ʼಕೊವ್ಯಾಕ್ಸಿನ್ʼ​ ಲಸಿಕೆ ಕುರಿತು ಅಧ್ಯಯನದಲ್ಲಿ ಮಹತ್ವದ ಮಾಹಿತಿ ಬಹಿರಂಗ

ಭಾರತ್​ ಬಯೋಟೆಕ್​ ನಿರ್ಮಿತ ಕೊವ್ಯಾಕ್ಸಿನ್​ ಲಸಿಕೆಯು ಕೊರೊನಾ ವೈರಸ್​​ನ ಬೀಟಾ ಹಾಗೂ ಡೆಲ್ಟಾ ರೂಪಾಂತರಿಗಳ ವಿರುದ್ಧವೂ ಸುರಕ್ಷತೆಯನ್ನ ಒದಗಿಸುತ್ತೆ ಎಂದು ಪುಣೆಯ ವೈರಾಣು ರಾಷ್ಟ್ರೀಯ ವಿಶ್ವವಿದ್ಯಾಲಯ, ಭಾರತೀಯ ವೈದ್ಯಕೀಯ ಸಂಘ ಹಾಗೂ ಭಾರತ್​ ಬಯೋಟೆಕ್​ ಹೇಳಿದೆ.

ಕೊರೊನಾ ವೈರಸ್​ನ ಡೆಲ್ಟಾ ರೂಪಾಂತರಿ(B.1.617.2) ಮೊಟ್ಟ ಮೊದಲ ಬಾರಿಗೆ ಭಾರತದಲ್ಲಿಯೇ ಕಂಡುಬಂದಿತ್ತು. ಬೀಟಾ ರೂಪಾಂತರಿ(B.1.351) ಮೊದಲ ಬಾರಿಗೆ ದಕ್ಷಿಣ ಆಫ್ರಿಕಾದಲ್ಲಿ ಕಾಣಿಸಿಕೊಂಡಿದೆ.
ಕೊವ್ಯಾಕ್ಸಿನ್​​ ಲಸಿಕೆಯ ಎರಡೂ ಡೋಸ್​ಗಳನ್ನ ಪಡೆದು 28 ದಿನಗಳನ್ನ ಕಳೆದ 17 ಮಂದಿ ಹಾಗೂ ಕೊರೊನಾದಿಂದ ಗುಣಮುಖರಾದ 20 ಮಂದಿಯನ್ನ ಈ ಪರೀಕ್ಷೆಗೆ ಒಳಪಡಿಸಲಾಗಿತ್ತು.

ಈ ಅಧ್ಯಯನದಲ್ಲಿ ಸ್ವದೇಶಿ ನಿರ್ಮಿತ ಕೊವ್ಯಾಕ್ಸಿನ್​ ಲಸಿಕೆಯು ಈ ಎರಡೂ ರೂಪಾಂತರಿಗಳ ವಿರುದ್ಧ ಪರಿಣಾಮಕಾರಿಯಾಗಿದೆ ಎಂದು ತಿಳಿದುಬಂದಿದೆ.
ಕೊರೊನಾ ಎರಡನೆ ಅಲೆಯಲ್ಲಿ ಅತ್ಯಂತ ವೇಗವಾಗಿ ಸೋಂಕನ್ನ ಹಬ್ಬಿಸಬಲ್ಲ ಡೆಲ್ಟಾ ರೂಪಾಂತರಿ ದೇಶದಲ್ಲಿ ಕಂಡು ಬಂದಿದೆ. ಬ್ರಿಟನ್​ನಲ್ಲಿ ಕಂಡು ಬಂದ ಆಲ್ಪಾ ರೂಪಾಂತರಿಗಿಂತ ಇದು ಹೆಚ್ಚಿನ ಪ್ರಮಾಣದಲ್ಲಿ ಸೋಂಕನ್ನ ಹರಡುತ್ತದೆ. ಆದರೆ ಡೆಲ್ಟಾ ರೂಪಾಂತರಿ ವೈರಸ್​ನಿಂದಲೇ ಹೆಚ್ಚಿನ ಸಾವು ವರದಿಯಾಗುತ್ತಿದೆಯಾ ಅನ್ನೋದಕ್ಕೆ ಇನ್ನೂ ಸ್ಪಷ್ಟ ಪುರಾವೆ ದೊರಕಿಲ್ಲ.