ಎಟಿಎಂನಲ್ಲಿ ನೀವು ಎಷ್ಟು ಉಚಿತ ವ್ಯವಹಾರ ನಡೆಸಬಹುದು..? ಇಲ್ಲಿದೆ ಸಂಕ್ಷಿಪ್ತ ಮಾಹಿತಿ

ಕೊರೊನಾ ಸಂಕಷ್ಟದ ನಡುವೆಯೇ ಬೆಲೆ ಏರಿಕೆ ಬಿಸಿ ಕೂಡ ಶ್ರೀಸಾಮಾನ್ಯನ ಜೇಬನ್ನ ಸುಡುತ್ತಿದೆ. ಈ ನಡುವೆ ಬ್ಯಾಂಕ್​ಗಳೂ ಸಹ ತಮ್ಮ ಗ್ರಾಹಕರಿಗೆ ಎಟಿಎಂ ವ್ಯವಹಾರಗಳ ಶುಲ್ಕವನ್ನ ಏರಿಕೆ ಮಾಡಿದೆ. ಬ್ಯಾಂಕ್​ಗಳು ಎಟಿಎಂನಿಂದ ಹಣ ಡ್ರಾ ಮಾಡುವ ವೇಳೆ ವಿಧಿಸಲಾಗುತ್ತಿದ್ದ ಶುಲ್ಕವನ್ನು ಏರಿಕೆ ಮಾಡಿವೆ.

ರಿಸರ್ವ್​ ಬ್ಯಾಂಕ್​ ಆಫ್​ ಇಂಡಿಯಾ ನೀಡಿದ ನಿರ್ದೇಶನವನ್ನ ಆಲಿಸಿ ಬ್ಯಾಂಕ್​ಗಳು ಈ ಕ್ರಮ ಕೈಗೊಂಡಿವೆ. ಆರ್​ಬಿಐ ಸರಿ ಸುಮಾರು 9 ವರ್ಷಗಳ ಬಳಿಕ ಎಟಿಎಂ ವ್ಯವಹಾರ ಶುಲ್ಕವನ್ನ ಏರಿಕೆ ಮಾಡಿದೆ.

ಆರ್​ಬಿಐ ಬ್ಯಾಂಕ್​​ನಿಂದ ಹಣ ಡ್ರಾ ಮಾಡುವ ನಿಯಮಗಳಲ್ಲಿ ಬದಲಾವಣೆಗಳನ್ನು ತಂದಿದೆ. ಈಗ ನೀವು ಎಟಿಎಂನಿಂದ ಹಣ ಡ್ರಾ ಮಾಡಿದ್ದಕ್ಕೆ ಮೊದಲಿಗಿಂತ ಜಾಸ್ತಿ ಶುಲ್ಕವನ್ನ ಭರಿಸಬೇಕು. ಬ್ಯಾಂಕ್​ ಇಂಟರ್​ಚೇಂಜ್​ ಶುಲ್ಕವನ್ನು ಏರಿಕೆ ಮಾಡುವ ನಿರ್ಧಾರಕ್ಕೆ ಬಂದಿದೆ. ಈ ಸಂಬಂಧ ಸಂಸತ್ತಿಗೆ ಕೇಂದ್ರ ವಿತ್ತ ರಾಜ್ಯ ಸಚಿವ ಭಾಗವತ್​​​ ಕಿಶನ್​ರಾವ್​​​ ಕರಾಡ್​​​ ಮಾಹಿತಿ ನೀಡಿದ್ದು, ಆರ್​ಬಿಐ 2022ರ ಜನವರಿ 1ನೇ ತಾರೀಖಿನಿಂದ ಬ್ಯಾಂಕುಗಳಿಗೆ ಗ್ರಾಹಕರಿಗೆ ಶುಲ್ಕದ ರೂಪದಲ್ಲಿ 21 ರೂಪಾಯಿಗಳವರೆಗೆ ವಸೂಲಿ ಮಾಡಲು ಅವಕಾಶ ನೀಡಿದೆ. ಪ್ರಸ್ತುತ 20 ರೂಪಾಯಿವರೆಗೆ ಶುಲ್ಕ ವಿಧಿಸಲು ಅವಕಾಶವಿದೆ.

ಶುಲ್ಕವೇ ಇಲ್ಲದೆ ಎಷ್ಟು ಬಾರಿ ಎಟಿಎಂ ವ್ಯವಹಾರ ನಡೆಸಬಹುದು..?

ಆರ್​ಬಿಐ ನೀಡಿರುವ ನಿರ್ದೇಶನದ ಪ್ರಕಾರ ಗ್ರಾಹಕರು ತಮ್ಮ ಬ್ಯಾಂಕಿನ ಎಟಿಎಂನಿಂದ ತಿಂಗಳಲ್ಲಿ 5 ಬಾರಿ ಉಚಿತ ವ್ಯವಹಾರ ನಡೆಸಬಹುದಾಗಿದೆ. ಬೇರೆ ಬ್ಯಾಂಕ್​ನ ಎಟಿಎಂಗಳಲ್ಲಿ 3 ರಿಂದ 5 ಬಾರಿ ಫೈನಾನ್ಶಿಯಲ್​ ಹಾಗೂ ನಾನ್​ ಫೈನಾನ್ಶಿಯಲ್​​​ ವ್ಯವಹಾರವನ್ನು ಮಾಡಬಹುದಾಗಿದೆ. ಇದಾದ ಬಳಿಕ ನೀವು ಮಾಡುವ ಪ್ರತಿ ವ್ಯವಹಾರಕ್ಕೂ ಶುಲ್ಕ ಭರಿಸಬೇಕಾಗುತ್ತದೆ.

ಎಟಿಎಂ ವ್ಯವಹಾರಗಳಿಗೆ ಬ್ಯಾಂಕ್​ನಿಂದ ಶುಲ್ಕ ವಿಧಿಸಲೇಬೇಕು ಎಂದೇನಿಲ್ಲ. ಅದು ಬ್ಯಾಂಕುಗಳ ಮೇಲೆ ಅವಲಂಭಿತವಾಗಿದೆ. ಬ್ಯಾಂಕ್​ನವರು ಬಯಸಿದಲ್ಲಿ ವ್ಯವಹಾರದ ಮಿತಿಯನ್ನ ಹೆಚ್ಚಿಸಬಹುದಾಗಿದೆ ಎಂದು ಸಂಸತ್ತಿನಲ್ಲಿ ಕೇಂದ್ರ ವಿತ್ತ ರಾಜ್ಯ ಸಚಿವ ಭಾಗವತ್​ ಕಿಶನ್​ ರಾವ್​ ಹೇಳಿದ್ದಾರೆ.