ಮತ್ತೊಂದು ವಿಶೇಷ ಟ್ರಾಫಿಕ್ ರೂಲ್ಸ್: ಕುಡಿದು ವಾಹನ ಚಲಾಯಿಸಿ ಸಿಕ್ಕಿಬಿದ್ರೆ ರಕ್ತದಾನ ಮಾಡಬೇಕು: ವಿವಾದಕ್ಕೆ ಕಾರಣವಾಯ್ತು ಹೊಸ ನಿಯಮ

ಪಂಜಾಬ್ ಸರ್ಕಾರ ಶುಕ್ರವಾರ ಅಧಿಸೂಚನೆ ಹೊರಡಿಸಿದ ಹೊಸ ಸಂಚಾರ ನಿಯಮಗಳು ವಿವಾದಕ್ಕೆ ನಾಂದಿ ಹಾಡಿದೆ.

ಹೊಸ ನಿಯಮಗಳ ಪ್ರಕಾರ, ಪಂಜಾಬ್‌ ನಲ್ಲಿ ಚಾಲಕರು ಕುಡಿದು ವಾಹನ ಚಲಾಯಿಸುವಾಗ ಸಿಕ್ಕಿಬಿದ್ದರೆ ಹತ್ತಿರದ ಆಸ್ಪತ್ರೆಯಲ್ಲಿ ರಕ್ತದಾನ ಮಾಡಬೇಕು ಅಥವಾ ಸಮುದಾಯ ಸೇವೆ ಸಲ್ಲಿಸಬೇಕು.

ನಿಯಮ ಉಲ್ಲಂಘಿಸುವವರು ಸಾರಿಗೆ ಪ್ರಾಧಿಕಾರದಿಂದ ರಿಫ್ರೆಶ್ ಕೋರ್ಸ್ ಪ್ರಮಾಣಪತ್ರವನ್ನು ಗಳಿಸುವ ಅಗತ್ಯವಿದೆ. ಎರಡು ಗಂಟೆಗಳ ಕಾಲ ಸಂಚಾರ ನಿಯಮಗಳ ಬಗ್ಗೆ ಮಕ್ಕಳಿಗೆ ತಿಳಿವಳಿಕೆ ನೀಡಬೇಕು. ಉಲ್ಲಂಘಿಸುವವರನ್ನು ಹತ್ತಿರದ ಆಸ್ಪತ್ರೆಯಲ್ಲಿ ಸಮುದಾಯ ಸೇವೆ ಮಾಡಲು ಅಥವಾ ಒಂದು ಯೂನಿಟ್ ರಕ್ತವನ್ನು ದಾನ ಮಾಡಲು ತಿಳಿಸಲಾಗುತ್ತದೆ.

ಸಂಚಾರ ನಿಯಮಗಳನ್ನು ಉಲ್ಲಂಘಿಸುವ ಸಾಮಾನ್ಯ ಶಿಕ್ಷೆಯೆಂದರೆ ಮೂರು ತಿಂಗಳವರೆಗೆ ಚಾಲನಾ ಪರವಾನಗಿಯನ್ನು ಅಮಾನತುಗೊಳಿಸುವುದು. ಅಪರಾಧಗಳಲ್ಲಿ ಅತಿ ವೇಗ, ಮೊಬೈಲ್ ಫೋನ್ ಬಳಕೆ, ಕುಡಿದು ವಾಹನ ಚಾಲನೆ, ಟ್ರಿಪಲ್ ರೈಡಿಂಗ್ ಮತ್ತು ಸಿಗ್ನಲ್ ಜಂಪ್ ಮಾಡುವುದು ಸೇರಿವೆ. ಪುನರಾವರ್ತಿತ ಅಪರಾಧಿಗಳು ಎರಡು ಬಾರಿ ದಂಡವನ್ನು ಪಾವತಿಸಬೇಕಾಗುತ್ತದೆ.

ಉಲ್ಲಂಘನೆಗಳನ್ನು ಪರಿಶೀಲಿಸಲು ಮತ್ತು ಹೊಸ ಮಾರ್ಗಸೂಚಿಗಳನ್ನು ಜಾರಿಗೊಳಿಸಲು ಪಂಜಾಬ್ ಪೊಲೀಸರು ಅಗತ್ಯ ಕ್ರಮ ಕೈಗೊಳ್ಳುವುದಾಗಿ ಘೋಷಿಸಿದ್ದಾರೆ.

ಸಂಚಾರ ನಿಯಮ ಉಲ್ಲಂಘನೆ ಮತ್ತು ದಂಡಗಳು

ಅತಿ ವೇಗದ ವಾಹನಗಳಿಗೆ ಮೊದಲು 1,000 ರೂ. ಪುನರಾವರ್ತಿತ ಉಲ್ಲಂಘನೆ ಕಂಡುಬಂದಲ್ಲಿ ದಂಡವನ್ನು ದ್ವಿಗುಣಗೊಳಿಸಲಾಗುತ್ತದೆ.

 

ಕುಡಿದು ವಾಹನ ಚಲಾಯಿಸುವುದು, ಡ್ರಗ್ಸ್ ಬಳಕೆ ಮತ್ತು ವಾಹನ ಚಲಾಯಿಸುವಾಗ ಮೊಬೈಲ್ ಫೋನ್ ಬಳಸಿದರೆ 5,000 ರೂ. ಎರಡನೇ ಬಾರಿ ತಪ್ಪಿತಸ್ಥರೆಂದು ಕಂಡುಬಂದರೆ ದಂಡವನ್ನು ದ್ವಿಗುಣಗೊಳಿಸಲಾಗುವುದು.

ಅದೇ ರೀತಿ, ಓವರ್‌ ಲೋಡ್ ವಾಹನಗಳು ಮೊದಲ ಬಾರಿಗೆ ತಪ್ಪಿತಸ್ಥರಾಗಿದ್ದರೆ 20,000 ರೂ. ಪುನರಾವರ್ತಿತ ಅಪರಾಧಿಗಳು ಎರಡು ಪಟ್ಟು ದಂಡವನ್ನು ಪಾವತಿಸಬೇಕಾಗುತ್ತದೆ.

ಮೊದಲ ಬಾರಿಗೆ ಸಿಗ್ನಲ್ ಜಂಪ್ ಮಾಡಿದ ಅಥವಾ ಟ್ರಿಪಲ್ ರೈಡಿಂಗ್ ಮಾಡಿದ ತಪ್ಪಿತಸ್ಥರು 1,000 ರೂಪಾಯಿ ದಂಡವನ್ನು ಪಾವತಿಸಬೇಕಾಗುತ್ತದೆ. ಪುನರಾವರ್ತಿತ ಅಪರಾಧಗಳಿಗೆ ದ್ವಿಗುಣ ದಂಡ ವಿಧಿಸಲಾಗುತ್ತದೆ.

ಪಂಜಾಬ್‌ ನಲ್ಲಿ ಸಂಚಾರ ನಿಯಮ ಉಲ್ಲಂಘನೆ ಸಾಮಾನ್ಯವಾಗಿದ್ದು, ಪ್ರತಿದಿನ 13 ಜನರು ರಸ್ತೆ ಅಪಘಾತಗಳಲ್ಲಿ ಸಾವನ್ನಪ್ಪುತ್ತಿದ್ದಾರೆ. 2011-2020ರ ಅವಧಿಯಲ್ಲಿ ಪಂಜಾಬ್‌ ನಲ್ಲಿ 56,959 ಅಪಘಾತಗಳು ಸಂಭವಿಸಿದ್ದು, 46,550 ಜನರು ಸಾವನ್ನಪ್ಪಿದ್ದಾರೆ.