ಆಸ್ತಿ ಹರಾಜಿಗೆ ಮುಂದಾದ BSNL; MSTC ವೆಬ್‌ಸೈಟ್‌ನಲ್ಲಿ 13 ಆಸ್ತಿಗಳ ಪಟ್ಟಿ ಪ್ರಕಟ

ಐದು ರಾಜ್ಯಗಳ ಪ್ರಮುಖ ಸ್ಥಳಗಳಲ್ಲಿ ನೆಲೆಗೊಂಡಿರುವ 13 ಹೆಚ್ಚುವರಿ ಆಸ್ತಿಗಳನ್ನು ಹರಾಜು ಮಾಡಲು ರಾಜ್ಯ-ಚಾಲಿತ ಟೆಲಿಕಾಂ ಸಂಸ್ಥೆ BSNL, MSTC ಯೊಂದಿಗೆ ಪಾಲುದಾರಿಕೆ ಹೊಂದಿದೆ ಎಂದು ಕಂಪನಿ ಸೋಮವಾರ ತಿಳಿಸಿದೆ.

ಆಂಧ್ರಪ್ರದೇಶ, ಮಧ್ಯಪ್ರದೇಶ, ಗುಜರಾತ್, ತೆಲಂಗಾಣ ಮತ್ತು ಉತ್ತರ ಪ್ರದೇಶದ 13 ಆಸ್ತಿಗಳನ್ನು ಮಾರಾಟ ಮಾಡಲು ಕಂಪನಿಯು ಡಿಸೆಂಬರ್ 5 ರೊಳಗೆ ಬಿಡ್‌ಗಳನ್ನು ಆಹ್ವಾನಿಸಿದೆ ಎಂದು ಬಿಎಸ್‌ಎನ್‌ಎಲ್ ಪ್ರಕಟಣೆಯಲ್ಲಿ ತಿಳಿಸಿದೆ.

MSTC ಪೋರ್ಟಲ್ ಮೂಲಕ ಆಸ್ತಿಗಳ ಆನ್‌ಲೈನ್ ಮಾರಾಟಕ್ಕಾಗಿ MSTC ಯೊಂದಿಗೆ BSNL ಒಪ್ಪಂದ ಮಾಡಿಕೊಂಡಿದೆ ಎಂದು ಸಾರ್ವಜನಿಕ ವಲಯದ ಟೆಲಿಕಾಂ ಸಂಸ್ಥೆ ತಿಳಿಸಿದೆ.

ನಷ್ಟದಲ್ಲಿರುವ BSNL 20,160 ಕೋಟಿ ಮೌಲ್ಯದ 14 ಆಸ್ತಿಗಳನ್ನು ಗುರುತಿಸಿದೆ. ಮತ್ತು ಟೆಲಿಕಾಂ ಕಾರ್ಪೊರೇಶನ್‌ನ ಮಹತ್ವಾಕಾಂಕ್ಷೆಯ ಆಸ್ತಿ ನಗದೀಕರಣ ಯೋಜನೆಗಳ ಭಾಗವಾಗಿ ಹೂಡಿಕೆ ಮತ್ತು ಸಾರ್ವಜನಿಕ ಆಸ್ತಿ ನಿರ್ವಹಣೆ ಇಲಾಖೆಗೆ (DIPAM) ಮಾರಾಟಕ್ಕೆ ಪಟ್ಟಿಯನ್ನು ಸಲ್ಲಿಸಿದೆ.

ಅಕ್ಟೋಬರ್ 2019 ರಲ್ಲಿ ಸರ್ಕಾರವು BSNL ಮತ್ತು MTNL ಗಾಗಿ ರೂ. 69,000-ಕೋಟಿ ಪುನರುಜ್ಜೀವನ ಪ್ಯಾಕೇಜ್ ಅನ್ನು ಅನುಮೋದಿಸಿತ್ತು. ಇದರಲ್ಲಿ ಎರಡು ನಷ್ಟದ ಸಂಸ್ಥೆಗಳನ್ನು ವಿಲೀನಗೊಳಿಸುವುದು, ಅದರ ಆಸ್ತಿಗಳಿಂದ ಹಣ ಗಳಿಸುವುದು ಮತ್ತು ಉದ್ಯೋಗಿಗಳಿಗೆ VRS ನೀಡುವ ಮೂಲಕ ಸಂಯೋಜಿತ ಘಟಕವು ಎರಡು ವರ್ಷಗಳಲ್ಲಿ ಲಾಭದಾಯಕವಾಗುತ್ತದೆ ಎನ್ನಲಾಗಿತ್ತು.

ಮಾರಾಟಕ್ಕೆ ಪಟ್ಟಿ ಮಾಡಲಾದ 13 ಆಸ್ತಿಗಳಲ್ಲದೆ, ಪೈಪ್‌ಲೈನ್‌ನಲ್ಲಿ ಹೆಚ್ಚಿನ ಆಸ್ತಿಗಳಿದ್ದು ಶೀಘ್ರದಲ್ಲೇ ಹರಾಜಿಗೆ ಇಡಲಾಗುವುದು ಎಂದು ಬಿಎಸ್‌ಎನ್‌ಎಲ್ ತಿಳಿಸಿದೆ.

ಆಂಧ್ರಪ್ರದೇಶದ ತಾಡೆಪಲ್ಲಿಗುಡೆಂ, ಪತಂಚೆರು ಮತ್ತು ಕೊಂಡಪಲ್ಲಿ, ಗುಜರಾತ್‌ನ ಭರೂಚ್ ಮತ್ತು ಸೂರತ್, ಮಧ್ಯಪ್ರದೇಶದ ಪುರಾನಿ ಇಟಾರ್ಸಿ ಮತ್ತು ದೇವಾಸ್ ಸಿಟಿ, ಲಕ್ನೋ ಮತ್ತು ಯುಪಿಯ ಬಿಜ್ನೋರ್‌ನಲ್ಲಿನ ಆಸ್ತಿಗಳನ್ನು ಮಾರಾಟ ಮಾಡಲಾಗುತ್ತಿದೆ.