ʼಕೊರೊನಾʼ ಲಸಿಕೆ ಪರಿಣಾಮಕಾರತ್ವದ ಕುರಿತು​ ಅಧ್ಯಯನದಲ್ಲಿ ಮಹತ್ವದ ಮಾಹಿತಿ ಬಹಿರಂಗ

ತಮಿಳುನಾಡಿನಲ್ಲಿ 1 ಲಕ್ಷ ಪೊಲೀಸ್​ ಅಧಿಕಾರಿಗಳ ಮೇಲೆ ನಡೆಸಲಾದ ಸಮೀಕ್ಷೆಯಲ್ಲಿ ಈ ಪ್ರಮುಖ ಅಂಶ ತಿಳಿದುಬಂದಿದೆ.

ಈ ಸಂಬಂಧ ಟ್ವೀಟ್​ ಮಾಡಿರುವ ಐಸಿಎಂಆರ್​, ಕೊರೊನಾ ಲಸಿಕೆಯು ಮುಂಚೂಣಿ ಕೆಲಸಗಾರರಲ್ಲಿ ಸಾವಿನ ಪ್ರಮಾಣವನ್ನ ತಗ್ಗಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದೆ ಎಂಬುದು ಅಧ್ಯಯನದಲ್ಲಿ ತಿಳಿದು ಬಂದಿದೆ ಎಂದು ಹೇಳಿದೆ.

ಅಧ್ಯಯನದಲ್ಲಿ ತಿಳಿದು ಬಂದ ಮಾಹಿತಿಯ ಪ್ರಕಾರ, ಮೊದಲ ಡೋಸ್​ ಕೊರೊನಾ ಲಸಿಕೆಯನ್ನ ಪಡೆದ ಪೊಲೀಸರಲ್ಲಿ 82 ಪ್ರತಿಶತ ಹಾಗೂ ಎರಡೂ ಡೋಸ್​ ಲಸಿಕೆಗಳನ್ನ ಸ್ವೀಕರಿಸಿದವರಲ್ಲಿ 95 ಪ್ರತಿಶತ ಪರಿಣಾಮಕಾರತ್ವವನ್ನ ಕೋವಿಡ್​ ಲಸಿಕೆಗಳು ತೋರಿಸಿವೆ . ಈ ಅಧ್ಯಯನದ ಮಾಹಿತಿಯನ್ನ ಐಸಿಎಂಆರ್​​ ಇಂಡಿಯನ್​ ಜರ್ನಲ್​ ಆಫ್​​ ಮೆಡಿಕಲ್​ ರಿಸರ್ಚ್​ನಲ್ಲಿ ಪ್ರಕಟಿಸಿದೆ.

ತಮಿಳುನಾಡಿನ 1,17,524 ಪೊಲೀಸ್​ ಅಧಿಕಾರಿಗಳಲ್ಲಿ 32,792 ಮಂದಿ ಮೊದಲ ಡೋಸ್​ ಹಾಗೂ 67,673 ಮಂದಿ ಎರಡೂ ಡೋಸ್​ಗಳನ್ನ ಸ್ವೀಕಾರ ಮಾಡಿದ್ದಾರೆ. ಅಲ್ಲದೇ 17,059 ಮಂದಿ ಇಲ್ಲಿಯವರೆಗೆ ಯಾವುದೇ ಡೋಸ್​ನ್ನು ಸ್ವೀಕಾರ ಮಾಡಿಲ್ಲ.

ಏಪ್ರಿಲ್​ 13ರಿಂದ ಮೇ 14ರವರೆಗೆ ಕಲೆ ಹಾಕಲಾದ ಮಾಹಿತಿಯ ಪ್ರಕಾರ ತಮಿಳುನಾಡಿನಲ್ಲಿ 31 ಮಂದಿ ಪೊಲೀಸರು ಕೋವಿಡ್​ನಿಂದ ಸಾವನ್ನಪ್ಪಿದ್ದಾರೆ. ಇದರಲ್ಲಿ ನಾಲ್ವರು ಎರಡು ಡೋಸ್​, 7 ಮಂದಿ ಮೊದಲ ಡೋಸ್​ ಹಾಗೂ 20 ಮಂದಿ ಕೊರೊನಾ ಲಸಿಕೆಯನ್ನೇ ಸ್ವೀಕರಿಸಿರಲಿಲ್ಲ ಎಂದು ತಿಳಿದು ಬಂದಿದೆ.