ದೇವಸ್ಥಾನ ಅಭಿವೃದ್ಧಿ ಕಾರ್ಯದ ವೇಳೆ 1000 ವರ್ಷದ ಹಿಂದಿನ ಕಟ್ಟಡ ಪತ್ತೆ

ಮಧ್ಯ ಪ್ರದೇಶದ ಉಜ್ಜಯಿನಿಯಲ್ಲಿರುವ ಮಹಾಕಾಳೇಶ್ವರ ದೇವಸ್ಥಾನದ ಸುತ್ತಲಿನ ಆವರಣವನ್ನು ಅಭಿವೃದ್ಧಿಪಡಿಸಲು ಹೊರಟ ಮಂದಿಗೆ ಸಾವಿರ ವರ್ಷಗಳ ಕಟ್ಟಡವೊಂದರ ಕುರುಹು ಕಾಣಿಸಿಕೊಂಡಿದೆ.

ಶುಕ್ರವಾರದಂದು ದೇಗುಲದ ಅಭಿವೃದ್ಧಿ ಕಾರ್ಯಕ್ಕೆಂದು ಸುತ್ತಲಿನ ಪ್ರದೇಶವನ್ನು ಅಗೆಯುತ್ತಿದ್ದ ವೇಳೆ ಈ ಕಟ್ಟಡದ ಅವಶೇಷ ಸಿಕ್ಕಿದ್ದು, ಕೂಡಲೇ ಅಗೆಯುವ ಕೆಲಸಕ್ಕೆ ತಾತ್ಕಾಲಿಕ ಬ್ರೇಕ್ ಬಿದ್ದಿದೆ. 20 ಅಡಿ ಆಳದಲ್ಲಿ ಸಿಕ್ಕ ಈ ಕಟ್ಟಡದಲ್ಲಿ ಮೆಟ್ಟಿಲುಗಳೂ ಸಹ ಕಂಡು ಬಂದಿವೆ ಎಂದು ದೇವಸ್ಥಾನದ ಆಡಳಿತ ತಿಳಿಸಿದೆ.

ಈ ಕಟ್ಟಡ ಏನಿಲ್ಲವೆಂದರೂ 1000 ವರ್ಷಗಳಷ್ಟು ಹಳೆಯದಾಗಿದೆ ಎಂದು ಪ್ರಾಚ್ಯವಸ್ತು ತಜ್ಞ ಡಾ. ರಾಮನ್ ಸೋಲಂಕಿ ತಿಳಿಸಿದ್ದಾರೆ. ಅವರ ಅನುಮತಿ ಸಿಗುವವರೆಗೂ ಅಗೆಯುವ ಕಾರ್ಯ ಮುಂದುವರೆಯುವುದಿಲ್ಲವೆಂದು ದೇಗುಲದ ಆಡಳಿತ ತಿಳಿಸಿದೆ. 12 ಜ್ಯೋತಿರ್ಲಿಂಗಗಳ ಪೈಕಿ ಉಜ್ಜಯಿನಿಯ ಮಹಾಕಾಳೇಶ್ವರನ ಲಿಂಗವೂ ಒಂದಾಗಿದೆ.