನ ಪಡೆಯಬಹುದಾಗಿದೆ.

ಕೋವಿಡ್​ 19 ಚಿಕಿತ್ಸೆಗಾಗಿ ಉದ್ಯೋಗಿಯು ತನ್ನ ತಿಂಗಳ ಸಂಬಳದ ಆರು ಪಟ್ಟು ಹೆಚ್ಚು ಅಥವಾ ಆತನ ಆದ್ಯತೆಗೆ ತಕ್ಕಂತೆ ಕಡಿಮೆ ಹಣವನ್ನ ಪಡೆಯಬಹುದಾಗಿದೆ.

ಪಿಎಫ್​ ಖಾತೆಯಿಂದ ಹಣವನ್ನ ಪಡೆಯಲು ಸಿಬ್ಬಂದಿಯು ತನ್ನ ಯುಎಎನ್​​ ಸಂಖ್ಯೆ ಹಾಗೂ ಪಿಎಫ್​ ಖಾತೆಯಲ್ಲಿ ಬ್ಯಾಂಕ್​ ದಾಖಲೆಯನ್ನ ಲಗತ್ತಿಸಿಕೊಂಡಿರಬೇಕು.

ಈ ಇಪಿಎಫ್​ ಹಣವು ಮೂರನೇ ವ್ಯಕ್ತಿಯ ಖಾತೆಗೆ ನೇರವಾಗಿ ಸಂದಾಯವಾಗೋದಿಲ್ಲ. ಭವಿಷ್ಯ ನಿಧಿ ಖಾತೆಯಲ್ಲಿ ವಿವರ ಒದಗಿಸಲಾದ ಬ್ಯಾಂಕ್​ ಖಾತೆಗೇ ಹಣ ಸಂದಾಯವಾಗಲಿದೆ.

ತಂದೆಯ ಹೆಸರು ಹಾಗೂ ಉದ್ಯೋಗಿಯ ಹುಟ್ಟಿದ ದಿನಾಂಕ ಆತ ನೀಡುವ ಗುರುತಿನ ಚೀಟಿಗೆ ಹೋಲಿಕೆಯಾಗೋದು ಕೂಡ ಕಡ್ಡಾಯವಾಗಿದೆ.