ಗ್ರಾಹಕನ ವಿಚ್ಛೇದಿತ ಪತ್ನಿಗೆ ಡೆಬಿಟ್​ ಕಾರ್ಡ್ ಕಳುಹಿಸಿ ಪೇಚಿಗೆ ಸಿಲುಕಿದ ಬ್ಯಾಂಕ್​…..!

ತನ್ನ ಗ್ರಾಹಕನ ಎಟಿಎಂ ಕಾರ್ಡ್​ನ್ನು ತಪ್ಪಾಗಿ ವಿಚ್ಛೇದಿತ ಪತ್ನಿಯ ವಿಳಾಸಕ್ಕೆ ಕಳುಹಿಸಿದ ಕಾರಣಕ್ಕೆ ಅಹಮದಾಬಾದ್​​ನ ಬ್ಯಾಂಕ್​ ಒಂದು ಪೇಚಿಗೆ ಸಿಲುಕಿದೆ. ವಿನೋದ್​ ಭಾಯ್​ ಜೋಶಿಯವರಿಗೆ ಸೇರಬೇಕಾದ ಎಟಿಎಂ ಕಾರ್ಡ್​ನ್ನು ಆ್ಯಕ್ಸಿಸ್ ಬ್ಯಾಂಕ್​ ತಪ್ಪಾಗಿ ಅವರ ವಿಚ್ಚೇದಿತ ಪತ್ನಿಯ ವಿಳಾಸಕ್ಕೆ ಕಳುಹಿಸಿತ್ತು. ಈ ಸಂಬಂಧ ವಿಚಾರಣೆ ಆಲಿಸಿದ ಗುಜರಾತ್​​ ಗ್ರಾಹಕ ವಿವಾದ ಪರಿಹಾರ ಆಯೋಗವು ಕಾರ್ಡ್​ನಿಂದ ಡ್ರಾ ಮಾಡಲಾದ 1.66 ಲಕ್ಷ ರೂಪಾಯಿಗಳನ್ನು 7 ಪ್ರತಿಶತ ಬಡ್ಡಿಯೊಂದಿಗೆ ಜೋಶಿಗೆ ಪಾವತಿಸುವಂತೆ ಆ್ಯಕ್ಸಿಕ್​ ಬ್ಯಾಂಕ್​ಗೆ ನಿರ್ದೇಶನ ನೀಡಿದೆ.‌

ಕಾಲೋಲ್​ ಪಟ್ಟಣದ ನರ್ದಿಪುರದ ನಿವಾಸಿಯಾಗಿದ್ದ ಜೋಶಿ ಆ್ಯಕ್ಸಿಸ್​ ಬ್ಯಾಂಕ್​ನಲ್ಲಿ ತಮ್ಮ ಪುತ್ರನ ಜೊತೆಗೆ ಜಂಟಿ ಖಾತೆಯನ್ನು ಹೊಂದಿದ್ದರು. ಡೆಬಿಟ್​ ಕಾರ್ಡ್​ನ್ನು ಪುತ್ರ ಹಾಗೂ ತಂದೆ ಇಬ್ಬರೂ ಬಳಕೆ ಮಾಡುತ್ತಿದ್ದರು. ತಮ್ಮ ಕಾರ್ಡ್​ನ್ನು ಕಳೆದುಕೊಂಡ ಬಳಿಕ 2009ರ ಸೆಪ್ಟೆಂಬರ್​​ ತಿಂಗಳಲ್ಲಿ ಬ್ಯಾಂಕ್​​ ಹೊಸ ಕಾರ್ಡ್​ನ್ನು ಕಳುಹಿಸಿಕೊಟ್ಟಿತ್ತು. ಆದರೆ ಈ ಹೊಸ ಕಾರ್ಡ್​ ಜೋಶಿ ಕೈ ಸೇರಿರಲಿಲ್ಲ.

2010ರ ಆಗಸ್ಟ್​ 26ರಂದು ಜೋಶಿ ಚೆಕ್​ನ ಮೂಲಕ 10 ಸಾವಿರ ರೂಪಾಯಿ ಡ್ರಾ ಮಾಡಲು ಮುಂದಾದಾಗ ಖಾತೆಯಲ್ಲಿ ಅಷ್ಟೊಂದು ಹಣ ಇಲ್ಲ ಎಂಬ ವಿಚಾರ ಜೋಶಿ ಗಮನಕ್ಕೆ ಬಂದಿದೆ. ಈ ಬಗ್ಗೆ ವಿಚಾರಣೆ ಮಾಡಿ ನೋಡಿದಾಗ ಬ್ಯಾಂಕ್​ 2009ರಲ್ಲಿ ಹೊಸ ಕಾರ್ಡ್​ನ್ನು ಜೋಶಿಯ ವಿಚ್ಚೇದಿತ ಪತ್ನಿಯ ವಿಳಾಸಕ್ಕೆ ಕಳುಹಿಸಿದೆ ಎಂದು ತಿಳಿದುಬಂದಿದೆ.

ಡೆಬಿಟ್​ ಕಾರ್ಡ್​ನಿಂದ ಬ್ಯಾಂಕ್​ನಲ್ಲಿದ್ದ 1,66,900 ರೂಪಾಯಿ ಹಣವನ್ನು ಡ್ರಾ ಮಾಡಲಾಗಿತ್ತು. ಈ ಬಳಿಕ ನ್ಯಾಯಕ್ಕಾಗಿ ಜೋಶಿ ಗ್ರಾಹಕರ ವಿವಾದ ಪರಿಹಾರ ವೇದಿಕೆ ಮೆಟ್ಟಿಲೇರಿದ್ದರು.

ಈ ಸಂಬಂಧ ವಿಚಾರಣೆ ಆಲಿಸಿದ ಆಯೋಗವು​ ಈ ಎಲ್ಲಾ ಪ್ರಮಾದಗಳಿಗೆ ಬ್ಯಾಂಕ್​ ಸಿಬ್ಬಂದಿಯೇ ನೇರ ಕಾರಣ. ಹೀಗಾಗಿ ಈ ಹಣವನ್ನು ಜೋಶಿ ಖಾತೆಗೆ ಹಾಕುವಂತೆ ಬ್ಯಾಂಕ್​​ಗೆ ನಿರ್ದೇಶನ ನೀಡಲಾಗಿದೆ.