ಸಂಸದೆ ನುಸ್ರತ್​ ಜಹಾನ್​ ಮಗುವಿನ ತಂದೆ ಹೆಸರು ಕೊನೆಗೂ ಬಹಿರಂಗ

ಖ್ಯಾತ ಬಂಗಾಳಿ ನಟಿ ಹಾಗೂ ಟಿಎಂಸಿ ಸಂಸದೆ ನುಸ್ರತ್​ ಜಹಾನ್​ಗೆ ಕಳೆದ ತಿಂಗಳು ಮಗು ಜನಿಸಿದ ಬಳಿಕ ಮಗುವಿನ ತಂದೆ ಯಾರು ಎಂಬ ಪ್ರಶ್ನೆ ಎಲ್ಲೆಡೆ ಹರಿದಾಡಿತ್ತು.

ಆದರೆ ಇದೀಗ ಈ ಎಲ್ಲಾ ಪ್ರಶ್ನೆಗಳಿಗೆ ನುಸ್ರತ್​ ಜಹಾನ್​​ ಉತ್ತರ ನೀಡಿದ್ದಾರೆ. ಮಗುವಿನ ಜನನ ಪ್ರಮಾಣ ಪತ್ರದಲ್ಲಿ ಮಗುವಿನ ತಂದೆಯ ಹೆಸರಿನ ಜಾಗದಲ್ಲಿ ಬಂಗಾಳಿ ನಟ ಯಶ್​ ದಾಸ್​ ಗುಪ್ತಾ ಹೆಸರು ನಮೂದಾಗಿದೆ.

ಟಿಎಂಸಿ ಸಂಸದೆ ನುಸ್ರತ್​​ ಜಹಾನ್​ ಆಗಸ್ಟ್​ 26ರಂದು ಗಂಡು ಮಗುವಿಗೆ ಜನ್ಮ ನೀಡಿದ್ದರು. ಆದರೆ ಮಗುವಿನ ತಂದೆಯ ಹೆಸರನ್ನು ಬಹಿರಂಗ ಮಾಡಲು ನಿರಾಕರಿಸಿದ್ದರು.

ಇದಾದ ಬಳಿಕ ಈ ಮಗುವಿನ ತಂದೆ ಯಾರು ಎಂಬ ಪ್ರಶ್ನೆ ಸಾಕಷ್ಟು ಚರ್ಚೆಯನ್ನು ಹುಟ್ಟುಹಾಕಿತ್ತು.

ನವಜಾತ ಶಿಶುವಿನ ಜನನ ಪ್ರಮಾಣ ಪತ್ರದಲ್ಲಿ ಮಗುವಿನ ಹೆಸರನ್ನು ಯಿಶಾನ್​ ಕೆ ದಾಸ್​​ಗುಪ್ತಾ ಎಂದು ತಂದೆಯ ಹೆಸರನ್ನು ದೇಬಾಶಿಶ್​ ದಾಸ್​ ಗುಪ್ತಾ ಎಂದು ಬರೆಯಲಾಗಿದೆ. ದೇಬಾಶಿಶ್​ ದಾಸ್​ ಗುಪ್ತಾ ಬಂಗಾಳಿ ನಟ ಯಶ್​ ದಾಸ್​ಗುಪ್ತಾರ ಹೆಸರಾಗಿದೆ.

ಕೊಲ್ಕತ್ತಾದ ಭಾಗೀರತಿ ನಿಯೋಟಿಯಾ ಆಸ್ಪತ್ರೆಯಿಂದ ನುಸ್ರತ್​ ಡಿಸ್ಚಾರ್ಜ್​ ಆಗಿದ್ದ ವೇಳೆ ಯಶ್​ ನವಜಾತ ಶಿಶುವನ್ನು ತೋಳಲ್ಲಿ ಎತ್ತುಕೊಂಡು ಹೋಗುತ್ತಿದ್ದ ಫೋಟೋ ಹಾಗೂ ವಿಡಿಯೋಗಳು ವೈರಲ್​ ಆಗಿದ್ದವು.

2019ರಲ್ಲಿ ನಿಖಿಲ್​ ಜೈನ್​ ಜೊತೆ ನುಸ್ರತ್​ ಜಹಾನ್​ ವಿವಾಹವಾಗಿದ್ದರು. ಆದರೆ ಭಾರತೀಯ ಕಾನೂನಿನ ಪ್ರಕಾರ ಈ ವಿವಾಹ ಅಸಿಂಧು ಎಂದು ಹೇಳಿದಾಗ ಈ ವರ್ಷದ ಆರಂಭದಲ್ಲಿ ಇದೊಂದು ಭಾರೀ ಮಟ್ಟದ ವಿವಾದಕ್ಕೆ ಕಾರಣವಾಗಿತ್ತು.