ವಿಶ್ವ ಚಾಂಪಿಯನ್ ಡಿ. ಗುಕೇಶ್ ಬುಧವಾರ ಆಂಧ್ರಪ್ರದೇಶದ ತಿರುಪತಿ ಬಾಲಾಜಿ ದೇವಸ್ಥಾನಕ್ಕೆ ಭೇಟಿ ಕೊಟ್ಟಿದ್ದಾರೆ. ಈ ವರ್ಷದ ಪ್ರಮುಖ ಪಂದ್ಯಾವಳಿಗಳಿಗಾಗಿ ದೇವರಿಂದ ದೈವಿಕ ಆಶೀರ್ವಾದವನ್ನು ಕೋರಿ ತಲೆ ಬೋಳಿಸಿಕೊಂಡಿದ್ದಾರೆ. ತಿರುಪತಿ ಜಿಲ್ಲೆಯ ತಿರುಮಲ ಬೆಟ್ಟದಲ್ಲಿರುವ ತಿರುಪತಿ ಬಾಲಾಜಿ ದೇವಸ್ಥಾನಕ್ಕೆ ಗುಕೇಶ್ ಭೇಟಿ ಕೊಟ್ಟಿದ್ದಾರೆ. ಈ ವರ್ಷದ ಪ್ರಮುಖ ಚೆಸ್ ಪಂದ್ಯಾವಳಿಗಳಿಗಾಗಿ ದೈವಿಕ ಆಶೀರ್ವಾದವನ್ನು ಕೋರಿ ತಲೆ ಬೋಳಿಸಿಕೊಂಡಿದ್ದಾರೆ.
ಯೂಟ್ಯೂಬ್‌ನಲ್ಲಿ ಡೈಲಿ ಕಲ್ಚರ್ ಹಂಚಿಕೊಂಡಿರುವ ವಿಡಿಯೋದಲ್ಲಿ ದೇವಸ್ಥಾನಕ್ಕೆ ಭೇಟಿ ನೀಡಿದ ಬಗ್ಗೆ ಮತ್ತು ಮುಂದಿನ ಪಯಣದ ಬಗ್ಗೆ ಗುಕೇಶ್ ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡಿದ್ದಾರೆ. “ನಾನು ಕಷ್ಟಪಟ್ಟು ಕೆಲಸ ಮಾಡಬೇಕಾಗಿದೆ. 2025 ರಲ್ಲಿ ಬಹಳಷ್ಟು ಪ್ರಮುಖ ಪಂದ್ಯಾವಳಿಗಳು ಇವೆ, ಆದ್ದರಿಂದ ನಾನು ಅದರ ಮೇಲೆ ಗಮನಹರಿಸುತ್ತಿದ್ದೇನೆ. ನಾನು ಎಲ್ಲಾ ಸ್ವರೂಪಗಳಲ್ಲಿ ಸುಧಾರಿಸಲು ಬಯಸುತ್ತೇನೆ ಮತ್ತು ದೇವರ ಅನುಗ್ರಹದಿಂದ ಒಳ್ಳೆಯ ವಿಷಯಗಳು ಸಂಭವಿಸುತ್ತವೆ ಎಂದು ಭಾವಿಸುತ್ತೇನೆ” ಎಂದು 18 ವರ್ಷದ ಗುಕೇಶ್ ವಿಡಿಯೋದಲ್ಲಿ ಹೇಳಿದ್ದಾರೆ.
ತಲೆ ಬೋಳಿಸಿಕೊಂಡು ಕೂದಲು ದಾನ ಮಾಡುವುದು ತಿರುಪತಿ ಬಾಲಾಜಿ ದೇವಸ್ಥಾನಕ್ಕೆ ಭೇಟಿ ನೀಡುವ ಭಕ್ತರಿಗೆ ಸಂಬಂಧಿಸಿದ ಆಚರಣೆಯಾಗಿದೆ. ಗುಕೇಶ್ ಅವರ ಕ್ಲೀನ್ ಶೇವ್ ಲುಕ್‌ನ ಚಿತ್ರಗಳು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿವೆ.
ಗುಕೇಶ್ ಈ ರೀತಿಯ ಹರಕೆ ನೀಡಿದ ಮೊದಲ ಕ್ರೀಡಾಪಟು ಅಲ್ಲ. ಭಾರತದ ಮಾಜಿ ನಾಯಕ ಎಂ.ಎಸ್. ಧೋನಿ 2011ರ ಐಸಿಸಿ ವಿಶ್ವಕಪ್ ಫೈನಲ್‌ನಲ್ಲಿ ಶ್ರೀಲಂಕಾ ವಿರುದ್ಧ ಮುಂಬೈನಲ್ಲಿ ಭಾರತವನ್ನು ಗೆಲುವಿನತ್ತ ಮುನ್ನಡೆಸಿದ ನಂತರ ತಲೆ ಬೋಳಿಸಿಕೊಂಡಿದ್ದರು. ಧೋನಿ ತಮ್ಮ ತವರು ರಾಂಚಿಯ ಸಮೀಪದ ದೇವಸ್ಥಾನದಲ್ಲಿ ಪಂದ್ಯಾವಳಿಯ ಮೊದಲು ಪ್ರತಿಜ್ಞೆ ಮಾಡಿದ್ದರು. ಅವರ ಕೂದಲನ್ನು ತಿರುಪತಿ ಬಾಲಾಜಿಗೆ ದಾನ ಮಾಡಲಾಯಿತು. ಇದೇ ದೇವಸ್ಥಾನದಲ್ಲಿ ಗುಕೇಶ್ ಕೂಡಾ ತಮ್ಮ ಕೂದಲನ್ನು ದಾನ ಮಾಡಿದ್ದಾರೆ.
ಡಿಂಗ್ ಲಿರೆನ್ ಅವರನ್ನು ಸೋಲಿಸಿ ಕ್ರೀಡಾ ಇತಿಹಾಸದಲ್ಲಿ ಕಿರಿಯ ವಿಶ್ವ ಚಾಂಪಿಯನ್ ಆದ ನಂತರ, ಗುಕೇಶ್ ನೆದರ್ಲ್ಯಾಂಡ್ಸ್‌ನ ಟಾಟಾ ಸ್ಟೀಲ್ ಚೆಸ್ ಟೂರ್ನಮೆಂಟ್‌ನಲ್ಲಿ ಸತತ ಎರಡನೇ ವರ್ಷ ರನ್ನರ್ ಅಪ್ ಆಗಿ ಮುಗಿಸಿದರು. ಜರ್ಮನಿಯ ವೀಸೆನ್‌ಹಾಸ್‌ನಲ್ಲಿ ನಡೆದ ಫ್ರೀಸ್ಟೈಲ್ ಚೆಸ್ ಗ್ರ್ಯಾಂಡ್ ಸ್ಲ್ಯಾಮ್ ಟೂರ್‌ನ ಆರಂಭಿಕ ಪಂದ್ಯದಲ್ಲಿ ಅವರು 10 ಸ್ಪರ್ಧಿಗಳಲ್ಲಿ ಎಂಟನೇ ಸ್ಥಾನ ಪಡೆದರು.
ಏಪ್ರಿಲ್‌ನಲ್ಲಿ ನಡೆಯಲಿರುವ ಫ್ರೀಸ್ಟೈಲ್ ಟೂರ್‌ನ ಪ್ಯಾರಿಸ್ ಪಂದ್ಯದಲ್ಲಿ ಗುಕೇಶ್ ಭಾಗವಹಿಸಲಿದ್ದು, ಅವರೊಂದಿಗೆ ಪ್ರಜ್ಞಾನಂದ ಮತ್ತು ಅರ್ಜುನ್ ಎರಿಗೈಸಿ ಕೂಡಾ ಭಾಗವಹಿಸಲಿದ್ದಾರೆ.
Loading ...