ನಕಲಿ ಕೋವಿಡ್ ಪ್ರಮಾಣಪತ್ರದೊಂದಿಗೆ ರಾಜ್ಯ ಪ್ರವೇಶ: ಕೇರಳ ಮೂಲದ ದಂಪತಿ ಅರೆಸ್ಟ್

ಮಡಿಕೇರಿ: ನಕಲಿ ಕೋವಿಡ್ ಪ್ರಮಾಣ ಪತ್ರಗಳೊಂದಿಗೆ ಕರ್ನಾಟಕದ ಕೊಡಗು ಜಿಲ್ಲೆಗೆ ಪ್ರವೇಶಿಸಲು ಪ್ರಯತ್ನಿಸಿದ ಕೇರಳ ಮೂಲದ ದಂಪತಿಯನ್ನು ಬಂಧಿಸಲಾಗಿದೆ.

ಪೊಲೀಸರ ಪ್ರಕಾರ, ದಂಪತಿ ಗುರುವಾರ ತಡರಾತ್ರಿ ಕೊಡಗು ಜಿಲ್ಲೆಗೆ ಪ್ರವೇಶಿಸಲು ನಕಲಿ ಕೋವಿಡ್-ನೆಗೆಟಿವ್ ಪರೀಕ್ಷಾ ವರದಿ ತಂದಿದ್ದಾರೆ. ಆದಾಗ್ಯೂ, ಅವರ ಅನುಮಾನಾಸ್ಪದ ನಡವಳಿಕೆಯಿಂದಾಗಿ ಸಂಶಯಗೊಂಡ ಪೊಲೀಸರು ಅವರನ್ನು ಅಮ್ಮತಿಯಲ್ಲಿ ತಡೆದಿದ್ದಾರೆ.

ಆರೋಪಿ ದಂಪತಿಯನ್ನು 32 ವರ್ಷದ ಸೈಯದ್ ಮೊಹಮ್ಮದ್ ಮತ್ತು ಆತನ 27 ವರ್ಷದ ಪತ್ನಿ ಬಿಎಂ ಆಯೇಷಾ ರೆಹಮಾನ್ ಎಂದು ಗುರುತಿಸಲಾಗಿದೆ. ಸೈಯದ್ ಕೇರಳದ ಕಾಸರಗೋಡು ಜಿಲ್ಲೆಯ ಮಂಜೇಶ್ವರದವರು. ಆಯೇಷಾ ಕೊಡಗಿನ ಮಡಿಕೇರಿ ತಾಲ್ಲೂಕಿನವರು ಎಂದು ತಿಳಿದು ಬಂದಿದೆ. ದಂಪತಿ ಗುರುವಾರ ಆಯೇಷಾಳ ಪೋಷಕರನ್ನು ಭೇಟಿ ಮಾಡಲು ಕರ್ನಾಟಕಕ್ಕೆ ತೆರಳಿದ್ದರು ಎಂದು ಹೇಳಲಾಗಿದೆ.

ದಂಪತಿಯು ದಕ್ಷಿಣ ಕನ್ನಡ ಜಿಲ್ಲೆಯ ಸುಳ್ಯ ತಾಲೂಕಿನ ಜಾಲ್ಸೂರು ಮೂಲಕ ಮಾರುತಿ ಆಲ್ಟೊ ಕಾರಿನಲ್ಲಿ ಬಂದಿದ್ದಾರೆ. ಇದು ರಾಜ್ಯದಲ್ಲಿ ನಕಲಿ ಕೋವಿಡ್ -19 ಪ್ರಮಾಣಪತ್ರಗಳನ್ನು ತಯಾರಿಸಿದ್ದಕ್ಕಾಗಿ ಜನರನ್ನು ಬಂಧಿಸಿದ ಮೊದಲ ಪ್ರಕರಣವಾಗಿದೆ. ಇನ್ನು ದಂಪತಿಗಳ ಕಾರನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಸಚಿವ ಸ್ಥಾನ ಸಿಗಲಿ, ಬಿಡಲಿ; ಮೈತ್ರಿ ಸರ್ಕಾರ ತೆಗೆದ ಖುಷಿ ಇದೆ; ಮಂತ್ರಿಗಿರಿಗಿಂತ ಮೇಲಿದ್ದೇನೆ ಎಂದ ರಮೇಶ್ ಜಾರಕಿಹೊಳಿ

ಪೊಲೀಸರ ಪ್ರಕಾರ, ಜಾಲ್ಸೂರಿನಲ್ಲಿ ವಾಹನಗಳ ದಟ್ಟಣೆ ಹೆಚ್ಚಾಗಿದ್ದರಿಂದ ದಂಪತಿ ಇದರ ಲಾಭ ಪಡೆದಿದ್ದರು. ಚೆಕ್‌ ಪಾಯಿಂಟ್‌ನಲ್ಲಿದ್ದ ಭದ್ರತಾ ಸಿಬ್ಬಂದಿ ತಮ್ಮ ಸುಳ್ಳು ಕೋವಿಡ್ ನೆಗೆಟಿವ್ ವರದಿಗಳನ್ನು ಮೇಲ್ನೋಟಕ್ಕೆ ಪರಿಶೀಲಿಸಿ ಮತ್ತು ದಂಪತಿಗಳನ್ನು ರಾಜ್ಯಕ್ಕೆ ಪ್ರವೇಶಿಸಲು ಅವಕಾಶ ಮಾಡಿಕೊಟ್ಟಿದ್ದಾರೆ. ಆದಾಗ್ಯೂ, ಅವರು ಮುಂದಿನ ಚೆಕ್‌ಪೋಸ್ಟ್ ನಲ್ಲಿ ಸಿಕ್ಕಿಬಿದ್ದಿದ್ದಾರೆ.

ಕೊಡಗಿನ ಅಮ್ಮತ್ತಿಗೆ ಆಗಮಿಸಿದಾಗ, ದಂಪತಿಗಳ ಕೋವಿಡ್ ವರದಿಗಳನ್ನು ಗ್ರಾಮ ಲೆಕ್ಕಾಧಿಕಾರಿಗಳಾದ ಪ್ರವೀಣ್ ಸ್ಕ್ಯಾನ್ ಮಾಡಿದ್ದಾರೆ. ಇಬ್ಬರು ಅಧಿಕಾರಿಗಳು ವಿರಾಜಪೇಟೆ ಗ್ರಾಮಾಂತರ ಪೊಲೀಸರೊಂದಿಗೆ ಚೆಕ್‌ಪಾಯಿಂಟ್ ನಿರ್ವಹಿಸುತ್ತಿದ್ದರು. ಅವರು ಕೋವಿಡ್ ಪರೀಕ್ಷಾ ವರದಿಗಳಲ್ಲಿ ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಿದಾಗ, ವರದಿಗಳು ನಕಲಿಯಾಗಿವೆ ಎಂದು ಅಧಿಕಾರಿಗಳಿಗೆ ಕಂಡುಬಂದಿದೆ.