BREAKING: ಹೋಂ ಐಸೋಲೇಷನ್ ಕುರಿತು ಕೇಂದ್ರ ಸರ್ಕಾರದಿಂದ ಹೊಸ ಮಾರ್ಗಸೂಚಿ ಬಿಡುಗಡೆ

ಸೌಮ್ಯ ಹಾಗೂ ಲಕ್ಷಣ ರಹಿತ ಕೋವಿಡ್​ ಸೋಂಕು ಹೊಂದಿರುವ ರೋಗಿಗಳಿಗೆ ಕೇಂದ್ರ ಆರೋಗ್ಯ ಸಚಿವಾಲಯು ಪರಿಷ್ಕೃತ ಮಾರ್ಗಸೂಚಿಯನ್ನು ಇಂದು ಬಿಡುಗಡೆ ಮಾಡಿದೆ.

ಹೊಸ ಮಾರ್ಗಸೂಚಿಯ ಪ್ರಕಾರ ಹೋಂ ಐಸೋಲೇಷನ್​​ನಲ್ಲಿರುವ ಸೌಮ್ಯ ಲಕ್ಷಣ ಅಥವಾ ಲಕ್ಷಣ ರಹಿತ ಸೋಂಕನ್ನು ಹೊಂದಿರುವ ರೋಗಿಗಳು ಕೋವಿಡ್​ ಪಾಸಿಟಿವ್​ ವರದಿ ಪಡೆದ ಒಂದು ವಾರಗಳ ಬಳಿಕ ಹಾಗೂ ಮೂರು ದಿನಗಳ ಕಾಲ ಸತತವಾಗಿ ಜ್ವರವನ್ನು ಹೊಂದಿರದೇ ಇದ್ದಲ್ಲಿ ಹೋಂ ಐಸೋಲೇಷನ್​ನ ಹೊಸ ನಿಯಮಾವಳಿಗಳ ಪ್ರಕಾರ ರೋಗಿಯನ್ನು ಡಿಸ್ಚಾರ್ಜ್ ಮಾಡಲಾಗುತ್ತದೆ. ಹಾಗೂ ಅವರ ಹೋಂ ಐಸೋಲೇಷನ್​ ಅವಧಿಯು ಕೊನೆಗಳ್ಳುತ್ತದೆ. ಇಂತವರು ಪುನಃ ಕೊರೊನಾ ಪರೀಕ್ಷೆ ಮಾಡಿಸುವ ಅವಶ್ಯಕತೆ ಇರುವುದಿಲ್ಲ ಎಂದು ಹೇಳಿದೆ.

ದೇಶದಲ್ಲಿ ಕಳೆದ 9 ದಿನಗಳಲ್ಲಿ ಕೊರೊನಾ ಪ್ರಕರಣಗಳು ಆರು ಪಟ್ಟು ಅಧಿಕವಾಗಿದೆ. ಓಮಿಕ್ರಾನ್​ ಪ್ರಕರಣಗಳು ಕಳೆದ ಮೂರು ದಿನಗಳಲ್ಲಿ ದ್ವಿಗುಣಗೊಂಡಿದೆ. ಆದರೆ ಆಸ್ಪತ್ರೆಯತ್ತ ಮುಖ ಮಾಡುತ್ತಿರುವ ಜನರ ಸಂಖ್ಯೆ ಕಡಿಮೆ ಪ್ರಮಾಣದಲ್ಲಿದೆ. ಇದೇ ಕಾರಣಕ್ಕಾಗಿ ಹೋಂ ಐಸೋಲೇಷನ್ ನಿಯಮಾವಳಿಗಳನ್ನು ಪರಿಷ್ಕರಿಸಲಾಗಿದೆ. ಭಾರತದಲ್ಲಿ ಡೆಲ್ಟಾ ರೂಪಾಂತರಿಯಿಂದಾಗಿ ಪ್ರತಿಕೂಲ ಪರಿಣಾಮ ಉಂಟಾಗಿತ್ತು. ಆದರೆ ಆಫ್ರಿಕಾ ಮೂಲದ ಓಮಿಕ್ರಾನ್​ ಇಷ್ಟೊಂದು ಭಯಾನಕವಾಗಿಲ್ಲ ಎಂದು ಸಧ್ಯಕ್ಕೆ ಭಾವಿಸಲಾಗಿದೆ. ಆದರೆ ಮುಂದಿನ ದಿನಗಳಲ್ಲಿ ಏನಾಗಬಹುದು ಎಂಬುದನ್ನು ಈಗಲೇ ಊಹಿಸಲು ಸಾಧ್ಯವಿಲ್ಲ ಎಂದು ಕೇಂದ್ರ ಆರೋಗ್ಯ ಸಚಿವಾಲಯ ಹೇಳಿದೆ.