10 ರೂಪಾಯಿಗೆ ಕೆಜಿ ಪಡಿತರ ಅಕ್ಕಿ ಖರೀದಿಸಿ 16 ರೂ. ಗೆ ಮಾರಾಟ !

ತೆಲಂಗಾಣದ ವಾರಂಗಲ್‌ ಜಿಲ್ಲೆಯ ಎಲ್ಕತುರ್ಥಿ ತಾಲೂಕಿನ ಸೂರಾರಂ ಗ್ರಾಮದಲ್ಲಿ ಅಕ್ರಮವಾಗಿ ಸಂಗ್ರಹಿಸಿಡಲಾಗಿದ್ದ ಪಡಿತರ ಅಕ್ಕಿಯನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಸೂರಾರಂ ಗ್ರಾಮದ ಚರ್ಚ್ ಬಳಿ ಸುಮಾರು 31 ಕ್ವಿಂಟಾಲ್ ಪಡಿತರ ಅಕ್ಕಿ ಚೀಲಗಳು ಇವೆ ಎಂಬ ಖಚಿತ ಮಾಹಿತಿಯ ಮೇರೆಗೆ ಪೊಲೀಸರು ಅಲ್ಲಿಗೆ ತೆರಳಿದ್ದರು.

ಈ ಚೀಲಗಳ ಬಳಿ ಭೀಮದೇವರಪಲ್ಲಿ ತಾಲೂಕಿನ ಕೊಪ್ಪೂರು ಗ್ರಾಮದ ನರ್ರಾವುಲ ಆಂಜನೇಯುಲು ಎಂಬಾತ ಇದ್ದ. ಕಿಲೋಗ್ರಾಂಗೆ 10 ರೂಪಾಯಿಗಳಂತೆ ಪಡಿತರ ಅಕ್ಕಿಯನ್ನು ಖರೀದಿಸಿ, ನಂತರ ಅವುಗಳನ್ನು ಕಿಲೋಗ್ರಾಂಗೆ 16 ರೂಪಾಯಿಗಳಂತೆ ಕೋಳಿ ಫಾರಂಗಳಿಗೆ ಮಾರಾಟ ಮಾಡುತ್ತಿರುವುದಾಗಿ ಆತ ತಿಳಿಸಿದ.

ಈ ಹಿನ್ನೆಲೆಯಲ್ಲಿ ಪೊಲೀಸರು ಆಂಜನೇಯುಲು ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಈ ದಾಳಿಯಲ್ಲಿ ಹೆಡ್ ಕಾನ್‌ಸ್ಟೆಬಲ್ ವಿಟಲ್, ಕಾನ್‌ಸ್ಟೆಬಲ್ ರಾಜು ಮತ್ತು ಹೋಂಗಾರ್ಡ್ ವೀರಸ್ವಾಮಿ ಪಾಲ್ಗೊಂಡಿದ್ದರು.