ಮಹಿಳಾ ಪೊಲೀಸ್ ಜೊತೆ ಹೋಟೆಲಲ್ಲಿ ಸಿಕ್ಕಿಬಿದ್ದ ಹಿರಿಯ ಅಧಿಕಾರಿಗೆ ‘ಪೇದೆ’ ಯಾಗಿ ಹಿಂಬಡ್ತಿ

ಲಖನೌ: ಹೋಟೆಲ್‌ ನಲ್ಲಿ ಮಹಿಳಾ ಕಾನ್‌ ಸ್ಟೆಬಲ್‌ ಜತೆಗೆ ಆಕ್ಷೇಪಾರ್ಹ ಸ್ಥಿತಿಯಲ್ಲಿ ಸಿಕ್ಕಿಬಿದ್ದ ಮೂರು ವರ್ಷಗಳ ನಂತರ ಉತ್ತರ ಪ್ರದೇಶ ಪೊಲೀಸ್ ಉಪ ಅಧೀಕ್ಷಕ ಕೃಪಾ ಶಂಕರ್ ಕನೌಜಿಯಾ ಅವರನ್ನು ಡಿಮೋಷನ್ ಮಾಡಿ ಕಾನ್‌ಸ್ಟೆಬಲ್ ಹುದ್ದೆಗೆ ಇಳಿಸಲಾಗಿದೆ.

ಈ ಹಿಂದೆ ಉನ್ನಾವೊದಲ್ಲಿ ಸರ್ಕಲ್ ಆಫೀಸರ್(ಸಿಒ) ಬಿಘಾಪುರ್ ಹುದ್ದೆಯನ್ನು ಹೊಂದಿದ್ದ ಕೃಪಾ ಶಂಕರ್ ಕನೌಜಿಯಾ ಅವರನ್ನು ಈಗ ಗೋರಖ್‌ ಪುರದ 26ನೇ ಪ್ರಾಂತೀಯ ಸಶಸ್ತ್ರ ಕಾನ್‌ಸ್ಟಾಬ್ಯುಲರಿ(ಪಿಎಸಿ) ಬೆಟಾಲಿಯನ್‌ ಗೆ ನಿಯೋಜಿಸಲಾಗಿದೆ. ಜುಲೈ 2021 ರಲ್ಲಿ ರಜೆ ತೆಗೆದುಕೊಂಡ ನಂತರ ಅವರು ಕಾಣೆಯಾಗಿದ್ದರು. ನಂತರ ಅವರ ಪತನ ಪ್ರಾರಂಭವಾಯಿತು.

ಕನೌಜಿಯಾ ಕೌಟುಂಬಿಕ ಕಾರಣಗಳನ್ನು ಉಲ್ಲೇಖಿಸಿ ರಜೆಯನ್ನು ಕೋರಿದ್ದರು, ಆದರೆ ಮನೆಗೆ ಹೋಗುವ ಬದಲು ಅವರು ಮಹಿಳಾ ಕಾನ್‌ಸ್ಟೆಬಲ್‌ ಜತೆಗೆ ಕಾನ್ಪುರದ ಹೋಟೆಲ್‌ ತೆರಳಿದ್ದರು. ಈ ವೇಳೆ ಅವರು ತಮ್ಮ ಖಾಸಗಿ ಹಾಗೂ ಅಧಿಕೃತ ಮೊಬೈಲ್ ಸಂಖ್ಯೆಗಳೆರಡನ್ನೂ ಸ್ವಿಚ್ ಆಫ್ ಮಾಡಿದ್ದು ಅನುಮಾನಕ್ಕೆ ಎಡೆಮಾಡಿಕೊಟ್ಟಿತ್ತು.

ತನ್ನ ಪತಿಯ ಹಠಾತ್ ನಾಪತ್ತೆಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಅವರ ಪತ್ನಿ ಸಹಾಯಕ್ಕಾಗಿ ಉನ್ನಾವೋ ಎಸ್ಪಿ ಅವರನ್ನು ಸಂಪರ್ಕಿಸಿದರು. ಕಾನ್ಪುರ್ ಹೋಟೆಲ್‌ಗೆ ಕನೌಜಿಯಾ ತಲುಪಿದ ನಂತರ ಅವರ ಮೊಬೈಲ್ ನೆಟ್‌ವರ್ಕ್ ಕಾರ್ಯನಿರ್ವಹಿಸುವುದನ್ನು ನಿಲ್ಲಿಸಿರುವುದನ್ನು ಕಣ್ಗಾವಲು ತಂಡ ಪತ್ತೆ ಮಾಡಿತ್ತು.

ಉನ್ನಾವೊ ಪೊಲೀಸರು ಕೂಡಲೇ ಹೋಟೆಲ್‌ಗೆ ಆಗಮಿಸಿದರು, ಅಲ್ಲಿ ಅವರು ಸಿಒ ಮತ್ತು ಮಹಿಳಾ ಕಾನ್‌ಸ್ಟೆಬಲ್ ಒಟ್ಟಿಗೆ ಇರುವುದನ್ನು ಕಂಡುಕೊಂಡರು. ಸಿಸಿಟಿವಿ ಕ್ಯಾಮೆರಾಗಳು ಅವರ ಹೋಟೆಲ್ ಗೆ ಬರುವುದನ್ನು ಸೆರೆಹಿಡಿದಿದ್ದು, ನಂತರದ ತನಿಖೆಗೆ ನಿರ್ಣಾಯಕ ಪುರಾವೆಗಳನ್ನು ಒದಗಿಸಿದ್ದವು.

ಘಟನೆಯ ನಂತರ ಸರ್ಕಾರಕ್ಕೆ ವರದಿ ಸಲ್ಲಿಸಲಾಗಿತ್ತು. ಕೂಲಂಕಷವಾಗಿ ಪರಿಶೀಲಿಸಿದ ನಂತರ, ಸರ್ಕಾರವು ಕೃಪಾ ಶಂಕರ್ ಕನೌಜಿಯಾ ಅವರನ್ನು ಕಾನ್‌ಸ್ಟೆಬಲ್ ಹುದ್ದೆಗೆ ಹಿಂತಿರುಗಿಸಲು ಶಿಫಾರಸು ಮಾಡಿತ್ತು.

ADG ಅಡ್ಮಿನಿಸ್ಟ್ರೇಷನ್ ತಕ್ಷಣವೇ ಈ ನಿರ್ಧಾರವನ್ನು ಜಾರಿಗೆ ತರಲು ಆದೇಶವನ್ನು ಹೊರಡಿಸಿದ್ದು, ಇದು ಪ್ರಮುಖ ಅಧಿಕಾರಿಯ ಅವನತಿಗೆ ಕಾರಣವಾಯಿತು. ಅವರೀಗ ಕಾನ್ ಸ್ಟೆಬಲ್ ಆಗುವಂತಾಗಿದೆ.