ಶಾಲಾ ಮಕ್ಕಳಿಗೆ ಭರ್ಜರಿ ಗುಡ್ ನ್ಯೂಸ್: ಬ್ಯಾಗ್​ ಹೊರೆ ಇಳಿಸಲು ಮುಂದಾದ ಶಿಕ್ಷಣ ಇಲಾಖೆ

2ನೇ ತರಗತಿಯವರೆಗೆ ಮಕ್ಕಳಿಗೆ ಹೋಂ ವರ್ಕ್​ ನಿಷಿದ್ಧ, ಶಾಲೆಯಲ್ಲಿ ಮಕ್ಕಳಿಗೆ ಲಾಕರ್​ ಸೌಕರ್ಯ, ಡಿಜಿಟಲ್​ ತೂಕದ ಮಷಿನ್​, ಶುದ್ಧ ಕುಡಿಯುವ ನೀರು ಪೂರೈಕೆ ಸೇರಿದಂತೆ ವಿವಿಧ ಸೌಕರ್ಯಗಳನ್ನ ಒದಗಿಸುವ ಪ್ರಸ್ತಾವನೆಯನ್ನ ಶಿಕ್ಷಣ ಸಚಿವಾಲಯ ಶಿಫಾರಸ್ಸು ಮಾಡಿದೆ. ಹೊಸ ಶಿಕ್ಷಣ ನೀತಿಯ ಅನುಸಾರ 1 ರಿಂದ 10 ನೇ ತರಗತಿಯ ವಿದ್ಯಾರ್ಥಿಗಳ ಶಾಲಾ ಬ್ಯಾಗ್​ ತೂಕ ಅವರ ದೇಹದ ತೂಕಕ್ಕಿಂತ ಕನಿಷ್ಟ 10 ಪ್ರತಿಶತದಷ್ಟೂ ಹೆಚ್ಚಿರಬಾರದು ಅಂತಾ ಶಿಕ್ಷಣ ಇಲಾಖೆ ಸಲಹೆ ನೀಡಿದೆ.

ಆಯ್ದ ಪ್ರದೇಶಗಳಲ್ಲಿ ನಡೆಸಿದ ಸಂಶೋಧನಾ ಅಧ್ಯಯನಗಳನ್ನ ಆಧರಿಸಿ 1 ರಿಂದ 10ನೇ ತರಗತಿಯ ವಿದ್ಯಾರ್ಥಿಗಳ ದೇಹದ ತೂಕ ಹಾಗೂ ಬ್ಯಾಗ್​ನ ತೂಕದ ಅನುಪಾತವನ್ನ ಶಿಕ್ಷಣ ಇಲಾಖೆ ಶಿಫಾರಸು ಮಾಡಿದೆ. ಅಲ್ಲದೇ ಮಕ್ಕಳ ತೂಕ ಹಾಗೂ ಅವರ ಬ್ಯಾಗ್​ ತೂಕವನ್ನ ಎಣಿಸಲು ಪ್ರತಿಯೊಂದು ಶಾಲೆಯಲ್ಲೂ ಡಿಜಿಟಲ್​ ತೂಕದ ಮಷಿನ್​ ಅಳವಡಿಸಬೇಕು ಎಂದೂ ಹೇಳಿದೆ.

ಶಾಲಾ ಬ್ಯಾಗ್​ಗಳು ಹಗುರವಾಗಿರಬೇಕು. ಹಾಗೂ ಮಕ್ಕಳ ಭುಜಕ್ಕೆ ಯಾವುದೇ ರೀತಿಯ ಒತ್ತಡ ಬೀಳದಂತೆ ವಿನ್ಯಾಸಗೊಳಿಸಿದ ಬ್ಯಾಗ್​ಗಳನ್ನ ಹೊಂದಿರಬೇಕು. ಮೆಟ್ಟಿಲು ಹತ್ತಿ ಇಳಿಯುವಾಗ ಮಕ್ಕಳಿಗೆ ಕಿರಿಕಿರಿಯುಂಟು ಮಾಡುವಂತಹ ಚಕ್ರಗಳುಳ್ಳ ಬ್ಯಾಗ್​ಗಳನ್ನ ವಿದ್ಯಾರ್ಥಿಗಳು ಬಳಸದಂತೆ ನೋಡಿಕೊಳ್ಳಬೇಕು.
ಇವೆಲ್ಲದರ ಜೊತೆಗೆ ಶಾಲೆಯಲ್ಲಿ ಮಧ್ಯಾಹ್ನದ ಊಟ ಗುಣಮಟ್ಟದ್ದಾಗಿರಬೇಕು. ಮಕ್ಕಳು ಶಾಲೆಗೆ ನೀರಿನ ಬಾಟಲಿ ಕೊಂಡೊಯ್ಯುವುದನ್ನ ತಪ್ಪಿಸುವ ಸಲುವಾಗಿ ಶಾಲೆಗಳಲ್ಲಿ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆಯಾಗಿರಬೇಕು. ಇವೆಲ್ಲವೂ ಶಾಲೆಯ ನಿರ್ವಹಣೆ ಮಾಡುವವರ ಜವಾಬ್ದಾರಿ ಎಂದು ಹೇಳಲಾಗಿದೆ.