ಕೊರೊನಾ ಲಸಿಕೆ ಸ್ವೀಕರಿಸದವರಿಗೆ ಸಾರ್ವಜನಿಕ ಸೇವೆ ʼಬಂದ್ʼ​ ಮಾಡಿದೆ ಈ ಪಾಲಿಕೆ..!

ಕೋವಿಡ್​ 19 ಲಸಿಕೆಯನ್ನು ಜನರಿಗೆ ನೀಡುವ ಸಲುವಾಗಿ ದೇಶದ ಪ್ರತಿಯೊಂದು ರಾಜ್ಯಗಳು ಒಂದಿಲ್ಲೊಂದು ಸರ್ಕಸ್​ ಮಾಡುತ್ತಲೇ ಇದೆ. ಇದೀಗ ಗುಜರಾತ್​​ನ ಅಹಮದಾಬಾದ್​​ನಲ್ಲಿ ಕೊರೊನಾ ಲಸಿಕೆ ಪಡೆಯದವರಿಗೆ ಸಾರ್ವಜನಿಕ ಸೌಲಭ್ಯಗಳನ್ನು ಬಳಸದಂತೆ ತಾಕೀತು ಮಾಡಲಾಗಿದೆ.

ಕೊರೊನಾ 2 ಡೋಸ್​ಗಳಲ್ಲಿ ಕನಿಷ್ಟ 1 ಡೋಸ್​ನ್ನೂ ಸ್ವೀಕರಿಸದವರು ಸಾರ್ವಜನಿಕ ಸಾರಿಗೆ, ಸಾರ್ವಜನಿಕ ಕಟ್ಟಡಗಳಿಗೆ ಎಂಟ್ರಿ ನೀಡುವಂತಿಲ್ಲ ಎಂದು ಅಹಮದಾಬಾದ್​ ನಗರ ಪಾಲಿಕೆ ಖಡಕ್​ ಸೂಚನೆ ನೀಡಿದೆ. ಸೆಪ್ಟೆಂಬರ್​ 20ರಿಂದ ಈ ಆದೇಶ ಜಾರಿಗೆ ಬರಲಿದೆ.

ಕೊರೊನಾ ಲಸಿಕೆಯ ಕನಿಷ್ಟ 1 ಡೋಸ್​ ಸ್ವೀಕರಿಸದವರು ಸೋಮವಾರದಿಂದ ನಗರ ಸಾರಿಗೆ ಸೇವೆ, ಕಂಕಾರಿಯಾ ಸರೋವರದ ಮುಂಭಾಗ, ಸಾಬರಮತಿ ನದಿ ತೀರ, ಗ್ರಂಥಾಲಯಗಳು, ಜಿಮ್​, ಕ್ರೀಡಾ ಸಂಕೀರ್ಣ ಸೇರಿದಂತೆ ಹಲವೆಡೆ ಪ್ರವೇಶಿಸುವಂತಿಲ್ಲ ಎಂದು ಎಎಂಸಿ ಆಯುಕ್ತ ಮುಖೇಶ್​ ಕುಮಾರ್​ ಹೇಳಿದ್ದಾರೆ.

ಒಂದು ಹಾಗೂ ಎರಡು ಡೋಸ್​ ಲಸಿಕೆ ಪಡೆದವರು ಮಾತ್ರ ನಗರದಲ್ಲಿ ಸಂಚಾರ ಮಾಡಬಹುದಾಗಿದೆ. ಈ ಪ್ರದೇಶಗಳಲ್ಲಿ ಕೊರೊನಾ ಲಸಿಕೆ ಪ್ರಮಾಣ ಪತ್ರಗಳನ್ನು ಪರಿಶೀಲಿಸಲಾಗುತ್ತದೆ. ಇದು ಸೆಪ್ಟೆಂಬರ್​ 20ರಿಂದ ಜಾರಿಗೆ ಬರಲಿದೆ ಎಂದು ಕುಮಾರ್​ ಟ್ವೀಟಾಯಿಸಿದ್ದಾರೆ.