ಹಿಂದುಜಾ ಗ್ರೂಪ್‌ನ ಸಂಸ್ಥಾಪಕ ಮತ್ತು ಹಿಂದುಜಾ ಕುಟುಂಬದ ಮುಖ್ಯಸ್ಥ ಪಿ.ಡಿ. ಹಿಂದುಜಾ ಅವರ ಹಿರಿಯ ಪುತ್ರ ಶ್ರೀಚಂದ್ ಪಿ. ಹಿಂದುಜಾ ಅವರು 87 ನೇ ವಯಸ್ಸಿನಲ್ಲಿ ಲಂಡನ್‌ ನಲ್ಲಿ ನಿಧನರಾಗಿದ್ದಾರೆ ಎಂದು ಕುಟುಂಬದ ವಕ್ತಾರರು ತಿಳಿಸಿದ್ದಾರೆ.
ಅವರು ಕೆಲ ದಿನಗಳಿಂದ ಅವರು ಅಸ್ವಸ್ಥರಾಗಿದ್ದರು. ಹಿಂದೂಜಾ ಗ್ರೂಪ್‌ನ ಅಧ್ಯಕ್ಷ ಎಸ್‌.ಪಿ. ಹಿಂದುಜಾ ಅವರ ನಿಧನವನ್ನು ಘೋಷಿಸಲು ತೀವ್ರ ವಿಷಾದಿಸುತ್ತೇವೆ ಎಂದು ಕುಟುಂಬದ ವಕ್ತಾರರು ತಿಳಿಸಿದ್ದಾರೆ.
ಶ್ರೀಚಂದ್ ಪಿ. ಹಿಂದುಜಾ ಅವರು ತಮ್ಮ ವ್ಯಾಪಾರ ಸಹೋದ್ಯೋಗಿಗಳು ಮತ್ತು ಸ್ನೇಹಿತರಲ್ಲಿ ‘ಎಸ್ಪಿ’ ಎಂದು ಕರೆಯಲ್ಪಡುತ್ತಿದ್ದರು. ಅವರು ಹಿಂದೂಜಾ ಗ್ರೂಪ್ ನ ಸಂಸ್ಥಾಪಕ ಪಿ.ಡಿ. ಹಿಂದುಜಾ ಅವರ ಹಿರಿಯ ಮಗ. 1952 ರಲ್ಲಿ ತನ್ನ ಶಿಕ್ಷಣವನ್ನು ಪೂರ್ಣಗೊಳಿಸಿದ ನಂತರ, ಎಸ್ಪಿ ತನ್ನ ತಂದೆಯೊಂದಿಗೆ ಕುಟುಂಬ ವ್ಯವಹಾರದಲ್ಲಿ ಸೇರಿಕೊಂಡರು ಮತ್ತು ಹಿಂದುಜಾ ಕುಟುಂಬದ ಮುಖ್ಯಸ್ಥರಾಗಿದ್ದರು, ಜೊತೆಗೆ ಹಿಂದುಜಾ ಗ್ರೂಪ್ ಮತ್ತು ಅದರ ದತ್ತಿ ಪ್ರತಿಷ್ಠಾನಗಳ ಅಧ್ಯಕ್ಷರಾಗಿದ್ದರು. ಅವರ ಸಹೋದರರಾದ ಗೋಪಿಚಂದ್, ಪ್ರಕಾಶ್, ಮತ್ತು ಅಶೋಕ್ ಹಿಂದುಜಾ ಅವರೊಂದಿಗೆ, ಹಿಂದೂಜಾ ಸಮೂಹದ ವೈವಿಧ್ಯೀಕರಣ ಮತ್ತು ವಿಸ್ತರಣೆಯಲ್ಲಿ ಎಸ್ಪಿ ಮಹತ್ವದ ಪಾತ್ರ ವಹಿಸಿದರು.
ಏಷ್ಯಾ, ಮಧ್ಯಪ್ರಾಚ್ಯ, ಯುರೋಪ್ ಮತ್ತು ಅಮೆರಿಕದಾದ್ಯಂತ ವಿವಿಧ ಆರ್ಥಿಕತೆಗಳಲ್ಲಿ ವರ್ಷಗಳ ವ್ಯವಹಾರ ಅನುಭವವನ್ನು ಪಡೆದಿರುವ ಎಸ್ಪಿ ಪ್ರಮುಖ ಅನಿವಾಸಿ ಭಾರತೀಯ(NRI) ಉದ್ಯಮಿಯಾಗಿದ್ದರು ಮತ್ತು ಭಾರತದಲ್ಲಿ ಮೊದಲ ಹೊಸ-ಪೀಳಿಗೆಯ ಖಾಸಗಿ ಬ್ಯಾಂಕ್ ಇಂಡಸ್‌ ಇಂಡ್ ಬ್ಯಾಂಕ್‌ನ ದೃಷ್ಟಿಯನ್ನು ಕಲ್ಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು.
ಹಿಂದುಜಾ ಗ್ರೂಪ್ ಬಹುರಾಷ್ಟ್ರೀಯ ಸಂಘಟಿತ ಸಂಸ್ಥೆಯಾಗಿದ್ದು, $15.2 ಶತಕೋಟಿಯ ಒಟ್ಟು ನಿವ್ವಳ ಮೌಲ್ಯದೊಂದಿಗೆ ಶ್ರೀಚಂದ್, ಗೋಪಿಚಂದ್, ಪ್ರಕಾಶ್ ಮತ್ತು ಅಶೋಕ್ ನಾಲ್ಕು ಒಡಹುಟ್ಟಿದವರಿಂದ ನಿಯಂತ್ರಿಸಲ್ಪಡುತ್ತದೆ.
ಅವರ ಗುಂಪಿನ ವ್ಯಾಪಾರ ಕಾರ್ಯಾಚರಣೆಗಳಲ್ಲಿ ಟ್ರಕ್‌ ಗಳು, ಲೂಬ್ರಿಕಂಟ್‌ಗಳು, ಬ್ಯಾಂಕಿಂಗ್ ಮತ್ತು ಕೇಬಲ್ ಟೆಲಿವಿಷನ್ ಸೇರಿವೆ. ಅವರು ರಾಫೆಲ್ಸ್ ಹೋಟೆಲ್ ಆಗಲು ಸಿದ್ಧವಾಗಿರುವ ಓಲ್ಡ್ ವಾರ್ ಆಫೀಸ್ ಕಟ್ಟಡ ಸೇರಿದಂತೆ ಲಂಡನ್‌ನಲ್ಲಿ ಬೆಲೆಬಾಳುವ ರಿಯಲ್ ಎಸ್ಟೇಟ್ ಅನ್ನು ಹೊಂದಿದ್ದಾರೆ. ಶ್ರೀಚಂದ್ ಮತ್ತು ಗೋಪಿಚಂದ್ ಲಂಡನ್‌ನಲ್ಲಿ ನೆಲೆಸಿದ್ದರೆ, ಪ್ರಕಾಶ್ ಮೊನಾಕೊದಲ್ಲಿ ನೆಲೆಸಿದ್ದಾರೆ ಮತ್ತು ಕಿರಿಯ ಸಹೋದರ ಅಶೋಕ್ ಮುಂಬೈನಿಂದ ಗುಂಪಿನ ಭಾರತೀಯ ವ್ಯವಹಾರ ನೋಡಿಕೊಳ್ಳುತ್ತಾರೆ.
ಎಸ್ಪಿ ಹಿಂದುಜಾ ಮತ್ತು ಅವರ ಸಹೋದರರಾದ ಗೋಪಿಚಂದ್ ಮತ್ತು ಪ್ರಕಾಶ್ ಅವರು ಸ್ವೀಡಿಷ್ ಬಂದೂಕು ತಯಾರಕ ಎಬಿ ಬೋಫೋರ್ಸ್‌ಗೆ ಭಾರತ ಸರ್ಕಾರದೊಂದಿಗೆ ಒಪ್ಪಂದವನ್ನು ಪಡೆಯುವಲ್ಲಿ ಸಹಾಯ ಮಾಡಲು ಸುಮಾರು ಎಸ್‌ಇಕೆ 81 ಮಿಲಿಯನ್ ಕಾನೂನುಬಾಹಿರ ಕಮಿಷನ್‌ಗಳನ್ನು ಸ್ವೀಕರಿಸಿದ್ದಾರೆ ಎಂದು ಆರೋಪಿಸಲಾಗಿದೆ, ಆದರೆ, ಅವರನ್ನು ನ್ಯಾಯಾಲಯವು ಖುಲಾಸೆಗೊಳಿಸಿತು.
Loading ...