ಬೈಕ್​ ನಲ್ಲಿ ಒನ್​ ಸೈಡ್​ ಶೋಕಿ; ತಕ್ಕ ಪಾಠ ಕಲಿಸಿ ವಿಡಿಯೋ ಹಂಚಿಕೊಂಡ ಪೊಲೀಸ್

ಚಲಿಸುತ್ತಿರುವ ಬೈಕ್​ನಲ್ಲಿ ವ್ಯಕ್ತಿಯೊಬ್ಬ ಸಾಹಸ ಪ್ರದರ್ಶಿಸುತ್ತಿರುವ ವಿಡಿಯೋವನ್ನು ಹಂಚಿಕೊಂಡಿರುವ ಛತ್ತೀಸ್​ಗಡ ಪೊಲೀಸರು, ದಂಡ ವಿಧಿಸಿರುವುದಾಗಿ ತಿಳಿಸಿದ್ದಾರೆ.

ಜನನಿಬಿಡ ರಸ್ತೆಯಲ್ಲಿ ಬೈಕ್​ನಲ್ಲಿ ಒಂದು ಬದಿ ಎರಡೂ ಕಾಲು ಹಾಕಿಕೊಂಡು ಶೋಕಿ ಮಾಡುತ್ತಾ ಸಾಗುತ್ತಿದ್ದ ವ್ಯಕ್ತಿಯ ವೀಡಿಯೊ ಜಾಲತಾಣದಲ್ಲಿ ವೆೈರಲ್​ ಆದ ನಂತರ, ದುರ್ಗ ಪೊಲೀಸರು ಈ ವ್ಯಕ್ತಿಯ ವಿರುದ್ಧ ಕಠಿಣ ಕ್ರಮ ಕೆೈಗೊಂಡರು.

ಆತನಿಗೆ 4,200 ರೂಪಾಯಿ ದಂಡ ವಿಧಿಸಲಾಗಿದ್ದು, ತಮ್ಮ ಕ್ರಮ ಏನೆಂಬುದನ್ನು ಆ ವಿಡಿಯೋ ಸಹಿತ ಜಾಲತಾಣದಲ್ಲಿ ಪೋಸ್ಟ್​ ಮಾಡಿ ಇಂತಹ ಶೋಕಿ ಮಾಡುವ ಉಳಿದವರಿಗೆ ಎಚ್ಚರಿಕೆ ನೀಡಿದ್ದಾರೆ. ಈ ವಿಡಿಯೋವನ್ನು 2 ಲಕ್ಷಕ್ಕೂ ಅಧಿಕ ಮಂದಿ ವೀಕ್ಷಿಸಿದ್ದಾರೆ.

ಆತ ಹೆಲ್ಮೆಟ್​ ಧರಿಸಿರಲಿಲ್ಲ ಮತ್ತು ರಸ್ತೆ ಸುರಕ್ಷತೆ ನಿಯಮಗಳನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿದ್ದನ್ನು ವಿಡಿಯೋದಲ್ಲಿ ಕಾಣಬಹುದು.

ಸ್ಟಂಟ್​ಮೆನ್​ಗಳು, ಮಾರ್ಪಡಿಸಿದ ಸೆೈಲೆನ್ಸರ್​ಗಳನ್ನು ಬಳಸುವ ಜನರು ಮತ್ತು ರಾಶ್​ ಡ್ರೈವರ್​ಗಳ ವಿರುದ್ಧ ನಿರಂತರವಾಗಿ ಕ್ರಮ ತೆಗೆದುಕೊಳ್ಳುತ್ತಿದ್ದು ದಯವಿಟ್ಟು ಟ್ರಾಫಿಕ್​ ನಿಯಮಗಳನ್ನು ಅನುಸರಿಸಿ ಎಂದು ದುರ್ಗ ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ.