‘ಕಪಿ ಚೇಷ್ಠೆ’ ತಂದ ಸಾವು: ಕೋತಿ ಎಸೆದ ಇಟ್ಟಿಗೆಯಿಂದ ಹೋಯ್ತು ಅಮಾಯಕನ ಪ್ರಾಣ…..!

ಕೋತಿಗಳ ಚೇಷ್ಠೆಯ ಬಗ್ಗೆ ಹೆಚ್ಚೇನು ಹೇಳಬೇಕಾಗಿಲ್ಲ. ಆದರೆ ಇಲ್ಲೊಂದು ಕಡೆ ಕಪಿಚೇಷ್ಠೆಯು ವ್ಯಕ್ತಿಯೊಬ್ಬನ ಪ್ರಾಣವನ್ನೇ ತೆಗೆದಿದೆ. ಹೌದು..! ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಎರಡನೇ ಮಹಡಿಯಲ್ಲಿದ್ದ ಕೋತಿಯೊಂದು ಮೇಲಿನಿಂದ ಇಟ್ಟಿಗೆಯನ್ನು ಎಸೆದ ಪರಿಣಾಮ 30 ವರ್ಷದ ವ್ಯಕ್ತಿ ಸಾವನ್ನಪ್ಪಿದ್ದಾನೆ.

ಮೊಹಮ್ಮದ್​ ಕುರುಬಾನ್​​ ತಲೆಗೆ ಗಂಭೀರ ಗಾಯವಾದ ಪರಿಣಾಮ ಸ್ಥಳದಲ್ಲೇ ಕುಸಿದು ಬಿದ್ದಿದ್ದಾರೆ. ಕೂಡಲೇ ಮೊಹಮ್ಮದ್​ ಕುರುಬಾನ್​ರನ್ನು ಆರ್​ಎಂಎಲ್​ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಅಷ್ಟರಲ್ಲಾಗಲೇ ಮೊಹಮ್ಮದ್​ ಸಾವನ್ನಪ್ಪಿದ್ದರು ಎಂದು ವೈದ್ಯರು ದೃಢೀಕರಿಸಿದ್ದಾರೆ.

ಈ ಸಂಬಂಧ ಪ್ರಕರಣ ದಾಖಲಾಗಿದ್ದು ವಿಚಾರಣೆಯ ವೇಳೆ ಈ ಇಟ್ಟಿಗೆಯು ಓಂ ಪ್ರಕಾಶ್​ ಮಿಶ್ರಾ ಎಂಬವರ ಮಾಲೀಕತ್ವದ ಮನೆಯಿಂದ ಎಸೆಯಲಾಗಿದೆ ಎಂದು ತಿಳಿದುಬಂದಿದೆ. ವಿಚಾರಣೆಯ ವೇಳೆ ಮಿಶ್ರಾ, ಕೋತಿಗಳು ಟ್ಯಾಂಕ್​ನ ನೀರನ್ನು ಮುಟ್ಟದಂತೆ ಮಾಡಲು ತಾವು ಟ್ಯಾಂಕ್​ನ ಮುಚ್ಚಳದ ಮೇಲೆ ಎರಡು ಇಟ್ಟಿಗೆಗಳನ್ನು ಇಟ್ಟಿದ್ದಾಗಿ ಹೇಳಿದ್ದಾರೆ.

ಆದರೆ ಕೋತಿಗಳ ಗುಂಪು ಇಟ್ಟಿಗೆಯನ್ನು ಸರಿಸುವಲ್ಲಿ ಯಶಸ್ವಿಯಾಗಿವೆ. ಒಂದನ್ನ ಕಟ್ಟಡದ ಒಳಗೆ ಎಸೆಯಲಾಗಿದೆ. ಹಾಗೂ ಇನ್ನೊಂದು ಇಟ್ಟಿಗೆಯನ್ನು ಕೋತಿಗಳು ಎಸೆದ ರಭಸಕ್ಕೆ ಮೊಹಮ್ಮದ್​ ಕುರುಬಾನ್​ ಸಾವನ್ನಪ್ಪಿದ್ದಾರೆ. ಕುರುಬಾನ್​​ ಇದೇ ಪ್ರದೇಶದಲ್ಲಿ ಬ್ಯಾಗ್​ ಅಂಗಡಿಯನ್ನು ಇಟ್ಟಿದ್ದರು ಎನ್ನಲಾಗಿದೆ. ಮೃತ ಕುರುಬಾನ್​ಗೆ ಪತ್ನಿ ಹಾಗೂ ಐದು ವರ್ಷದ ಮಗು ಕೂಡ ಇದೆ.