‘5 ಸ್ಟಾರ್​ ಹೋಟೆಲ್​ನಲ್ಲಿ ಕುಳಿತು ರೈತರನ್ನು ದೂಷಿಸುವವರು ಪಟಾಕಿ ಮರೆಯುತ್ತಾರೆ’ : ಸುಪ್ರೀಂ ಕೋರ್ಟ್ ತರಾಟೆ

ದೆಹಲಿ ವಾಯುಮಾಲಿನ್ಯದ ವಿಚಾರವಾಗಿ ವಿಚಾರಣೆ ನಡೆಸುತ್ತಿರುವ ಸುಪ್ರೀಂ ಕೋರ್ಟ್ ನ್ಯಾಯಪೀಠವು, 5 ಸ್ಟಾರ್​ ಅಥವಾ 7 ಸ್ಟಾರ್​ ಹೋಟೆಲ್​ಗಳಲ್ಲಿ ಕುಳಿತವರು ಮಾಲಿನ್ಯಕ್ಕೆ ರೈತರೇ ಕಾರಣ ಎಂದು ದೂಷಿಸುತ್ತಿದ್ದಾರೆ. ಆದರೆ ಸುಪ್ರೀಂ ಕೋರ್ಟ್​ಗೆ ರೈತರ ಸಂಕಷ್ಟ ಕಾಣುತ್ತಿದೆ ಎಂದು ಹೇಳಿದೆ.

‘5 ಸ್ಟಾರ್​ ಹಾಗೂ 7 ಸ್ಟಾರ್​ನಲ್ಲಿ ಕುಳಿತವರು ಮಾಲಿನ್ಯಕ್ಕೆ ರೈತರೇ ಕಾರಣ ಎಂದು ದೂಷಿಸುತ್ತಿದ್ದಾರೆ. ಪ್ರತಿ ಭೂಮಿ ಹಿಡುವಳಿಯಿಂದ ಒಬ್ಬ ರೈತ ಎಷ್ಟು ಸಂಪಾದನೆ ಮಾಡುತ್ತಾನೆ ಎಂದು ನೀವು ಎಂದಾದರೂ ನೋಡಿದ್ದೀರಾ ಎಂದು ಮುಖ್ಯ ನ್ಯಾಯಮೂರ್ತಿ ಎನ್​.ವಿ. ರಮಣ ಪ್ರಶ್ನೆ ಮಾಡಿದರು. ನಿರ್ಬಂಧ ಹೇರಿದರೂ ಪಟಾಕಿ ಸುಡಲು ಕೆಲವರು ತಯಾರಿದ್ದಾರೆ. ಎಲ್ಲವನ್ನೂ ನ್ಯಾಯಾಂಗದ ಆದೇಶದ ಮೂಲಕವೇ ಮಾಡಲು ಸಾಧ್ಯವಿಲ್ಲ. ಕೆಲವೊಂದು ವಿಚಾರಗಳಲ್ಲಿ ಸ್ವಯಂ ಜವಾಬ್ದಾರಿ ಕೂಡ ಇರಬೇಕು ಎಂದು ಹೇಳಿದ್ದಾರೆ.

ಸುಪ್ರಿಂ ಕೋರ್ಟ್​ಗೆ ಅಫಿಡವಿಟ್​ ಸಲ್ಲಿಸಿದ ದೆಹಲಿ ಸರ್ಕಾರ ಮಾಲಿನ್ಯ ಬಿಕ್ಕಟ್ಟಿನಲ್ಲಿರುವ ಐದು ರಾಜ್ಯಗಳಲ್ಲಿ ಸ್ಥಾನ ಪಡೆದ ಬಳಿಕ ಸಂಪೂರ್ಣವಾಗಿ ವರ್ಕ್​ ಫ್ರಮ್​ ಹೋಮ್​ ವ್ಯವಸ್ಥೆ ಜಾರಿಗೆ ತಂದಿರುವುದಾಗಿ ಸರ್ವೋಚ್ಛ ನ್ಯಾಯಾಲಯಕ್ಕೆ ಮಾಹಿತಿ ನೀಡಿದೆ.

ವಿಚಾರಣೆಯ ವೇಳೆ ದೆಹಲಿ ಸರ್ಕಾರವನ್ನು ಪ್ರಶ್ನಿಸಿದ ನ್ಯಾಯಮೂರ್ತಿ ಸೂರ್ಯಕಾಂತ್​, ಸಾರ್ವಜನಿಕ ಕಚೇರಿಗಳನ್ನು ಸಂಪೂರ್ಣವಾಗಿ ಮುಚ್ಚಿರುವ ನೀವು ಸಂಚಾರವನ್ನೂ ಏಕೆ ಬಂದ್ ಮಾಡಿಸಬಾರದು ಎಂದು ಪ್ರಶ್ನಿಸಿದ್ದಾರೆ.

ದೆಹಲಿ ಸರ್ಕಾರದ ಪರ ವಾದ ಮಂಡಿಸಿದ ವಕೀಲ ಅಭಿಷೇಕ್​ ಸಿಂಘ್ವಿ, ಐದು ಮಾಲಿನ್ಯ ರಾಜ್ಯಗಳ ಪೈಕಿ ದೆಹಲಿ ಮಾತ್ರ 100 ಪ್ರತಿಶತ ವರ್ಕ್​ ಫ್ರಮ್​ ಹೋಂ ಆದೇಶ ನೀಡಿದೆ. ಅಲ್ಲದೇ ನಾವು ಎಲ್ಲಾ ರೀತಿಯ ಹಣಕಾಸಿನ ನೆರವನ್ನೂ ನೀಡುತ್ತಿದ್ದೇವೆ ಎಂದು ಹೇಳಿದ್ರು.