ಮಾನವನ ಅಸ್ತಿತ್ವದ ಕುರಿತಂತೆ ಸಂಶೋಧನೆಯಲ್ಲಿ ಮಹತ್ವದ ಮಾಹಿತಿ ಬಹಿರಂಗ

ಅಮೆರಿಕ ನ್ಯೂ ಮೆಕ್ಸಿಕೋದಲ್ಲಿ ಇತ್ತೀಚಿಗೆ ಹೆಜ್ಜೆ ಗುರುತುಗಳ ಪಳೆಯುಳಿಕೆ ಪತ್ತೆಯಾಗಿದ್ದು ಇದರಿಂದಾಗಿ ಸರಿ ಸುಮಾರು 23 ಸಾವಿರ ವರ್ಷಗಳ ಹಿಂದೆಯಿಂದಲೂ ಉತ್ತರ ಅಮೆರಿಕ ಭಾಗದಲ್ಲಿ ಮಾನವರು ಇದ್ದರು ಎಂಬುದು ಸಾಬೀತಾಗಿದೆ.

ಬೌರ್ನ್​ಮೌತ್​​ ವಿಶ್ವವಿದ್ಯಾಲಯವು ಮಾನವ ಅಸ್ತಿತ್ವದ ಕುರಿತಂತೆ ಮಹತ್ವದ ಮಾಹಿತಿಯನ್ನು ಹಂಚಿಕೊಂಡಿದೆ.

ಇಲ್ಲಿಯವರೆಗೆ ಅಮೆರಿಕ ಖಂಡದಲ್ಲಿ 13 ಸಾವಿರದಿಂದ 16 ಸಾವಿರ ವರ್ಷಗಳ ಹಿಂದೆಯಿಂದ ಮಾನವರು ಇದ್ದರು ಎಂದು ತಿಳಿಯಲಾಗಿತ್ತು.

ಆದರೆ ಈ ಹೊಸ ಅನ್ವೇಷಣೆಯ ಬಳಿಕ ಅಮೆರಿಕದಲ್ಲಿ 23 ಸಾವಿರ ವರ್ಷಗಳ ಹಿಂದೆಯಿಂದಲೇ ಮಾನವರು ಇದ್ದರು ಎಂದು ಸೂಚಿಸುತ್ತಿದೆ. ಇದನ್ನು ಅಮೆರಿಕದ ಪ್ರಮುಖ ಪುರಾತತ್ವ ಸಾಧನೆ ಎಂದು ಪರಿಗಣಿಸಲಾಗಿದೆ.

ವರದಿಗಳ ಪ್ರಕಾರ, ಬ್ರಿಟನ್​ ಹಾಗೂ ಅಮೆರಿಕ ಪುರಾತತ್ವತಜ್ಞರು ಅಲ್ಕಕಿ ಫ್ಲಾಟ್​ ಹೆಸರಿನ ಸರೋವರದಲ್ಲಿ ಪತ್ತೆ ಮಾಡಲಾದ ಮಾನವ ಹೆಜ್ಜೆಗುರುತುಗಳನ್ನು ಆಧರಿಸಿ ಈ ಸಂಶೋಧನೆಯನ್ನು ಮಾಡಿದ್ದಾರೆ.

ನ್ಯೂ ಮೆಕ್ಸಿಕೋದ ವೈಟ್​ ಸ್ಯಾಂಡ್ಸ್​​ ರಾಷ್ಟ್ರೀಯ ಉದ್ಯಾನವನದಲ್ಲಿ ಮಾನವನ ಮಣ್ಣಿನ ಹೆಜ್ಜೆ ಗುರುತುಗಳು ಕಾಣಸಿಕ್ಕಿವೆ. ಅಮೆರಿಕದ ಜಿಯೋಲಾಜಿಕಲ್​​ ಸರ್ವೇ ತಜ್ಞರು ರೆಡಿಯೋ ಕಾರ್ಬನ್​ ಡೇಟಿಂಗ್​ ಸಹಾಯದಿಂದ ಸುಮಾರು 20 ಸಾವಿರ ವರ್ಷಗಳಲ್ಲಿ ಇಲ್ಲಿ ಹೆಜ್ಜೆ ಗುರುತು ರೂಪುಗೊಂಡಿರುವುದನ್ನು ಕಂಡುಹಿಡಿದಿದ್ದಾರೆ.