BJPಯಲ್ಲಿ ಹೌಸ್ ಫುಲ್ ಆಗಿದೆ; ಇನ್ನೂ 16 ಜನರನ್ನು ಎಲ್ಲಿ ಕೂರಿಸಿಕೊಳ್ತೀರಿ…..? ಟೈಂ ಪಾಸ್ ಮಾಡ್ತಿದ್ದಾರೆ; ಸಹೋದರರಿಗೆ ಟಾಂಗ್ ನೀಡಿದ ಸತೀಶ್ ಜಾರಕಿಹೊಳಿ

ಬೆಳಗಾವಿ: ಕಾಂಗ್ರೆಸ್ ನ 16 ಶಾಸಕರು ಬಿಜೆಪಿಗೆ ಸೇರ್ಪಡೆಯಾಗಲಿದ್ದಾರೆ ಎಂಬ ಶಾಸಕ ರಮೇಶ್ ಜಾರಕಿಹೊಳಿ ಹಾಗೂ ಲಖನ್ ಜಾರಕಿಹೊಳಿ ಹೇಳಿಕೆಗೆ ತಿರುಗೇಟು ನೀಡಿರುವ ಶಾಸಕ ಸತೀಶ್ ಜಾರಕಿಹೊಳಿ, ಈಗಾಗಲೇ ಬಿಜೆಪಿಯಲ್ಲಿ ಹೌಸ್ ಫುಲ್ ಆಗಿದೆ. 120 ಸೀಟ್ ಫುಲ್ ಆಗಿದೆ. ಇನ್ನೂ 16 ಜನರನ್ನು ಎಲ್ಲಿ ಕೂರಿಸ್ತೀರಿ? ಎಂದು ಪ್ರಶ್ನಿಸಿದ್ದಾರೆ.

ಬೆಳಗಾವಿಯಲ್ಲಿ ಮಾತನಾಡಿದ ಸತೀಶ್ ಜಾರಕಿಹೊಳಿ, ಅಂದು ರಮೇಶ್ ಜಾರಕಿಹೊಳಿ 16 ಕಾಂಗ್ರೆಸ್ ಶಾಸಕರು ನನ್ನ ಸಂಪರ್ಕದಲ್ಲಿದ್ದಾರೆ. ಹೈಕಮಾಂಡ್ ಸೂಚಿಸಿದರೆ ಪಕ್ಷಕ್ಕೆ ಕರೆ ತರುತ್ತೇನೆ ಅಂದ್ರು. ಇಂದು ಲಖನ್ ಜಾರಕಿಹೊಳಿ 16 ಅಲ್ಲ 20 ಜನರನ್ನು ಬೇಕಾದರೂ ತರುವ ಶಕ್ತಿ ಇದೆ ಎಂದು ಹೇಳುತ್ತಿದ್ದಾರೆ. ಈಗಾಗಲೇ ಬಿಜೆಪಿಯಲ್ಲಿ 120 ಸೀಟ್ ಭರ್ತಿಯಾಗಿದೆ. ಇನ್ನೂ 16 ಜನರನ್ನು ಎಲ್ಲಿ ಕೂರಿಸ್ತಾರೆ? ಟಾಪ್ ಮೇಲಾ, ಕೆಳಗಾ. ಡಿಕ್ಕಿಯಲ್ಲಾ…? ಸಹೋದರರಿಬ್ಬರೂ ಟೈಂ ಪಾಸ್ ಮಾಡ್ತಿದ್ದಾರೆ ಎಂದು ಟಾಂಗ್ ನೀಡಿದರು.

ರಮೇಶ್ ಜಾರಕಿಹೊಳಿ, ಲಖನ್ ಇಬ್ಬರೂ ರಾಜಕೀಯ ವ್ಯಾಪಾರ ಮಾಡ್ತಿದ್ದಾರೆ. ಸಮಾಜಸೇವೆ ಮಾಡುತ್ತಿಲ್ಲ. ಬಿಜೆಪಿಗೆ ಹೋಗ್ತಿವಿ ಅಂತಾ ಕಾಂಗ್ರೆಸ್ ಗೆ ಕಾಂಗ್ರೆಸ್ ಗೆ ಹೋಗ್ತೀವಿ ಅಂತ ಬಿಜೆಪಿಗೆ ಬ್ಲ್ಯಾಕ್ ಮೇಲ್ ಮಾಡ್ತಿದ್ದಾರೆ. ದಿನಕ್ಕೊಂದು ಹೊಸ ಬಾಂಬ್ ಹಾಕ್ತಿರ್ತಾರೆ ಕೆಲವು ಸ್ಫೋಟ ಆಗುತ್ತೆ ಕೆಲವು ಟುಸ್ ಆಗುತ್ತೆ. ಜಾರಕಿಹೊಳಿ ಬಾಂಬ್ ಸಿಡಿಯುತ್ತೆ ಅಂತ ಕಿವಿ ಮುಚ್ಚಿಕೊಳ್ಳಬೇಕು ಅಷ್ಟೇ ಎಂದು ವ್ಯಂಗ್ಯವಾಡಿದ್ದಾರೆ.