ಮಧ್ಯಪ್ರದೇಶದ ಭೋಪಾಲ್‌ನಲ್ಲಿ ಮದುವೆಯ ಆರತಕ್ಷತೆ ದಿನವೇ ವಧುವೊಬ್ಬಳು ತನ್ನ ಗೆಳೆಯನೊಂದಿಗೆ ಓಡಿಹೋಗಿರುವ ಘಟನೆ ಬೆಳಕಿಗೆ ಬಂದಿದೆ. ಈ ನಾಟಕೀಯ ತಿರುವಿನಿಂದ ಕಂಗಾಲಾದ ವರ ಮತ್ತು ಆತನ ಕುಟುಂಬ ಪೊಲೀಸರನ್ನು ಸಂಪರ್ಕಿಸಿ ಆರೋಪಿಗಳ ವಿರುದ್ಧ ದೂರು ದಾಖಲಿಸಿದ್ದಾರೆ. ಪೊಲೀಸರು ತನಿಖೆ ಆರಂಭಿಸಿದ್ದಾರೆ.
ಮಧ್ಯಪ್ರದೇಶದ ರಾಜಧಾನಿಯ ಟಿಟಿ ನಗರ ಪ್ರದೇಶದಲ್ಲಿ ವರದಿಯಾದ ಈ ಘಟನೆ, ಆರಂಭದಲ್ಲಿ ಅಪಹರಣ ಪ್ರಕರಣವೆಂದು ಕಂಡುಬಂದಿತು, ಆದರೆ ನಂತರ ಹುಡುಗಿ ತನ್ನ ಗೆಳೆಯನೊಂದಿಗೆ ಓಡಿಹೋಗಿರುವುದು ಬೆಳಕಿಗೆ ಬಂದಿದೆ ಎಂದು ಸ್ಟೇಷನ್ ಹೌಸ್ ಆಫೀಸರ್ (ಎಸ್‌ಎಚ್‌ಒ) ಸುಧೀರ್ ಅರಾಜಾರಿಯಾ ತಿಳಿಸಿದ್ದಾರೆ.
ಪೊಲೀಸರ ಪ್ರಕಾರ, ಆಶಿಶ್ ರಾಜಕ್ ವಿಡಿಶಾ ಜಿಲ್ಲೆಯ ಗಂಜ್‌ಬಸೋಡಾದ ರೋಶ್ನಿ ಸೋಲಂಕಿ ಅವರನ್ನು ವಿವಾಹವಾಗಿದ್ದರು. ಮದುವೆ ಸಮಾರಂಭವು ಗಂಜ್‌ಬಸೋಡಾದಲ್ಲಿ ನಡೆಯಿತು. ನವವಿವಾಹಿತ ದಂಪತಿಗಳು ಗಂಜ್‌ಬಸೋಡಾದಿಂದ ಮರಳಿದ ನಂತರ ಬುಧವಾರ ಆರತಕ್ಷತೆ ಆಯೋಜಿಸಲು ನಿರ್ಧರಿಸಿದ್ದರು.
ಆರತಕ್ಷತೆಯ ದಿನದಂದು, ಆಶಿಶ್ ಮತ್ತು ರೋಶ್ನಿ ಹತ್ತಿರದ ಬ್ಯೂಟಿ ಪಾರ್ಲರ್‌ಗೆ ಹೋಗಿ ಅಲ್ಲಿಂದ ಅವರು ನೇರವಾಗಿ ಮದುವೆಯ ಹಾಲ್‌ಗೆ ತೆರಳಿದ್ದರು.
ಕಾರಿನಲ್ಲಿ ರಿಸೆಪ್ಶನ್ ಸ್ಥಳಕ್ಕೆ ತಲುಪಿದ ನಂತರ, ಆಶಿಶ್ ಒಂದು ಬದಿಯಿಂದ ಇಳಿದರೆ ರೋಶ್ನಿ ಮತ್ತು ಆಶಿಶ್ ಅವರ ಸಹೋದರಿ ಮತ್ತೊಂದು ಬದಿಯಿಂದ ಇಳಿದಿದ್ದರು.
ಅಷ್ಟರಲ್ಲಿ, ಕಾರೊಂದು ರಸ್ತೆಯಲ್ಲಿ ವೇಗವಾಗಿ ಚಲಿಸಿ ಆಶಿಶ್ ಅವರ ಕಾರಿನ ಪಕ್ಕದಲ್ಲಿ ನಿಂತಿದ್ದು, ಇನ್ನೊಂದು ಕಾರಿನಿಂದ ಯುವಕನೊಬ್ಬ ಹೊರಬಂದು ಆಶಿಶ್ ಅವರ ಸಹೋದರಿಯನ್ನು ತಳ್ಳಿ ವಧು ರೋಶ್ನಿಯನ್ನು ಕಾರಿನಲ್ಲಿ ಕೂರಿಸಿಕೊಂಡು ವೇಗವಾಗಿ ಸ್ಥಳದಿಂದ ಪರಾರಿಯಾಗಿದ್ದ. ಆರಂಭದಲ್ಲಿ ಇದು ಅಪಹರಣ ಪ್ರಕರಣವೆಂದು ತೋರಿದರೂ, ಸ್ವಲ್ಪ ಸಮಯದ ನಂತರ ರೋಶ್ನಿ ತನ್ನ ಗೆಳೆಯ ಅಂಕಿತ್‌ನೊಂದಿಗೆ ಓಡಿಹೋಗಿರುವುದು ಸ್ಪಷ್ಟವಾಯಿತು.
ಪೊಲೀಸರ ಪ್ರಕಾರ, ರೋಶ್ನಿ ಕಳೆದ ಐದು ವರ್ಷಗಳಿಂದ ಗಂಜ್‌ಬಸೋಡಾದ ಅಂಕಿತ್ ಎಂಬ ಹುಡುಗನೊಂದಿಗೆ ಸಂಬಂಧ ಹೊಂದಿದ್ದಳು, ಇದು ಹುಡುಗಿಯ ಕುಟುಂಬಕ್ಕೆ ತಿಳಿದಿತ್ತು ಮತ್ತು ಇದೇ ವಿಷಯಕ್ಕೆ ಎರಡೂ ಕುಟುಂಬಗಳ ನಡುವೆ ವಿವಾದವಿತ್ತು.
ಏತನ್ಮಧ್ಯೆ, ರೋಶ್ನಿ ಅವರ ವಿವಾಹವನ್ನು ಭೋಪಾಲ್ ನಿವಾಸಿ ಆಶಿಶ್ ಅವರೊಂದಿಗೆ ನಿಗದಿಪಡಿಸಿ ಮಂಗಳವಾರ ಮದುವೆ ನಡೆಯಿತು, ಆದರೆ ಬುಧವಾರ, ರೋಶ್ನಿ ಅವಕಾಶವನ್ನು ಬಳಸಿಕೊಂಡು ತನ್ನ ಗೆಳೆಯ ಅಂಕಿತ್‌ನೊಂದಿಗೆ ಓಡಿಹೋಗಲು ಯೋಜಿಸಿದ್ದು, ಘಟನೆಯ ನಂತರ, ವರನ ಕಡೆಯವರು ಪೊಲೀಸ್ ಠಾಣೆಯನ್ನು ತಲುಪಿ ಘಟನೆಯ ಬಗ್ಗೆ ದೂರು ದಾಖಲಿಸಿದ್ದಾರೆ.
Loading ...