‘DDLJ’ ಸಿನಿಮಾ ಅಭಿಮಾನಿಗಳಿಗೆ ಗುಡ್​ ನ್ಯೂಸ್​: ಒಂದೂವರೆ ವರ್ಷದ ಬಳಿಕ ಮತ್ತೆ ಥಿಯೇಟರ್​ಗೆ ಬರಲಿದೆ ಈ ಸಿನೆಮಾ

ಬಾಲಿವುಡ್​ನ ಪ್ರಸಿದ್ಧ ಸಿನಿಮಾಗಳಲ್ಲಿ ಒಂದಾದ ದಿಲ್​ವಾಲೆ ದುಲ್ಹನಿಯಾ ಲೇ ಜಾಯೆಂಗೆ ಅಕ್ಟೋಬರ್​ 22ರಿಂದ ಮತ್ತೆ ಥಿಯೇಟರ್​ನಲ್ಲಿ ಕಾಣಿಸಿಕೊಳ್ಳಲು ಸಿದ್ಧವಾಗಿದೆ. ದಿಲ್​ವಾಲೆ ದುಲ್ಹನಿಯಾ ಲೇ ಜಾಯೆಂಗೆ ಸಿನಿಮಾ ಬರೋಬ್ಬರಿ 25 ವರ್ಷಗಳಿಂದ ಮುಂಬೈನ ಮರಾಠಾ ಮಂದಿರದಲ್ಲಿ ನಿರಂತರ ಪ್ರದರ್ಶನ ಕಾಣುತ್ತಿತ್ತು. ಆದರೆ ಕೊರೊನಾದಿಂದಾಗಿ ಈ ಪ್ರದರ್ಶನಕ್ಕೆ ಬ್ರೇಕ್​ ಬಿದ್ದಿತ್ತು.

ಇದೀಗ ಮತ್ತೊಮ್ಮೆ ಮ್ಯಾಟಿನಿ ಶೋ ಮುಂದುವರಿಸಲು ದಿಲ್​ವಾಲೆ ದುಲ್ಹನಿಯಾ ಲೇ ಜಾಯೆಂಗೆ ಸಿನಿಮಾ ಸಿದ್ಧವಾಗಿದೆ. ಮರಾಠಾ ಮಂದಿರದ ಎಕ್ಸಿಕ್ಯೂಟಿವ್​ ನಿರ್ದೇಶಕ ಮನೋಜ್​ ದೇಸಾಯಿ ಈ ವಿಚಾರವಾಗಿ ಮಾತನಾಡಿದ್ದು ಕೋವಿಡ್​ 19ನಿಂದ ಮಾರ್ಚ್​ ತಿಂಗಳಲ್ಲಿ ಸಿನಿಮಾ ಪ್ರದರ್ಶನ ರದ್ದುಗೊಂಡ ಬಳಿಕ ತಾವು ದೊಡ್ಡ ಮೊತ್ತದಲ್ಲಿ ನಷ್ಟ ಅನುಭವಿಸಿದ್ದಾಗಿ ಹೇಳಿದ್ದಾರೆ. ಅಲ್ಲದೇ ನಾನು ಇನ್ಮುಂದೆ ಮರಾಠಾ ಮಂದಿರದಲ್ಲಿ ಈ ಸಿನಿಮಾದ ಪ್ರದರ್ಶನವನ್ನು ಮುಂದುವರಿಸಲಿದ್ದೇನೆ ಎಂದು ಹೇಳಿದ್ರು.

ರೊನಾಲ್ಡೊ ಪ್ರತಿಮೆಗೆ ‌ʼತಪ್ಪಾದ ಶರ್ಟ್ʼ…! ಗುರುತಿಸಿದ ಅಭಿಮಾನಿಗಳು ಗರಂ

ಕೊರೊನಾಗಿಂತ ಮುನ್ನ ಈ ಸಿನಿಮಾ ಪ್ರದರ್ಶನದಿಂದ ಬರುತ್ತಿದ್ದ ಲಾಭದ ನಿರೀಕ್ಷೆಯನ್ನು ಈ ಬಾರಿಯೂ ಮಾಡಿದ್ದೇನೆ ಎಂದು ಮನೋಜ್​ ಹೇಳಿದ್ದಾರೆ. ಅಕ್ಟೋಬರ್​- ನವೆಂಬರ್​-ಡಿಸೆಂಬರ್​ ತಿಂಗಳಲ್ಲಿ ಅನೇಕ ಪ್ರಶ್ನೆಗಳಿಗೆ ಉತ್ತರ ಸಿಗಲಿದೆ. ಜನರು ಥಿಯೇಟರ್​ಗೆ ಮರಳುತ್ತಾರೆಯೇ..? ಜನರು ಒಟಿಟಿ ವೇದಿಕೆಗಳಿಗೆ ಹೆಚ್ಚು ಒಗ್ಗಿಕೊಂಡಿದ್ದಾರೆಯೇ..? ಈ ರೀತಿಯ ಅನೇಕ ಪ್ರಶ್ನೆಗಳಿಗೆ ಈ ಮೂರು ತಿಂಗಳಲ್ಲಿ ನಿಖರ ಉತ್ತರ ಸಿಗಲಿದೆ. ಎಂದು ಹೇಳಿದ್ರು.

ದಿಲ್​ವಾಲೆ ದುಲ್ಹನಿಯಾ ಲೇ ಜಾಯೆಂಗೇ ಸಿನಿಮಾ ಭಾರತದ ಸಿನಿಮಾ ಇತಿಹಾಸದಲ್ಲಿಯೇ ಅತೀ ಹೆಚ್ಚು ವರ್ಷಗಳ ಕಾಲ ಥಿಯೇಟರ್​ನಲ್ಲಿ ಪ್ರದರ್ಶನ ಕಂಡ ಸಿನಿಮಾವಾಗಿದೆ. ಮುಂಬೈನ ಮರಾಠಾ ಮಂದಿರದಲ್ಲಿ ಈ ಸಿನಿಮಾ ಕಳೆದ 25 ವರ್ಷಗಳಿಂದ ಪ್ರದರ್ಶನ ಕಂಡಿದೆ. ಆದರೆ ಕೋವಿಡ್​ 19 ಸಾಂಕ್ರಾಮಿಕದಿಂದ ಥಿಯೇಟರ್​ ಪ್ರದರ್ಶನ ರದ್ದುಗೊಂಡ ಬಳಿಕ ಈ ಸಿನಿಮಾ ಪ್ರದರ್ಶನಕ್ಕೂ ಬ್ರೇಕ್​ ಬಿದ್ದಿತ್ತು.