ನಟಿ ಮಾಧುರಿ ದೀಕ್ಷಿತ್​​ ಕುರಿತು ಅಭಿಮಾನಿಗಳಿಗೆ ಇಲ್ಲಿದೆ ಇಂಟ್ರಸ್ಟಿಂಗ್‌ ಮಾಹಿತಿ

ಬಾಲಿವುಡ್​ ಡ್ಯಾನ್ಸಿಂಗ್ ದೀವಾ​ ಮಾಧುರಿ ದೀಕ್ಷಿತ್​​ ಅಂದರೆ ಮೊದಲು ನೆನಪಾಗೋದೇ ಅವರ ಅಪ್ರತಿಮ ನೃತ್ಯ ಶೈಲಿ. ತಮ್ಮ ಅತ್ಯದ್ಭುತ ನೃತ್ಯದ ಮೂಲಕವೇ ಮಾಧುರಿ ದೀಕ್ಷಿತ ಬಾಲಿವುಡ್​ ಸಿನಿ ಲೋಕದಲ್ಲಿ ಅಚ್ಚಳಿಯದ ಹೆಜ್ಜೆಯನ್ನ ಮೂಡಿಸಿದ್ದಾರೆ. ದಿಲ್​, ಸಾಜನ್, ಖಳನಾಯಕ್​, ಬೇಟಾ, ಪುಕಾರ್​ ಸೇರಿದಂತೆ ಸಾಕಷ್ಟು ಜನಪ್ರಿಯ ಸಿನಿಮಾಗಳಲ್ಲಿ ಮಾಧುರಿ ಅಭಿನಯಿಸಿದ್ದಾರೆ.

1994ರಲ್ಲಿ ತೆರೆಕಂಡ ಅಂಜಾಮ್​ ಸಿನಿಮಾದ ಅಠಾರಹ್​​ ಸಾಲ್​ ಕುನ್ವಾರಿ ಕಲಿ ಎಂಬ ಹಾಡು ಮಾಧುರಿ ದೀಕ್ಷಿತ್​​ರಿಗೆ ಸಿಕ್ಕಾಪಟ್ಟೆ ಜನಪ್ರಿಯತೆ ತಂದುಕೊಟ್ಟಿತು. ಇದೀಗ ನಟಿ ಮೇ 15 ಕ್ಕೆ 54 ನೇ ವಸಂತಕ್ಕೆ ಕಾಲಿಟ್ಟಿದ್ರೂ ಸಹ ಈ ಹಾಡು ಇನ್ನೂ ಚಿರಪರಿಚಿತವಾಗಿದೆ. ಇದರ ಜೊತೆಯಲ್ಲಿ ʼಏಕ್​ ದೋ ತೀನ್ʼ​ ಹಾಡು ಸಹ ಮಾಧುರಿ ದೀಕ್ಷಿತ್​ರ ಫೇಮಸ್​ ಸಾಂಗ್​ಗಳಲ್ಲಿ ಒಂದಾಗಿದೆ.

ಮಾಧುರಿ ದೀಕ್ಷಿತ್​ ಡ್ಯಾನ್ಸಿಂಗ್​ ದೀವಾ ಅನ್ನೋದು ಎಲ್ಲರಿಗೂ ತಿಳಿದಿರೋ ವಿಚಾರ. ಆದರೆ ಇವರು ಕೇವಲ 9 ವರ್ಷ ವಯಸ್ಸಿನವರಾಗಿದ್ದಲೇ ಕಥಕ್​ ನರ್ತಕಿಯಾಗಿ ವಿದ್ಯಾರ್ಥಿವೇತನವನ್ನ ಪಡೆದಿದ್ದರು.

ಗುರು ಪೂರ್ಣಿಮಾದಂದು ನೃತ್ಯ ಮಾಡಿದ್ದ ಹಿನ್ನೆಲೆ ಮಾಧುರಿ ದೀಕ್ಷಿತ್​ ಕೇವಲ 7-8 ವರ್ಷ ಪ್ರಾಯದವರಾಗಿದ್ದಲೇ ದಿನಪತ್ರಿಕೆಯಲ್ಲಿ ಅವರ ಬಗ್ಗೆ ಮೊದಲ ಬಾರಿಗೆ ಸುದ್ದಿ ಪ್ರಕಟವಾಗಿತ್ತು.

ಕಲಾವಿದ ಎಂ.ಎಫ್.​ ಹುಸೇನ್​​ ಮಾಧುರಿ ದೀಕ್ಷಿತ್​​ ಅಭಿನಯಕ್ಕೆ ಎಷ್ಟರ ಮಟ್ಟಿಗೆ ಮಾರು ಹೋಗಿದ್ದರು ಅಂದರೆ ʼಹಮ್​ ಆಪ್​ ಕೆ ಹೈ ಕೌನ್ʼ​ ಸಿನಿಮಾವನ್ನ ಬರೋಬ್ಬರಿ 67 ಬಾರಿ ವೀಕ್ಷಿಸಿದ್ದರು. ಅಲ್ಲದೇ ಆಜಾ ನಚಲೆ ಸಿನಿಮಾ ತೆರೆ ಕಂಡ ವೇಳೆ ಸಂಪೂರ್ಣ ಥಿಯೇಟರ್​ನ್ನ ಒಬ್ಬರೇ ಬುಕ್​ ಮಾಡಿದ್ದರು.

ಹುಸೇನ್​ ಪಾಲಿಗೆ ಮಾಧುರಿ ದೀಕ್ಷಿತ್​ ಬಹಳ ವಿಶೇಷ ವ್ಯಕ್ತಿ ಆಗಿದ್ದರು. 2000ದಲ್ಲಿ ಮೊದಲ ಸಿನಿಮಾ ಗಜ ಗಾಮಿನಿಯನ್ನ ನಿರ್ದೇಶಿಸಿದ್ದ ಹುಸೇನ್​​ ಈ ಸಿನಿಮಾದಲ್ಲಿ ಮಾಧುರಿ ದೀಕ್ಷಿತ್​ಗೆ ಐದು ಪಾತ್ರಗಳನ್ನ ನೀಡಿದ್ದರು.

ಆಗ ನಾಯಕ ನಟನಿಗೆ ಹೆಚ್ಚು ಸಂಭಾವನೆ ದೊರೆಯುತ್ತಿದ್ದ ಕಾಲ. ಆದರೆ ಮಾಧುರಿ ದೀಕ್ಷಿತ್​​ರ ಜನಪ್ರಿಯತೆ ಎಷ್ಟಿತ್ತು ಅಂದರೆ ಈ ಮಾತು ಅವರ ಜೀವನದಲ್ಲಿ ಸುಳ್ಳಾಯಿತು. ಮಾಧುರಿ ತಮ್ಮ ಸಿನಿಮಾದಲ್ಲಿ ನಾಯಕ ನಟನಿಗಿಂತ ಹೆಚ್ಚು ಸಂಭಾವನೆ ಪಡೆದಿದ್ದರು. ಹಮ್​ ಆಪ್​ ಕೆ ಹೈ ಕೌನ್​ ಸಿನಿಮಾದಲ್ಲಿ ಮಾಧುರಿ ಸಲ್ಮಾನ್​​ ಖಾನ್​ಗಿಂತ ಹೆಚ್ಚು ಮೊತ್ತದ ಸಂಭಾವನೆಯನ್ನ ಪಡೆದಿದ್ದರು.

ಮಾಧುರಿ ದೀಕ್ಷಿತ್​​ ಮಹಾರಾಷ್ಟ್ರದ ಕೊಕನಸ್ತಾ ಬ್ರಾಹ್ಮಣ ಕುಟುಂಬದಲ್ಲಿ ಶಂಕರ್​ ಹಾಗೂ ಸ್ನೇಹಲತಾ ದೀಕ್ಷಿತ್​ ದಂಪತಿಯ ಪುತ್ರಿಯಾಗಿ ಜನಿಸಿದ್ರು. ಡಿವೈನ್​ ಚೈಲ್ಡ್​ ಹೈಸ್ಕೂಲ್​​ನಲ್ಲಿ ಮಾಧುರಿ ಶಿಕ್ಷಣವನ್ನ ಪಡೆದ್ರು.

1984ರಲ್ಲಿ ರಾಜಶ್ರೀ ಪ್ರೊಡಕ್ಷನ್​​ನಲ್ಲಿ ಮಾಧುರಿ ತಮ್ಮ ಸಿನಿ ಜರ್ನಿಯನ್ನ ಆರಂಭಿಸಿದರು. ಪ್ರಖ್ಯಾತ ನಟ ಹಾಗೂ ರಾಜಕಾರಣಿ ದಿವಂಗತ ತಾಪಸ್​ ಪೌಲ್​ಗೆ ಸಹನಟಿಯಾಗಿ ಮಾಧುರಿ ನಟಿಸಿದ್ದರು.