ನೂತನ ಸಿಜೆ ಕುಟುಂಬದ ಈ ವಿಶೇಷ ಪರಂಪರೆ ಮುಂದುವರಿಕೆ

ಭಾರತದ 49 ನೇ ಮುಖ್ಯ ನ್ಯಾಯಮೂರ್ತಿಯಾಗಿ ಯು.ಯು. ಲಲಿತ್​ ಶನಿವಾರ ಪ್ರಮಾಣ ವಚನ ಸ್ವೀಕರಿಸಿದಾಗ ಹೊಸದೊಂದು ದಾಖಲೆಯಾಗಿದೆ.

ನ್ಯಾ.ಯು.ಯು ಲಲಿತ್​ ಅವರ ಅಜ್ಜ ರಂಗನಾಥ್​ ಲಲಿತ್​ ಸೊಲ್ಲಾಪುರದಲ್ಲಿ ಭಾರತ ಸ್ವತಂತ್ರವಾಗುವುದಕ್ಕೆ ಮುಂಚೆಯೇ ವಕೀಲರಾಗಿದ್ದರು. ಇದೀಗ ಮುಖ್ಯ ನಾಯಮೂರ್ತಿಯಾಗುವ ಮೂಲಕ ಅವರ ಕುಟುಂಬ ಪರಂಪರೆಯನ್ನು ಮುಂದೆ ತೆಗೆದುಕೊಂಡುಹೋಗಿದ್ದು, ಅದು ನೂರು ವರ್ಷವಾಗುತ್ತಿದೆ ಎಂಬುದು ವಿಶೇಷ.

ನ್ಯಾ.ಯು.ಯು ಲಲಿತ್​ ಅವರ ತಂದೆ -ಕೂಡ ಹೈಕೋರ್ಟ್​ ನ್ಯಾಯಾಧೀಶರಾಗಿ ಸೇವೆ ಸಲ್ಲಿಸಿದ್ದರು.
ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಪ್ರಮಾಣ ವಚನ ಸ್ವೀಕಾರದ ನಂತರ ನ್ಯಾಯಮೂರ್ತಿ ಲಲಿತ್​ ಅವರು 90 ವರ್ಷದ ತಂದೆ ಉಮೇಶ್​ ರಂಗನಾಥ್​ ಲಲಿತ್​ ಅವರ ಪಾದಗಳನ್ನು ಸ್ಪರ್ಶಿಸಿದ್ದು ಎಲ್ಲರ ಗಮನ ಸೆಳೆಯಿತು. ಉಮೇಶ್​ ಅವರು ತವರು ಮಹಾರಾಷ್ಟ್ರದಲ್ಲಿ ವಕೀಲರಾಗಿದ್ದರು.

ನೊಯ್ಡಾದಲ್ಲಿ ಶಾಲೆಯನ್ನು ನಡೆಸುತ್ತಿರುವ ನ್ಯಾಯಮೂರ್ತಿ ಲಲಿತ್​ ಅವರ ಪತ್ನಿ ಅಮಿತಾ ಲಲಿತ್​, ಇಬ್ಬರು ಪುತ್ರರಾದ ಹರ್ಷದ್​ ಮತ್ತು ಶ್ರೀಯಶ್​ ಸಹ ಶನಿವಾರದ ಕಾರ್ಯಕ್ರಮದಲ್ಲಿ ಪ್ರೇಕ್ಷಕರ ಸಾಲಲ್ಲಿ ಉಪಸ್ಥಿತರಿದ್ದರು. ಪುತ್ರರಿಬ್ಬರೂ ಇಂಜಿನಿಯರಿಂಗ್​ ಓದಿದ್ದರೆ, ಶ್ರೀಯಶ್​ ಲಲಿತ್​ ಕಾನೂನು ಪದವಿಯನ್ನೂ ಸಹ ಪಡೆದಿದ್ದು, ಅವರ ಪತ್ನಿ ರವೀನಾ ಕೂಡ ವಕೀಲೆ.

ಹೊಸ ಸಿಜೆಐ 74 ದಿನಗಳ ಅಧಿಕಾರಾವಧಿಯನ್ನು ಹೊಂದಿದ್ದು, ನವೆಂಬರ್​ 8 ರಂದು 65 ವರ್ಷ ತಲುಪುತ್ತಿದ್ದಂತೆ ಅಧಿಕಾರವನ್ನು ತ್ಯಜಿಸುತ್ತಾರೆ. ಅವರು 100 ದಿನಗಳಿಗಿಂತ ಕಡಿಮೆ ಅವಧಿ ಹೊಂದಿರುವ ಸಿಜೆಐ ಆಗಿದ್ದಾರೆ.

ನ್ಯಾಯಮೂತಿರ್ ಡಿ.ವೈ. ಚಂದ್ರಚೂಡ್​ ಅವರು ನ್ಯಾಯಮೂರ್ತಿ ಲಲಿತ್​ ನಂತರ ಅತ್ಯಂತ ಹಿರಿಯ ನ್ಯಾಯಾಧೀಶರಾಗಿದ್ದು, ಮುಖ್ಯ ನ್ಯಾಯಮೂರ್ತಿಯಾಗಲು ನಂತರದ ಸರತಿಯಲ್ಲಿದ್ದಾರೆ.