ಕೆಲಸದ ಒತ್ತಡದಿಂದ ಉದ್ಯೋಗಿ ಸಾವಿನ ಬೆನ್ನಲ್ಲೇ ಮತ್ತೊಂದು ಕರಾಳತೆ ಬಯಲು; ಬೆಂಗಳೂರಿನ ಶೆಫ್ ಬಿಚ್ಚಿಟ್ರು ಶಿಕ್ಷೆಯ ಸಂಗತಿ

ಕೆಲಸದ ಒತ್ತಡದಿಂದ ಪುಣೆಯಲ್ಲಿ 26 ವರ್ಷದ EY ಇಂಡಿಯಾ ಉದ್ಯೋಗಿಯ ದುರಂತ ಸಾವಿನ ನಂತರ ಕೆಲಸ ಸಂಬಂಧಿತ ಒತ್ತಡದ ಬಗ್ಗೆ ಸಾಕಷ್ಟು ಚರ್ಚೆಯಾಗ್ತಿದೆ. ಕೆಲಸದ ಸ್ಥಳದ ಪರಿಸರದ ಬಗ್ಗೆ ಹಲವರು ಅನುಭವಗಳನ್ನು ಹಂಚಿಕೊಳ್ಳಲು ಪ್ರಾರಂಭಿಸಿದ್ದಾರೆ.

ಬೆಂಗಳೂರು ಮೂಲದ ಶೆಫ್ ಮತ್ತು ನ್ಯೂಟ್ರಿಷಿಯನ್ ಕೋಚ್ ನಯನತಾರಾ ಮೆನನ್ ಬಾಗ್ಲಾ ಅವರು ಐಷಾರಾಮಿ ಹೋಟೆಲ್‌ನಲ್ಲಿ ಕೆಲಸ ಮಾಡಿದ ಅನುಭವದ ಕುರಿತು ‘ದಿ ನೋಡ್’ ನಿಯತಕಾಲಿಕೆಯೊಂದಿಗೆ ಮಾತನಾಡಿದ್ದಾರೆ.

ಅವರ ಅನುಭವದ ಪ್ರಕಾರ, ಹೋಟೆಲ್ ಹೆಸರನ್ನು ಉಲ್ಲೇಖಿಸದೆ ಕೆಲಸಕ್ಕೆ ತಡವಾಗಿ ಬಂದವರಿಗೆ ಎರಡು ಗಂಟೆಗಳ ಕಾಲ ತಮ್ಮ ಕೈ ಮೇಲಕ್ಕೆತ್ತಿ ನಿಲ್ಲುವಂತಹ ಶಿಕ್ಷೆ ವಿಧಿಸಲಾಗುತ್ತಿತ್ತು ಮತ್ತು ಬರಿಗೈಯಲ್ಲಿ ರೆಫ್ರಿಜರೇಟರ್ ಸ್ವಚ್ಛಗೊಳಿಸಲು ಸೂಚಿಸಲಾಗುತ್ತಿತ್ತು ಎಂಬ ಆಘಾತಕಾರಿ ಅಂಶಗಳನ್ನು ಹಂಚಿಕೊಂಡಿದ್ದಾರೆ.

18 ರಿಂದ 20 ಗಂಟೆಗಳ ಕಾಲ ಶಿಫ್ಟ್ ನಲ್ಲಿ ಸಿಬ್ಬಂದಿಯನ್ನು ಕೆಲಸಕ್ಕೆ ದೂಡಲಾಗುತ್ತಿತ್ತು. ವೈಯಕ್ತಿಕ ತುರ್ತು ಪರಿಸ್ಥಿತಿಯಲ್ಲೂ ಸಿಬ್ಬಂದಿಗಳಿಗೆ ಹೊರಗೆ ಹೋಗಲು ಅವಕಾಶ ನೀಡುತ್ತಿರಲಿಲ್ಲ ಎಂದು ಬಹಿರಂಗಪಡಿಸಿದರು.

“ನಾನು ಐಷಾರಾಮಿ ಹೋಟೆಲ್‌ಗೆ ಸೇರ್ಪಡೆಗೊಂಡಾಗ, ಕಾರ್ಯಕ್ರಮದ ನಿರ್ದೇಶಕರು ನನಗೆ, ‘ನರಕಕ್ಕೆ ಸ್ವಾಗತ’ ಎಂದು ಹೇಳಿದರು. ಅಲ್ಲಿ ನೌಕರರು ಕಠಿಣ ಕೆಲಸದ ವಾತಾವರಣವನ್ನು ಎದುರಿಸುತ್ತಿದ್ದರಿಂದ ಎಚ್ಚರಿಕೆಯು ನಿಖರವಾಗಿದೆ ಎಂದು ಸಾಬೀತಾಯಿತು” ಎಂದು ಹೇಳಿದ್ದಾರೆ.

“18-20 ಗಂಟೆಗಳ ಕೆಲಸದ ಶಿಫ್ಟ್ ಗಳು, ಹಿರಿಯರು ಯುವಜನರಿಂದ ಲಾಭ ಪಡೆಯುವುದು, ನಿರಂತರ ಲೈಂಗಿಕ ಕಿರುಕುಳಗಳು. ಖಂಡಿತವಾಗಿಯೂ ಅಡಿಗೆಮನೆಗಳು ಮತ್ತು ರೆಸ್ಟೋರೆಂಟ್‌ಗಳು ಹೆಚ್ಚಿನ ಒತ್ತಡದ ಪರಿಸರಗಳಾಗಿವೆ. ಆದರೆ ಆತ್ಮಹತ್ಯೆಗಳು ಅಥವಾ ಸಾಮೂಹಿಕ ಬೆದರಿಸುವಿಕೆಯನ್ನು ಮುಚ್ಚಿಡುವ ಹಂತಕ್ಕೆ ಇರುವಂತಿಲ್ಲ. ಮಾನಸಿಕ ಆರೋಗ್ಯವು ಚರ್ಚೆಯಾಗಿರಲಿಲ್ಲ” ಎಂದಿದ್ದಾರೆ.

ವಿಪರೀತ ಕೆಲಸದ ಅವಧಿಯ ಜೊತೆಗೆ, ಲಿಂಗ ಅಸಮಾನತೆ, ಮಹಿಳೆಯರಿಗೆ ತೂಕವನ್ನು ಕಳೆದುಕೊಳ್ಳುವಂತೆ ಸೂಚಿಸುವುದು, ಮಹಿಳೆಯರು ಅಡುಗೆಮನೆಯ ಅಧೀನಳೆಂದು ಭಾವಿಸುವುದು ಸಾಮಾನ್ಯವಾಗಿತ್ತು ಎಂದು ನಯನತಾರಾ ಮೆನನ್ ಬಾಗ್ಲಾ ಹೇಳಿದ್ದಾರೆ.

ಅರ್ನ್ಸ್ಟ್ ಮತ್ತು ಯಂಗ್ ಉದ್ಯೋಗಿ ಅನ್ನಾ ಸೆಬಾಸ್ಟಿಯನ್ ಅವರ ಮರಣದ ನಂತರ, ಭಾರತೀಯ ವೃತ್ತಿಪರರು ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ, ಕೆಲವು ಸಲಹಾ ಸಂಸ್ಥೆಯಲ್ಲಿ 18-ಗಂಟೆಗಳ ಶಿಫ್ಟ್ ಇರುತ್ತೆ ಎಂದು ಬಹಿರಂಗಪಡಿಸಿದ್ದಾರೆ.