BIG BREAKING: ಇಸ್ಲಾಮಿ ಸಂಘಟನೆ PFI ಗೆ ED ಬಿಗ್ ಶಾಕ್: ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ 33 ಖಾತೆ ಫ್ರೀಜ್

ನವದೆಹಲಿ: ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಇಸ್ಲಾಮಿ ಸಂಘಟನೆ ಪಿಎಫ್ಐ ನ ಕನಿಷ್ಠ 33 ಬ್ಯಾಂಕ್ ಖಾತೆಗಳನ್ನು ಜಾರಿ ನಿರ್ದೇಶನಾಲಯ ಫ್ರೀಜ್ ಮಾಡಿದೆ. ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆ(ಪಿಎಂಎಲ್‌ಎ) ಅಡಿಯಲ್ಲಿ ಈ ಆದೇಶ ಹೊರಡಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾದ(ಪಿಎಫ್‌ಐ) 59,12,051 ರೂ. ಇರುವ 10 ಖಾತೆಗಳು, ರಿಹಬ್ ಇಂಡಿಯಾ ಫೌಂಡೇಶನ್‌ನ 9,50,030 ರೂ. ಇರುವ 23 ಖಾತೆಗಳನ್ನು ಫ್ರೀಜ್ ಮಾಡಲಾಗಿದೆ.

ಇಸ್ಲಾಮಿಸ್ಟ್ ಸಂಘಟನೆಯನ್ನು 2006 ರಲ್ಲಿ ಕೇರಳದಲ್ಲಿ ರಚಿಸಲಾಗಿದ್ದು, ದೆಹಲಿಯಲ್ಲಿ ಕೇಂದ್ರ ಕಚೇರಿ ಹೊಂದಿದೆ. ಜಾರಿ ನಿರ್ದೇಶನಾಲಯವು ಪಿಎಫ್‌ಐಗೆ ಕುಣಿಕೆ ಬಿಗಿಗೊಳಿಸಿದೆ, ಅಕ್ರಮ ಹಣ ವರ್ಗಾವಣೆ ಪ್ರಕರಣದಲ್ಲಿ ಪ್ರಾಸಿಕ್ಯೂಷನ್ ದಾಖಲಿಸಿದೆ. ಪಿಎಫ್‌ಐನ 23 ಬ್ಯಾಂಕ್ ಖಾತೆಗಳು ಮತ್ತು ಪಿಎಫ್‌ಐನ ಫ್ರಂಟ್ ಆರ್‌ಐಎಫ್ (ರಿಹ್ಯಾಬ್ ಇಂಡಿಯಾ ಫೌಂಡೇಶನ್) ನ 10 ಬ್ಯಾಂಕ್ ಖಾತೆಗಳನ್ನು ಜಾರಿ ನಿರ್ದೇಶನಾಲಯ ಸ್ಥಗಿತಗೊಳಿಸಿದೆ.

ಕಳೆದ ತಿಂಗಳ ಆರಂಭದಲ್ಲಿ ಜಾರಿ ನಿರ್ದೇಶನಾಲಯ ಇಬ್ಬರು ಪಾಪ್ಯುಲರ್ ಫ್ರಂಟ್ ಆಫ್ ಇಂಡಿಯಾ  ನಾಯಕರಾದ ಕೇರಳ ಮೂಲದ ಅಬ್ದುಲ್ ರಜಾಕ್ ಪೀಡಿಯಕ್ಕಲ್ ಅಲಿಯಾಸ್ ಅಬ್ದುಲ್ ರಜಾಕ್ ಬಿಪಿ ಮತ್ತು ಅಶ್ರಫ್ ಖಾದಿರ್ ಅಲಿಯಾಸ್ ಅಶ್ರಫ್ ಎಂಕೆ ವಿರುದ್ಧ 22 ಕೋಟಿ ರೂ. ಅಕ್ರಮ ಹಣ ವರ್ಗಾವಣೆಗಾಗಿ ಪ್ರಕರಣ ದಾಖಲಿಸಿತ್ತು.