ನೀವೂ ಮಾತ್ರೆಗಳನ್ನು ಎಸೆಯುತ್ತೀರಾ ? ಹಾಗಾದ್ರೆ ಈ ಸುದ್ದಿ ಓದಿ

ಕರ್ನಾಟಕದಲ್ಲಿ ಸುಮಾರು 2,000 ಜನರಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ ಔಷಧಿಗಳನ್ನು ತಿರಸ್ಕರಿಸುವುದು ಸಾಮಾನ್ಯ ಸಮಸ್ಯೆಯಾಗಿದೆ ಎಂದು ತಿಳಿದುಬಂದಿದೆ. ಈ ಸಮೀಕ್ಷೆಯಲ್ಲಿ ಪಾಲ್ಗೊಂಡಿರುವ 80% ಜನರು ಕಳೆದ ಮೂರು ವರ್ಷಗಳಲ್ಲಿ ತಾವು ಖರೀದಿಸಿದ ಬಳಕೆಯಾಗದ ಔಷಧಿಗಳನ್ನು ತ್ಯಜಿಸಿದ್ದೇವೆ ಎಂದು ಹೇಳಿದ್ದಾರೆ.

ರಾಷ್ಟ್ರೀಯ ಮಟ್ಟದಲ್ಲಿ ಸಮುದಾಯ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್ ಲೋಕಲ್ ಸರ್ಕಲ್ಸ್ ಸಮೀಕ್ಷೆಯನ್ನು ನಡೆಸಿದೆ. ಒಂದೆರಡು ಸ್ಟ್ರಿಪ್​ ಮಾತ್ರೆಯನ್ನು ಪಡೆಯಲು ರೋಗಿಗಳು ಬಯಸಿದರೆ ಅದನ್ನು ಕಟ್​ ಮಾಡಬೇಕಾಗುತ್ತದೆ ಎನ್ನುವ ಉದ್ದೇಶದಿಂದ ಅಂಗಡಿಯವರು ಹಲವರು ಸ್ಟ್ರಿಪ್ಸ್​ ನೀಡುತ್ತಾರೆ. ಒತ್ತಾಯಪೂರ್ವಕವಾಗಿ ರೋಗಿಗಳು ಎಲ್ಲವನ್ನೂ ಖರೀದಿಸಬೇಕಾಗುತ್ತದೆ. ಆದ್ದರಿಂದ ಉಳಿದ ಮಾತ್ರೆಗಳನ್ನು ಎಸೆಯುತ್ತೇವೆ ಎಂದು ಹೇಳಿದ್ದಾರೆ ಶೇಕಡಾ 48ರಷ್ಟು ಮಂದಿ.

ಇನ್ನು ಕೆಲವರು ಮಾತ್ರೆಗಳನ್ನು ಪಡೆದ ಬಳಿಕ ಅದರಿಂದ ಆಗುವ ಸೈಡ್​ ಇಫೆಕ್ಟ್​ಗಳ ಬಗ್ಗೆ ಅರಿತು ಎಸೆಯುತ್ತಿದ್ದಾರೆ. ಹೆಚ್ಚುವರಿ ಮಾತ್ರೆಗಳನ್ನು ಅಂಗಡಿಯವರು ವಾಪಸ್​ ಪಡೆಯುವಂಥ ಪ್ರಕ್ರಿಯೆ ಇದ್ದರೆ ಚೆನ್ನ ಎಂದು ರೋಗಿಗಳು ವಿವರಿಸುತ್ತಾರೆ. ಆದರೆ ವಾಪಸ್​ ಪಡೆಯಲು ಅಂಗಡಿಯವರು ನಿರಾಕರಿಸುವ ಕಾರಣ ಹೆಚ್ಚುವರಿ ಮಾತ್ರೆಗಳನ್ನು ಎಸೆಯದೇ ಬೇರೆ ದಾರಿ ಇಲ್ಲ ಎನ್ನುವುದು ಅವರ ಮಾತು.