ಬಹುನಿರೀಕ್ಷಿತ ಅಯೋಧ್ಯೆ ರಾಮ ಮಂದಿರವು 2023ರಿಂದ ಭಕ್ತರ ದರ್ಶನಕ್ಕೆ ಮುಕ್ತವಾಗಲಿದೆ ಎಂದು ಮಂದಿರ ನಿರ್ಮಾಣ ಪರಿಶೀಲನಾ ಸಭೆಯಲ್ಲಿ ಹೇಳಲಾಗಿದೆ.
ಈ ಪರಿಶೀಲನಾ ಸಭೆಯಲ್ಲಿ ರಾಮಮಂದಿರ ಟ್ರಸ್ಟ್ನ ಖಜಾಂಚಿ ಸ್ವಾಮಿ ಗೋವಿಂದದೇವ್ ಗಿರಿ, ಪ್ರಧಾನ ಕಾರ್ಯದರ್ಶಿ ಚಂಪತ್ ರೈ, ಸದಸ್ಯರಾದ ವಿಮಲೇಂದ್ರ ಮೋಹನ್ ಪ್ರತಾಪ್ ಮಿಶ್ರಾ ಹಾಗೂ ಅನಿಲ್ ಮಿಶ್ರಾ, ನಿರ್ಮಾಣ ಸಮಿತಿ ಅಧ್ಯಕ್ಷ ನೃಪೇಂದ್ರ ಮಿಶ್ರಾ, ಟಾಟಾ ಕನ್ಸಲ್ಟಿಂಗ್ ಇಂಜಿನಿಯರ್ಗಳು, ಲರ್ಸನ್ ಹಾಗೂ ಟೂಬ್ರೋಗಳ ಅಧಿಕಾರಿಗಳು ಭಾಗಿಯಾಗಿದ್ದರು.
ಆಗಸ್ಟ್ 27 – 29ರಲ್ಲಿ ನಡೆದ ಸಭೆಯ ನಂತರ ಈ ಪ್ರಕಟಣೆ ಹೊರಡಿಸಲಾಗಿದ್ದು ಇದರ ಪ್ರಕಾರ ದೇವಾಲಯ ನಿರ್ಮಾಣ ಕಾರ್ಯವು ವೇಳಾಪಟ್ಟಿಯಂತೆಯೇ ನಡೆಯುತ್ತಿದೆ. 2023ರ ವೇಳೆಗೆ ಭಕ್ತರು ಶ್ರೀರಾಮನ ದರ್ಶನ ಪಡೆಯಬಹುದು ಎಂದು ಅಂದಾಜಿಸಲಾಗಿದೆ.
ರಾಮಮಂದಿರ ಟ್ರಸ್ಟ್ ದೇವಾಲಯದ ರಚನಾತ್ಮಕ ದೀರ್ಘಾಯುಷ್ಯಕ್ಕೆ ಬದ್ಧವಾಗಿದೆ. ಮಣ್ಣು ಪರೀಕ್ಷೆ ವರದಿಯಲ್ಲಿ ನೆಲಮಟ್ಟದಿಂದ 12 ಮೀಟರ್ ಆಳದಲ್ಲಿ ಭಗ್ನಾವಶೇಷಗಳು ಕಂಡು ಬಂದಿದ್ದರಿಂದ ರಚನಾತ್ಮಕ ಸ್ಥಿರತೆ ಬಗ್ಗೆ ಖಾತರಿ ನೀಡುವುದು ದೊಡ್ಡ ಸವಾಲೇ ಆಗಿತ್ತು ಎಂದು ಟ್ರಸ್ಟ್ ಹೇಳಿದೆ.
12 ಮೀಟರ್ ಆಳದಲ್ಲಿ ಉತ್ಖನನ ಮಾಡಿ ಭಗ್ನಾವಶೇಷಗಳನ್ನು ತೆಗೆದು ಅಡಿಪಾಯವನ್ನು ರೋಲರ್ ಕಾಂಪ್ಯಾಕ್ಟ್ ಕಾಂಕ್ರೀಟ್ನಿಂದ ತುಂಬಿಸಲಾಗಿತ್ತು. ಉತ್ಖನನ ಮಾಡಿದ ಜಾಗವನ್ನು ನಿಗದಿತ ಸಮಯದಲ್ಲಿ ಭರ್ತಿ ಮಾಡಲಾಗಿದೆ. ಜಿಲ್ಲಾಡಳಿತ ಹಾಗೂ ರಾಜ್ಯ ಸರ್ಕಾರ ಕಚ್ಛಾ ವಸ್ತುಗಳ ಖರೀದಿಯಲ್ಲಿ ಸಹಕಾರ ನೀಡಿವೆ.
ಲಾರ್ಸನ್, ಟುಬ್ರೋ ಹಾಗೂ ಟಾಟಾ ಕನ್ಸಲ್ಟಿಂಗ್ ಇಂಜಿನಿಯರ್ಗಳು ಸಮರ್ಥವಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ ಎಂದು ಟ್ರಸ್ಟ್ ಹೇಳಿದೆ. ಉತ್ಖನನ ಮಾಡಿದ ಪ್ರದೇಶವನ್ನು 48 ಪದರಗಳಲ್ಲಿ ರೋಲರ್ ಕಾಂಪ್ಯಾಕ್ಟ್ ಕಾಂಕ್ರೀಟ್ನಿಂದ ತುಂಬಿಸಲಾಗಿದೆ. ಪ್ರತಿಯೊಂದು ಇಂಜಿನಿಯರ್ಡ್ ಫಿಲ್ ಪದರವಾದ 250 ಮಿಲಿಮೀಟರ್ ದಪ್ಪವಾಗಿದೆ.
Loading ...