ICMRನಿಂದ ಹೊಸ ಆವಿಷ್ಕಾರ, ಸೊಳ್ಳೆ, ನೊಣಗಳ ನಾಶಕ್ಕೆ ಸಿದ್ಧವಾಗಿದೆ ಹೊಸದೊಂದು ತಂತ್ರಜ್ಞಾನ

ಪುದುಚೇರಿಯಲ್ಲಿರುವ ಭಾರತೀಯ ವೈದ್ಯಕೀಯ ಸಂಶೋಧನಾ ಕೇಂದ್ರದಲ್ಲಿ (ICMR) ಸೊಳ್ಳೆ ಮತ್ತು ಕಪ್ಪು ನೊಣಗಳನ್ನ ಕೊಲ್ಲುವ ಹೊಸ ತಂತ್ರಜ್ಞಾನವನ್ನು ಆವಿಷ್ಕರಿಸಲಾಗಿದೆ. ಬ್ಯಾಸಿಲಸ್ ತುರಿಂಜಿಯೆನ್ಸಿಸ್ ಇಸ್ರೇಲೆನ್ಸಿಸ್ (ಬಿಟಿಐ ಸ್ಟ್ರೈನ್ ವಿಸಿಆರ್‌ಸಿ ಬಿ-17) ಎಂದು ಇದರ ಹೆಸರು. ಇದು ಇತರ ಪ್ರಾಣಿಗಳಿಗೆ ಹಾನಿಯಾಗದಂತೆ ಸೊಳ್ಳೆ ಮತ್ತು ಕಪ್ಪು ನೊಣಗಳನ್ನು  ಕೊಲ್ಲುತ್ತದೆ.

Bti ಬ್ಯಾಕ್ಟೀರಿಯಾವು ಸೊಳ್ಳೆ ನಿಯಂತ್ರಣಕ್ಕಾಗಿ ದಶಕಗಳಿಂದ ಬಳಕೆಯಲ್ಲಿದೆ. ಇದು ಇತರ ಪ್ರಾಣಿಗಳು ಮತ್ತು ಪರಿಸರಕ್ಕೆ ಸುರಕ್ಷಿತವೆಂದು ಪರಿಗಣಿಸಲಾಗಿದೆ. ಐಸಿಎಂಆರ್‌ ವೆಕ್ಟರ್ ಕಂಟ್ರೋಲ್ ರಿಸರ್ಚ್ ಸೆಂಟರ್‌ನ ನಿರ್ದೇಶಕ ಡಾ.ಅಶ್ವನಿ ಕುಮಾರ್ ಮಾತನಾಡಿ, ಇದು ಸೊಳ್ಳೆ ಮತ್ತು ಕಪ್ಪು ನೊಣಗಳನ್ನು ಮಾತ್ರ ಕೊಲ್ಲುತ್ತದೆ. ಇತರ ಯಾವುದೇ ಕೀಟಗಳು, ಜಲಚರ ಪ್ರಾಣಿಗಳು ಅಥವಾ ಸಸ್ತನಿಗಳಿಗೆ ಹಾನಿ ಮಾಡುವುದಿಲ್ಲ ಎಂದ್ರು.

Bti ತಂತ್ರಜ್ಞಾನ ಎಷ್ಟು ಪರಿಣಾಮಕಾರಿಯಾಗಿದೆ ಅಂದ್ರೆ WHO ಸ್ಟ್ಯಾಂಡರ್ಡ್ ಸ್ಟ್ರೈನ್ ಬ್ಯಾಕ್ಟೀರಿಯಾಕ್ಕೆ ಸಮನಾಗಿದೆ. Bti B-17 ಸ್ಟ್ರೈನ್ ವ್ಯಾಪಕ ಪರೀಕ್ಷೆಗಳಿಗೆ ಒಳಪಡಿಸಲಾಗಿದೆ. ಭಾರತೀಯ ಕೇಂದ್ರ ಕೀಟನಾಶಕ ಮಂಡಳಿ ಕೂಡ ಇದು  ಭಾರತೀಯ ಗುಣಮಟ್ಟದ ತಳಿ ಎಂಬ ದೃಢೀಕರಣ ನೀಡಿದೆ. ಹಾಗಾಗಿ ಈ ತಂತ್ರಜ್ಞಾನವನ್ನು ಬಳಸಲು 21 ಕಂಪನಿಗಳಿಗೆ ಪರವಾನಗಿ ನೀಡಲಾಗಿದೆ. Bti ವಾಣಿಜ್ಯ ಉತ್ಪಾದನೆಯು ಮಲೇರಿಯಾ, ಫೈಲೇರಿಯಾಸಿಸ್, ಜಪಾನೀಸ್ ಎನ್ಸೆಫಾಲಿಟಿಸ್, ಡೆಂಗ್ಯೂ, ಚಿಕೂನ್‌ಗುನ್ಯಾ ಮತ್ತು ಝಿಕಾ ಮುಂತಾದ  ರೋಗವಾಹಕಗಳಿಂದ ಹರಡುವ ಕಾಯಿಲೆಗಳ ವಿರುದ್ಧ ಹೋರಾಡಲು ಭಾರತಕ್ಕೆ ನೆರವಾಗುವುದರಲ್ಲಿ ಅನುಮಾನವೇ ಇಲ್ಲ.

ಕಳೆದ ತಿಂಗಳು ಕೇಂದ್ರ ಆರೋಗ್ಯ ಸಚಿವ ಮನ್ಸುಖ್ ಮಾಂಡವಿಯಾ,  ಭಾರತದಲ್ಲಿ ವಾಣಿಜ್ಯ ಉತ್ಪಾದನೆ ಮತ್ತು ಬಳಕೆಗಾಗಿ ಹಿಂದೂಸ್ತಾನ್ ಇನ್ಸೆಕ್ಟಿಸೈಡ್ಸ್ ಲಿಮಿಟೆಡ್‌ಗೆ ಬಿಟಿಐ ತಂತ್ರಜ್ಞಾನವನ್ನು ಹಸ್ತಾಂತರಿಸಿದ್ದರು. ಆಫ್ರಿಕನ್ ದೇಶಗಳಿಗೆ ಸಹ ಬಿಟಿಐ ಜೈವಿಕ ಲಾರ್ವಿಸೈಡ್‌ಗಳನ್ನು ರಫ್ತು ಮಾಡಲು ಸರ್ಕಾರಿ ಕಂಪನಿ ಮುಂದಾಗಿದೆ. Bti ನ ಸೊಳ್ಳೆ ಲಾರ್ವಿಸೈಡಲ್ ಚಟುವಟಿಕೆ ಬ್ಯಾಕ್ಟೀರಿಯಾದಲ್ಲಿರುವ ವಿಷದ ಕಾರಣದಿಂದಾಗಿರುತ್ತದೆ. ಸೊಳ್ಳೆ ಮತ್ತು ನೊಣಗಳು ಇದನ್ನು ಸೇವಿಸಿದಾಗ 10-30 ನಿಮಿಷಗಳಲ್ಲಿ ಅವುಗಳ ಕರುಳನ್ನು ನಾಶಮಾಡುತ್ತದೆ.

ವಿಶ್ವ ಆರೋಗ್ಯ ಸಂಸ್ಥೆ ಪ್ರಕಾರ, ವೆಕ್ಟರ್-ಹರಡುವ ರೋಗಗಳು ಎಲ್ಲಾ ಸಾಂಕ್ರಾಮಿಕ ರೋಗಗಳಲ್ಲಿ ಶೇ.17 ಕ್ಕಿಂತ ಹೆಚ್ಚು. ವಾರ್ಷಿಕವಾಗಿ 700,000 ಕ್ಕೂ ಹೆಚ್ಚು ಸಾವುಗಳಿಗೆ ಇವು ಕಾರಣವಾಗುತ್ತವೆ. ಅವು ಪರಾವಲಂಬಿಗಳು, ಬ್ಯಾಕ್ಟೀರಿಯಾ ಅಥವಾ ವೈರಸ್‌ಗಳಿಂದ ಉಂಟಾಗಬಹುದು. ಬಿಟಿಐ ತಂತ್ರಜ್ಞಾನದ ಅಂದಾಜು ಮಾರುಕಟ್ಟೆ ಗಾತ್ರವು ಭಾರತದಲ್ಲಿ ವಾರ್ಷಿಕವಾಗಿ 1,000 ಕೋಟಿಯಷ್ಟಿದೆ. ಇದು ಭಾರತವನ್ನು ಸ್ವಾವಲಂಬಿಯನ್ನಾಗಿ ಮಾಡುವುದರ ಜೊತೆಗೆ ಅನೇಕ ಮಾರಕ ರೋಗಗಳಿಂದಲೂ ಜನರನ್ನು ರಕ್ಷಿಸಲಿದೆ ಎಂಬ ಭರವಸೆ ವ್ಯಕ್ತವಾಗಿದೆ.

ಭಾರತದಲ್ಲಿ ಸೊಳ್ಳೆಗಳ ಕಾಟ ವಿಪರೀತವಾಗಿದ್ದು, ಮೇ ತಿಂಗಳವರೆಗೆ 10,172 ಡೆಂಗ್ಯೂ ಪ್ರಕರಣಗಳು ವರದಿಯಾಗಿದ್ದು, ಮೂರು ಸಾವುಗಳು ಸಂಭವಿಸಿವೆ. ಈ ವರ್ಷದ ಜೂನ್‌ವರೆಗೆ ಸುಮಾರು 1,554 ಚಿಕೂನ್‌ಗುನ್ಯಾ ಪ್ರಕರಣಗಳು ವರದಿಯಾಗಿವೆ. ಏಪ್ರಿಲ್‌ವರೆಗಿನ ಅಂಕಿ ಅಂಶಗಳ ಪ್ರಕಾರ 21,558 ಮಲೇರಿಯಾ ಪ್ರಕರಣಗಳು ಮತ್ತು ನಾಲ್ಕು ಸಾವುಗಳು ವರದಿಯಾಗಿವೆ.