ವೆಂಟಿಲೇಟರ್​​ ಖರೀದಿಗಾಗಿ ಸಂಪೂರ್ಣ ‘ಪಿಂಚಣಿ’ ಹಣ ದೇಣಿಗೆ ನೀಡಿದ ವೃದ್ಧ

ಭಾರತವು ಕೊರೊನಾದ ವಿರುದ್ಧ ಹೋರಾಡುತ್ತಿದೆ. ಕೊರೊನಾ ಎರಡನೆ ಅಲೆಯಿಂದ ಬಳಲುತ್ತಿರುವ ಅನೇಕರಿಗೆ ಸೋಶಿಯಲ್​ ಮೀಡಿಯಾದ ಮೂಲಕ ನೆರವಿನ ಮಹಾಪೂರವೇ ಹರಿದುಬರ್ತಿದೆ.

ಅವಶ್ಯಕತೆ ಇರುವವರಿಗೆ ಬೆಡ್​, ಆಮ್ಲಜನಕ ಹಾಗೂ ಔಷಧಿಗಳ ಪೂರೈಕೆಗೆ ಸಾಮಾಜಿಕ ಜಾಲತಾಣ ವೇದಿಕೆಯಾಗಿದೆ. ಇದೇ ರೀತಿ ಖಾಸಗಿ ಕಂಪನಿಯೊಂದರ 65 ವರ್ಷದ ನಿವೃತ್ತ ನೌಕರ ಮೋಹನ್​ ಕುಲಕರ್ಣಿ ತಮ್ಮ ಪಿಂಚಣಿ ಹಣದಲ್ಲಿ ಉಳಿಸಿದ್ದ ನಾಲ್ಕು ಲಕ್ಷ ರೂಪಾಯಿ ಜೊತೆಗೆ 2.5 ಲಕ್ಷ ರೂಪಾಯಿ ಸಾಲ ಪಡೆದು ಈ ಹಣವನ್ನ ಅಂಬರ್​ನಾಥ್​ ಆಸ್ಪತ್ರೆಗೆ ವೆಂಟಿಲೇಟರ್​ ಖರೀದಿ ಮಾಡಲು ನೀಡಿದ್ದಾರೆ.

ಮಹಾರಾಷ್ಟ್ರ, ಕೊರೊನಾ ಮೊದಲ ಅಲೆಯಂತೆ ಎರಡನೇ ಅಲೆಯಿಂದಲೂ ತತ್ತರಿಸಿ ಹೋಗಿದೆ. ಅಂಬರ್​ನಾಥ್​ನಲ್ಲೂ ದಿನಕ್ಕೆ 400 ಕೊರೊನಾ ಕೇಸ್​ಗಳು ವರದಿಯಾಗುತ್ತಿವೆ. ಈ ನಡುವೆ ಕೆಲ ನಗರ ಆಸ್ಪತ್ರೆಗಳು ಕೊರೊನಾ ವಿರುದ್ಧ ಇನ್ನಿಲ್ಲದ ಶ್ರಮ ಪಟ್ಟು ಹೋರಾಡುತ್ತಿದೆ.

ಸ್ಥಳೀಯ ನಗರ ಆಸ್ಪತ್ರೆಯ ವೈದ್ಯರು ವೈದ್ಯಕೀಯ ಉಪಕರಣಗಳ ಕೊರತೆ ಉಂಟಾಗಿದ್ದು ಕೈಗಾರಿಕೋದ್ಯಮಿಗಳು ದಯಮಾಡಿ ಧನಸಹಾಯ ಮಾಡಿ ಎಂದು ಮನವಿ ಮಾಡಿದ್ದರು. ಈ ಮನವಿ ಬಳಿಕ ನಿವೃತ್ತ ನೌಕರ ಕುಲಕರ್ಣಿ ತನ್ನೆಲ್ಲ ಉಳಿತಾಯದ ಹಣದ ಜೊತೆಗೆ ಇನ್ನೂ ಸ್ವಲ್ಪ ಹಣವನ್ನ ಸಾಲ ಮಾಡಿ ಆಸ್ಪತ್ರೆಗೆ ನೀಡಿದ್ದಾರೆ.

ಕುಲಕರ್ಣಿ ಮೊದಲು ಆಂಬುಲೆನ್ಸ್ ನೀಡಲು ನಿರ್ಧರಿಸಿದ್ದರು ಆದರೆ ಬಳಿಕ ಆಸ್ಪತ್ರೆಯಲ್ಲಿ ವೆಂಟಿಲೇಟರ್​​ ಇಲ್ಲ ಎಂದು ತಿಳಿದ ಬಳಿಕ ಈ ಹಣವನ್ನ ವೆಂಟಿಲೇಟರ್​​ಗೆ ನೀಡಿದ್ದಾರೆ. ತೀರಾ ಇತ್ತೀಚಿಗೆ ಕಾಂಜುಮಾರ್ಗ್​ಗೆ ಶಿಫ್ಟ್ ಆಗಿದ್ದ ಕುಲಕರ್ಣಿ ಕೆಲ ವರ್ಷಗಳ ಹಿಂದೆಯಷ್ಟೇ ಕ್ಯಾನ್ಸರ್​ನಿಂದ ಪತ್ನಿಯನ್ನ ಕಳೆದುಕೊಂಡಿದ್ದರು.