ಕೋವಿಡ್‌ ಸಾಂಕ್ರಾಮಿಕದ ನಂತರ ಅಂತಹ ವೈರಲ್ ಸೋಂಕನ್ನು ಪತ್ತೆ ಮಾಡಲು ವಿಜ್ಞಾನಿಗಳು ಸಾಕಷ್ಟು ಅತ್ಯಾಧುನಿಕ ಪರಿಕರಗಳನ್ನು ಆವಿಷ್ಕರಿಸುತ್ತಲೇ ಇದ್ದಾರೆ. ಇದೀಗ ಹೊಸ ಬಗೆಯ ಫೇಸ್‌ ಮಾಸ್ಕ್ ಒಂದನ್ನು ಅಭಿವೃದ್ಧಿಪಡಿಸಿದ್ದಾರೆ. ಗಾಳಿಯಲ್ಲಿರುವ ಇನ್‌ಫ್ಲೂಯೆಂಜಾ ಮತ್ತು ಕೊರೊನಾದಂತಹ ಸಾಮಾನ್ಯ ಉಸಿರಾಟದ ವೈರಸ್‌ಗಳನ್ನು ಈ ಫೇಸ್‌ ಮಾಸ್ಕ್ 10 ನಿಮಿಷಗಳೊಳಗೆ ಪತ್ತೆ ಮಾಡಬಲ್ಲದು.
ಬಾಯಿ ಅಥವಾ ಮೂಗಿನಿಂದ ಸಿಡಿಯುವ ಹನಿಗಳು ಅಥವಾ ಏರೋಸಾಲ್‌ಗಳಲ್ಲಿ ಹರಡುವ ವೈರಸ್‌ಗಳನ್ನು ಈ ಮಾಸ್ಕ್ ಕಂಡುಹಿಡಿಯುತ್ತದೆ. ನಮ್ಮನ್ನು ಸುತ್ತುವರಿದ ಗಾಳಿಯಲ್ಲಿ ನಿರ್ದಿಷ್ಟ ವೈರಸ್‌ಗಳು ಇದ್ದರೆ, ಅತ್ಯಂತ ಸೂಕ್ಷ್ಮವಾದ ಈ ಮಾಸ್ಕ್ ಧರಿಸಿದವರಿಗೆ 10 ನಿಮಿಷಗಳಲ್ಲಿ ಮೊಬೈಲ್ ಮೂಲಕ ಸಂದೇಶ ತಲುಪುತ್ತದೆ.
ಫೇಸ್‌ ಮಾಸ್ಕ್ ಧರಿಸುವುದರಿಂದ ಸೋಂಕು ಹರಡುವುದನ್ನು ತಡೆಗಟ್ಟಬಹುದು ಅನ್ನೋದು ಎಲ್ಲರಿಗೂ ಗೊತ್ತೇ ಇದೆ. ಇದೀಗ ಗಾಳಿಯಲ್ಲಿ ವೈರಸ್ ಇರುವಿಕೆಯನ್ನು ಸಹ ಪತ್ತೆಹಚ್ಚುವ ಮಾಸ್ಕ್, ಅದನ್ನು ಧರಿಸಿದವರಿಗೆ ಎಚ್ಚರಿಕೆಯ ಸಂದೇಶವನ್ನೂ ರವಾನಿಸುತ್ತದೆ.
COVID-19 ಮತ್ತು H1N1 ಇನ್‌ಫ್ಲೂಯೆಂಜಾ ಉಂಟುಮಾಡುವ ಉಸಿರಾಟದ ರೋಗಕಾರಕಗಳು, ಸೋಂಕಿತರು ಮಾತನಾಡುವಾಗ, ಕೆಮ್ಮುವಾಗ ಮತ್ತು ಸೀನುವಾಗ ಬಿಡುಗಡೆ ಮಾಡುವ ಸಣ್ಣ ಹನಿಗಳು ಮತ್ತು ಏರೋಸಾಲ್‌ಗಳ ಮೂಲಕ ಹರಡುತ್ತವೆ. ಈ ವೈರಸ್-ಒಳಗೊಂಡಿರುವ ಅಣುಗಳು, ವಿಶೇಷವಾಗಿ ಸಣ್ಣ ಏರೋಸಾಲ್‌ಗಳು, ದೀರ್ಘಕಾಲದವರೆಗೆ ಗಾಳಿಯಲ್ಲಿರಬಹುದು.
ಶಾಂಘೈ ವಿಜ್ಞಾನಿಗಳ ತಂಡ ಆಪ್ಟಾಮರ್‌ಗಳೊಂದಿಗೆ ಸಣ್ಣ ಸಂವೇದಕವನ್ನು ವಿನ್ಯಾಸಗೊಳಿಸಿದೆ. ಇದು ಒಂದು ರೀತಿಯ ಸಂಶ್ಲೇಷಿತ ಅಣುವಾಗಿದ್ದು ಪ್ರತಿಕಾಯಗಳಂತಹ ರೋಗಕಾರಕಗಳ ವಿಶಿಷ್ಟ ಪ್ರೋಟೀನ್‌ಗಳನ್ನು ಗುರುತಿಸುತ್ತದೆ. ಇದು SARS-CoV-2, H5N1 ಮತ್ತು H1N1 ನ ಮೇಲ್ಮೈ ಪ್ರೋಟೀನ್‌ಗಳನ್ನು ಏಕಕಾಲದಲ್ಲಿ ಗುರುತಿಸಬಲ್ಲದು. ಒಮ್ಮೆ ಆಪ್ಟಾಮರ್‌ಗಳು ಗಾಳಿಯಲ್ಲಿರುವ ಸೋಂಕನ್ನು ಪತ್ತೆ ಮಾಡಿದರೆ ಕನೆಕ್ಟ್‌ ಆಗಿರುವ ಅಯಾನ್-ಗೇಟೆಡ್ ಟ್ರಾನ್ಸಿಸ್ಟರ್ ಸಿಗ್ನಲ್ ಅನ್ನು ನೀಡುತ್ತವೆ. ಫೋನ್‌ಗಳ ಮೂಲಕ ಮಾಸ್ಕ್ ಧರಿಸಿರುವವರಿಗೆ ಸಂದೇಶ ರವಾನಿಸುತ್ತವೆ.
ಅಯಾನ್-ಗೇಟೆಡ್ ಟ್ರಾನ್ಸಿಸ್ಟರ್ ಒಂದು ನವೀನ ಪ್ರಕಾರದ ಸಾಧನವಾಗಿದ್ದು, ಹೆಚ್ಚು ಸೂಕ್ಷ್ಮವಾಗಿರುತ್ತದೆ. ಹೀಗಾಗಿ ಫೇಸ್‌ ಮಾಸ್ಕ್ 10 ನಿಮಿಷಗಳಲ್ಲಿ ಗಾಳಿಯಲ್ಲಿರುವ ರೋಗಕಾರಕಗಳ ಮಟ್ಟವನ್ನು ಸಹ ಪತ್ತೆ ಮಾಡುತ್ತದೆ. ಎಲಿವೇಟರ್‌ಗಳು ಅಥವಾ ಮುಚ್ಚಿದ ಕೋಣೆಗಳಂತಹ ಸ್ಥಳಗಳಲ್ಲಿ ಫೇಸ್‌ ಮಾಸ್ಕ್ ಉತ್ತಮವಾಗಿ ಕಾರ್ಯ ನಿರ್ವಹಿಸುತ್ತದೆ. ಯಾಕಂದ್ರೆ ಅಲ್ಲಿ ನಾವು ಸೋಂಕಿಗೆ ಒಳಗಾಗುವ ಅಪಾಯ ಹೆಚ್ಚು ಎನ್ನುತ್ತಾರೆ ವಿಜ್ಞಾನಿಗಳು ಪಾಲಿಮರ್‌ಗಳು ಮತ್ತು ಟ್ರಾನ್ಸಿಸ್ಟರ್‌ಗಳ ವಿನ್ಯಾಸವನ್ನು ಉತ್ತಮಗೊಳಿಸುವ ಮೂಲಕ ವೈರಸ್ ಪತ್ತೆ ಸಮಯವನ್ನು ಕಡಿಮೆ ಮಾಡಲು ಮತ್ತು ಸಂವೇದಕದ ಸೂಕ್ಷ್ಮತೆಯನ್ನು ಹೆಚ್ಚಿಸಲು ವಿಜ್ಞಾನಿಗಳು ಪ್ರಯತ್ನಿಸುತ್ತಿದ್ದಾರೆ.
Loading ...